Lunes sa Ikakawhaa'g Duha nga Semana sa Ordinaryong Panahon

PAGBASA GIKAN SA UNANG SULAT NI SAN PABLO NGADTO SA TAGA-CORINTO

1 Cor. 2: 1-5

Mga igsuon, sa akong pag-anha aron pagwali sa tinago nga kamatuoran gikan sa Dios, wala ako maggamit ug lawom nga mga pulong ug dakong kinaadman. Kay sa diha pa ako uban kaninyo gikalimtan ko ang tanang butang gawas Kang Jesucristo, labi na gayod ang iyang kamatayon sa krus. Busa pag-anha ko kaninyo, huyang ako ug nagkurog sa kahadlok, ug ang akong pagpanudlo ug pagwali wala ko himoa sa hinashasang mga pulong sa tawhanong kaalam, kondili pinaagi sa dili malalis nga gahom sa Espiritu sa Dios. Busa ang inyong pagtoo wala magbarog diha sa kaalam sa tawo, kondili sa gahom sa Dios.

SALMO RESPONSORYO

Ps. 119: 97. 98. 99. 100. 101. 102

Ginoo, nahigugma ako sa imong kasugoan.

Gihigugma ko gayod ang imong balaod, O Ginoo! Kini mao ang akong gipalandong sa tibuok adlaw.

Ginoo, nahigugma ako sa imong kasugoan.

Ang imong sugo naghimo kanako nga mas maalam kay sa akong mga kaaway, kay uban kini kanako kanunay.

Ginoo, nahigugma ako sa imong kasugoan.

Labaw ang akong kahibalo kay sa tanan kong mga magtutudlo, diha nga ang imong mga gimbut-an mao ang akong gipalandong.

Ginoo, nahigugma ako sa imong kasugoan.

Labaw ang akong puangod kay sa mga tigulang, tungod kay nagtuman ako sa imong mga sugo.

Ginoo, nahigugma ako sa imong kasugoan.

Sa tanang dautan nga dalan gidid-an ko ang akong mga tiil, aron bantayan ko ang imong mga pulong.

Ginoo, nahigugma ako sa imong kasugoan.

Sa imong mga gisugo wala ako motipas, kay imo ako nga gitudloan.

Ginoo, nahigugma ako sa imong kasugoan.

PAGBASA SA SANTOS NGA EBANGHELYO SUMALA NI SAN LUKAS

Lk. 4: 16-30

Unya miadto si Jesus sa Nazaret diin siya magdako, ug ingon sa naandan miadto siya sa sinagoga sa Adlaw nga Igpapahulay. Mitindog siya aron pagbasa sa Kasulatan, ug gitunolan siya sa basahon nga sinulat ni Propeta Isaias. Gibukhad niya ang linukot nga basahon ug maoy iyang gibasa ang dapit diin nasulat kini: "Ang Espiritu sa Ginoo ania kanako. Gidihugan ako niya aron pagsangyaw sa Maayong Balita ngadto sa mga kabus, gipadala ako niya aron pagsangyaw sa kagawasan ngadto sa mga binihag, ug pagpahiuli sa panan-aw sa mga buta; Pagpagawas sa mga dinaogdaog, ug pagpahibalo sa tuig nga ang Ginoo moluwas sa iyang katawhan!" Unya gilukot ni Jesus ang basahon, ug giuli ngadto sa piniyalan, ug milingkod siya. Mitutok kaniya ang tanan nga didto sa sinagoga. Unya miingon siya kanila, "Kining bahina sa Kasulatan natuman karong adlawa, ingon sa inyong nadungog nga gibasa." Nakadayeg kaniya silang tanan, ug nahibulong sa mga matahom nga pulong nga iyang gisulti. Miingon sila, "Dili ba kini siya ang anak ni Jose?" Miingon siya kanila, "Sa walay duhaduha inyong isulti kanako ang giingon sa sanglitanan, 'Doktor, tambali ang imong kaugalingon.' Kamo usab moingon kanako, 'Himoa dinhi sa imong kaugalingong lungsod ang mga butang nga imong gihimo didto sa Capernaum, sumala sa gitaho kanamo.' Apan sultihan ko kamo niini, ang usa ka propeta dili gayod dawaton sa iyang kaugalingong lungsod. Pamati kamo kanako: tinuod nga daghang mga biyuda didto sa Israel sa panahon ni Elias, sa dihang walay ulan sulod sa tulo ka tuig ug tunga ug may dakong gutom sa tibuok yuta. Apan wala ipadala si Elias ngadto sa bisan usa kanila, kondili ngadto hinoon sa biyuda sa Sarepta sa kayutaan sa Sidon. Ug may daghan usab nga sanlahon dinhi sa Israel sa panahon ni propeta Eliseo, apan walay bisan usa kanila nga naayo gawas kang Naaman ang taga-Siria." Sa ilang pagkadungog niini, nangasuko pag-ayo ang tanan nga didto sa sinagoga. Nanindog sila ug ilang gitaral si Jesus ngadto sa gawas sa lungsod ug gidala ngadto sa tumoy sa bungtod diin natukod ang ilang lungsod, aron ihulog siya sa pangpang. Apan miagi siya sa taliwala sa katawhan ug mipahilayo.