Biyernes sa Ikakawhaa'g Duha nga Semana sa Ordinaryong Panahon
PAGBASA GIKAN SA UNANG SULAT NI SAN PABLO NGADTO SA TAGA-CORINTO
1 Cor. 4: 1-5
Isipa kami nga mga sulugoon ni Cristo nga gitugyanan sa mga tinagong kamatuoran sa Dios. Ug kinahanglan sa usa ka tinugyanan nga magbinuotan siya sa iyang agalon. Wala ako mabalaka nga hukman ako ninyo o sa bisan unsang tawhanong hukmanan, kay wala man gani ako maghukom sa akong kaugalingon. Tin-aw kaayo ang akong konsensiya, apan wala kini magpasabut nga wala gayod akoy sala. Ang Ginoo ray maghukom kanako. Busa ayaw kamo paghukom kang bisan kinsa sa dili pa moabot ang hustong higayon. Ang katapusang paghukom unya na himoa sa pag-abot sa Ginoo, kay ipadayag niya ang ngil-ad nga mga tinagoan ug ibutyag ang gililong nga mga tinguha sa kasingkasing sa tawo. Niadtong adlawa magdawat ang tagsatagsa sa pagdayeg nga angay kaniya gikan sa Dios.
ANG PULONG SA GINOO
SALMO RESPONSORYO
Ps. 37: 3-4. 5-6. 27-28. 39-40
Ang kaluwasan sa matarong naggikan sa Ginoo.
Salig sa Ginoo ug pagbuhat sa maayo, aron magpuyo ka diha sa yuta ug maghimulos sa kalinaw. Paglipay diha sa Ginoo, ug hatagan ikaw niya sa mga gipangandoy sa imong kasingkasing.
Ang kaluwasan sa matarong naggikan sa Ginoo.
Itugyan sa Ginoo ang imong dalan; salig kaniya, ug mobuhat siya. Padan-agon niya ang katarong alang kanimo sama sa kahayag; masiga sama sa udtong tutok ang imong katarungan.
Ang kaluwasan sa matarong naggikan sa Ginoo.
Talikdi ang dautan ug buhata ang maayo, aron molungtad ka sa kahangturan; Kay ang Ginoo mahigugmaon sa matarong, ug dili mobiya sa iyang buotan nga mga alagad. Ang mga malapason gilaglag ug ang kaliwat sa mga dautan giputol.
Ang kaluwasan sa matarong naggikan sa Ginoo.
Ang kaluwasan sa matarong naggikan sa Ginoo; siya ang ilang dalangpanan sa panahon sa kagul-anan. Ug ang Ginoo nagatabang kanila ug nagluwas kanila; gilikay niya sila sa dautan ug giluwas sila kay midangop man sila kaniya.
Ang kaluwasan sa matarong naggikan sa Ginoo.
PAGBASA SA SANTOS NGA EBANGHELYO SUMALA NI SAN LUKAS
Lk. 5: 33-39
May mga tawo nga miingon kang Jesus, "Ang mga tinun-an ni Juan kanunay nga nagpuasa ug nag-ampo, ingon man ang mga tinun-an sa mga Pariseo, apan ang imong mga tinun-an wala." Si Jesus mitubag, "Papuasahon ba ninyo ang mga dinapit sa kombira sa kasal samtang kauban pa nila ang pamanhonon? Dili gayod! Apan moabot ang panahon nga ang pamanhonon kuhaon, ug niadtong adlawa magpuasa na sila." Unya gisuginlan usab sila ni Jesus niining sambingaya: "Walay tawo nga magtabas og usa ka bahin sa bag-ong bisti aron itapak sa daang bisti, kay kon buhaton niya kini, madaot ang bag-ong bisti, ug ang gitapak dili mobagay sa daan; ni adunay magsulod og bag-ong bino diha sa mga daang sudlanan nga panit; kon buhaton niya kini, ang bag-ong bino makagisi sa panit, unya madaot ang sudlanan ug mausik ang bino. Kinahanglan bag-ong bino ang isulod sa bag-ong sudlanan. Walay tawo nga mangandoy sa bag-ong bino tapos siya makainom sa daang bino. Moingon siya, 'Mas maayo gayod ang daang bino.'"
ANG EBANGHELYO SA GINOO
