[M] Ang Pasyon ni San Juan nga Magbubunyag, martir

PAGBASA GIKAN SA BASAHON NI PROPETA JEREMIAS

Jer. 1: 17-19

"Ayaw kahadlok; suginli sila sa tanang gisugo ko kanimo. Ayaw sila kahadloki aron dili ko ikaw hadlokon ug labaw pa niini inig-atubang mo kanila. Pamati, Jeremias! Ang tanang tawo ning nasora, ang mga hari sa Juda, ang mga kadagkoan, mga kaparian, ug ang katawhan makigbatok kanimo. Apan karong adlawa, hatagan ko ikawg kaisog sa pagsukol kanila; mahisama ka sa kinutaan nga siyudad, sa puthaw nga haligi ug tumbaga nga paril. Dili sila makabuntog kanimo, kay ubanan ug panalipdan ko man ikaw. Ako, ang Ginoo, nagsulti niini."

SALMO RESPONSORYO

Ps. 71: 1-2. 3-4. 5-6. 15. 17

Mag-awit ako mahitungod sa imong kaluwasan.

Kanimo, O Ginoo, nagadangop ako; ayaw gayod itugot nga ako kaulawan. Sa imong katarong luwasa ako, ug palingkawasa ako; ipaabong ang imong dunggan kanako ug luwasa ako.

Mag-awit ako mahitungod sa imong kaluwasan.

Pagpakahimong akong bato nga dalangpanan, usa ka kota nga manalipod kanako, kay ikaw man ang akong bato ug akong kota. O Dios ko, luwasa ako sa kamut sa dautan.

Mag-awit ako mahitungod sa imong kaluwasan.

Kay ikaw ang akong kalauman, O Ginoo: ang akong gisaligan, O Dios, sukad sa akong kabatan-on. Kanimo nagasalig ako sukad sa akong pagkatawo; gikan sa tiyan sa akong inahan ikaw ang akong kusog.

Mag-awit ako mahitungod sa imong kaluwasan.

Magsangyaw ang akong ba-ba sa imong katarong adlaw-adlaw sa imong kaluwasan. O Dios, gitudloan mo ako sukad sa akong kabatan-on, ug hangtod karon nagasangyaw ako sa imong katingalahan nga mga buhat.

Mag-awit ako mahitungod sa imong kaluwasan.

PAGBASA SA SANTOS NGA EBANGHELYO SUMALA NI SAN MARKOS

Mk. 6: 17-29

Si Herodes mismo mao ang nagpadakop, nagpagapos, ug nagpabilanggo kang Juan. Gihimo niya kini tungod kang Herodias nga iyang gipangasawa, bisan kon si Herodias asawa ni Felipe nga iyang igsuon. Kay si Juan god nagpunay mag sulti kang Herodes, "Dili matarong nga makigpuyo ka sa asawa sa imong igsuon." Tungod niini, nagdumot si Herodias kang Juan ug naninguha sa pagpatay kaniya, apan wala siya makahimo niini kay wala man siya tugoti ni Herodes. Nahadlok si Herodes kang Juan kay nasayod man siya nga si Juan maayo ug balaan nga tawo, busa iya siyang gipanalipdan. Gusto si Herodes mamati kaniya bisan tuod masamok ang iyang hunahuna inigkabati niya sa tanan nga isulti ni Juan. Sa katapusan nakahigayon ra gayod si Herodias. Nahitabo kadto sa sumad sa adlawng natawhan ni Herodes. Niadtong higayona nagkombira si Herodes ug gidapit niya ang tanang kadagkoan sa kagamhanan, ingon man ang mga pangulo sa kasundalohan, ug ang mga inilang molupyo sa Galilea. Ang anak nga babaye ni Herodias misulod ug misayaw ug nakapahimuot siya ni Herodes ug sa iyang mga bisita. Busa ang hari miingon sa dalagita, "Unsa may imong gusto? Ihatag ko kanimo bisag unsay imong pangayoon." Nakasaad pa gani siya uban ang pagpanumpa nga nag-ingon, "Ihatag ko kanimo ang tanan nga imong pangayoon bisan pag ang katunga sa akong gingharian." Busa migula ang dalagita ug nangutana sa iyang inahan: "Unsa may akong pangayoon?" "Ang ulo ni Juan," mitubag ang inahan. Ang dalagita midali pagbalik ngadto sa hari ug miingon, "Ihatag kanako karon dayon ang ulo ni Juan diha sa bandihado." Nakapasubo kini pag-ayo sa hari, apan wala siya makabalibad kaniya tungod sa iyang gipanumpa atubangan sa tanan niyang mga bisita. Busa dihadiha nagsugo siyag usa ka sundalo nga punggotan sa ulo si Juan. Milakaw ang sundalo ug miadto sa bilanggoan ug gipunggotan si Juan. Unya gidala niya ang ulo nga gibutang sa bandihado ug gihatag ngadto sa dalagita, ug gihatag usab kini sa dalagita ngadto sa iyang inahan. Sa pagkadungog sa mga tinun-an ni Juan mahitungod niini, miadto sila ug gikuha nila ang iyang lawas ug gilubong.