[M] San Agustin, obispo ug doktor sa Simbahan

PAGBASA GIKAN SA UNANG SULAT NI SAN PABLO NGADTO SA TAGA-CORINTO

1 Cor. 1: 17-25

Si Cristo wala magpadala kanako aron ako mamunyag, kondili aron magsangyaw sa Maayong Balita, dili ginamit ang mga pulong nga lisod sabton, aron dili mawagtang ang gahom sa kamatayon ni Cristo didto sa krus. Kay ang mensahe mahitungod sa kamatayon ni Cristo didto sa krus binuang alang niadtong wala maluwas; apan kanatong giluwas, gahom kini sa Dios. Ang Kasulatan nag-ingon, "Himoon kong kawang ang kahibalo sa mga maalam ug isalikway ko ang kaalam sa mga makinaadmanon." Busa unsa na man unyay kapuslanan sa mga maalam ug sa mga makinaadmanon, ug sa mga batid sa lantugi niining kalibutana? Gipakita sa Dios nga walay kapuslanan ang kaalam niining kalibutana. Kay maoy pagbuot sa Dios sa iyang pagkamaalamon, nga walay tawo nga makaila kaniya pinaagi sa iyang kaugalingong kinaadman. Apan gibut-an sa Dios ang pagluwas niadtong motuo pinaagi sa ilang giingong "binuang" nga mensahe nga among giwali. Ang mga Judio nagkinahanglan og mga milagro aron motuo sila, ug ang mga Griego nangita og kaalam. Apan alang kanamo, nagsangyaw kami kang Cristo nga gilansang sa krus, ug kining mensahia wala kahimut-i sa mga Judio ug giilang binuang sa mga dili Judio. Apan alang niadtong gitawag sa Dios, Judio siya o dili, si Cristo mao ang gahom ug ang kaalam sa Dios. Kay ang giisip nila nga binuang sa Dios mas maalamon pa kay sa kinaadman sa tawo, ug ang ilang giisip nga kahuyang sa Dios mas lig-on pa kay sa kusog sa tawo.

SALMO RESPONSORYO

Ps. 33: 1-2. 4-5. 10-11

Puno ang yuta sa kaayo sa Ginoo.

Panglukso kamo sa kalipay, kamong mga matarong, diha sa Ginoo; ang pagdayeg gikan sa mga buotan angay gayod. Pasalamati ang Ginoo diha sa alpa; sa lira nga may napulo ka koldas, awita ang iyang kadayganan.

Puno ang yuta sa kaayo sa Ginoo.

Kay matarong ug ang tanan niyang mga buhat kasaligan; Mahigugmaon siya sa kaangayan ug katarong; puno ang yuta sa kaayo sa Ginoo.

Puno ang yuta sa kaayo sa Ginoo.

Gikawang sa Ginoo ang mga laraw sa kanasuran; iyang gipakyas ang dautang mga tinguha sa katawhan. Ang laraw sa Ginoo nagabarog sa kahangturan; ang tinguha sa iyang kasingkasing, latas sa tanang kaliwatan.

Puno ang yuta sa kaayo sa Ginoo.

PAGBASA SA SANTOS NGA EBANGHELYO SUMALA NI SAN MATEO

Mt. 25: 1-13

Si Jesus misugilon niining sambingay ngadto sa iyang mga tinun-an: "Niadtong adlawa ang Gingharian sa Langit mahisama sa napulo ka dalaga nga nagdala sa ilang mga suga ug nanglakaw aron pagsugat sa paman-honon. Danghag ang lima kanila, ug maalamon ang laing lima. Ang mga danghag nagdala sa ilang mga suga apan wala sila magtagana pagdalag lana nga igdudugang, samtang ang mga maalamon nagdalag mga sudlanan nga punog lana uban sa ilang mga suga. Ang pamanhonon nalangan pag-abot, busa nagduka ug nakatulog ang mga dalaga." "Tungang gabii na kadto sa dihang milanog ang usa ka singgit, 'Ania na ang pamanhonon! Dali kamo ug sugata siya!' Nangmata ang mga dalaga ug giandam nila ang ilang mga suga. Unya ang mga danghag miingon sa mga maalamon, 'Bahini kamig diyotay sa inyong lana, kay hapit na mangapalong ang among mga suga.' Apan ang mga maalamon mitubag, "Ayaw kay dili na paigo ang lana alang kaninyo ug kanamo. Lakat hinoon kamo sa tindahan ug palit kamog inyong magamit." Busa ang mga danghag nga dalaga milakaw aron pagpalit og lana, ug sa wala na sila didto, miabot ang pamanhonon. Ang lima ka dalaga nga nakapangandam mikuyog kaniya pagsulod ngadto sa kombira sa kasal ug gisirhan ang pultahan. "Unya miabot ang ubang mga dalaga ug misangpit sila, 'Sir, sir, pasudla kami!' Apan ang pamanhonon mitubag, 'Wala ako makaila kaninyo.'" Ug gitapos ni Jesus ang sambingay sa pag-ingon, "Busa pagtukaw kamo kay wala kamo mahihalo sa adlaw o sa takna."