Miyerkoles sa Ikakawhaa'g Duha nga Semana sa Ordinaryong Panahon

PAGBASA GIKAN SA UNANG SULAT NI SAN PABLO NGADTO SA TAGA-CORINTO

1 Cor. 3: 1-9

Mga igsuon, dili ako makasulti kaninyo sama sa akong pagpakigsulti sa mga tawo nga nagbaton sa Espiritu; kinahanglan nga makigsulti ako kaninyo ingon nga mga tawo niining kalibutana, ug ingon nga mga bata pa sa Kristohanong pagtuo. Kaniadto gibuhi ko kamog gatas ug dili sa gahing pagkaon kay dili pa man kamo andam niini. Ug bisan gani karon dili pa man kamo andam sa gahi nga pagkaon, kay nagkinabuhi man gihapon kamo ingon nga mga tawo niining kalibutana. Kay dili ba ilhanan nga kamo nga mga tawo gihapon niining kalibutana ug nagkinabuhi subay niini kon anaa pa kaninyo ang kasina ug panag-bingkil? Kay kon usa kaninyo moingon, "Dapig ako ni Pablo," ug ang uban moingon, "Dapig ako ni Apolo"—wala ba kamo magkinabuhi ingon sa mga tawo nga kalibutanon? Kay kinsa ba god si Apolo? Ug kinsa ba si Pablo? Kami mga sulugoon lamang sa Dios, nga nag-agak kaninyo sa pagtuo. Ang tagsatagsa kanamo nagtuman sa gipabuhat sa Dios kanamo. Ako ang pagpugas sa binhi, si Apolo ang nagbisbis sa tanom, apan ang Dios mao ang nagpatubo niini. Ang nagpugas ug ang nagbisibis dili importante. Ang importante mao ang Dios kay siya man ang nagpatubo sa tanom. Walay kalainan ang nagpugas ug ang nagbisibis; ang Dios moganti sa matag usa kanila sumala sa iyang nahimo, kay kami mga kauban sa buhat nga naghiusa pag-alagad sa Dios, ug kamo mao ang uma sa Dios. Kamo mao usab ang balay sa Dios.

SALMO RESPONSORYO

Ps. 33: 12-13. 14-15. 20-21

Bulahan ang katawhan nga gipili sa Ginoo aron maiya.

Bulahan ang nasod kansang Dios mao ang Ginoo, ang katawhan nga iyang gipili alang sa iyang kaugalingong kabilin. Gikan sa langit mitan-aw ang Ginoo; nagatan-aw siya sa tanang katawhan.

Bulahan ang katawhan nga gipili sa Ginoo aron maiya.

Gikan sa iyang dili matarog nga trono nagatan-aw siya sa tanan nga nagpuyo ibabaw sa yuta. Siya nga naghulma sa kasingkasing sa tagsatagsa siya nga nahibalo sa tanan nilang mga buhat.

Bulahan ang katawhan nga gipili sa Ginoo aron maiya.

Ang atong kalag nagapaabot sa Ginoo, nga mao ang atong hinabang ug atong panalipod. Kay diha kaniya nalipay ang atong mga kasingkasing; diha sa iyang balaang ngalan nagasalig kita.

Bulahan ang katawhan nga gipili sa Ginoo aron maiya.

PAGBASA SA SANTOS NGA EBANGHELYO SUMALA NI SAN LUKAS

Lk. 4: 38-44

Mibiya si Jesus sa sinagoga ug miadto sa balay ni Simon. Niadtong higayona gihilantan ang ugangang babaye ni Simon, ug gisultihan nila si Jesus bahin kaniya. Miduol siya ug mibarog sa kiliran sa gihigdaan sa masakiton, ug gipapahawa niya ang hilanat. Gihuwasan ang masakiton ug dihadiha mibangon siya ug misilbi kanila. Sa pagkasawomsom na, ang tanan nga may mga higala nga masakiton sa nagkalainlaing balatian midala kanila ngadto kang Jesus. Ug iyang gitapion ang iyang mga kamut sa tagsatagsa ug giayo niya silang tanan. Gikan sa daghang mga tawo, nanggula usab ang mga yawa nga nagsiyagit, "Ikaw mao ang Anak sa Dios!" Ug gipinahan sila ni Jesus sa dili pagpanugilon, kay nasayod man sila nga siya mao ang Mesiyas. Sa pagsubang sa adlaw, mibiya si Jesus sa lungsod ug miadto sa usa ka dapit nga awaaw. Gipangita siya sa mga tawo, ug sa diha nga hikit-an na siya, ila siyang gipugngan sa paglakaw. Apan miingon siya kanila, "Kinahanglan nga magwali ako sa Maayong Balita sa Gingharian sa Dios ngadto usab sa ubang mga lungsod, kay mao man kini ang tuyo sa Dios sa iyang pagpadala kanako." Busa nagwali siya sulod sa mga sinagoga sa Judea.