[M] Santa Monica

ANG SINUGDANAN SA UNANG SULAT NI SAN PABLO NGADTO SA TAGA-CORINTO

1 Cor. 1: 1-9

Gikan ni Pablo nga sa pagbuot sa Dios gitawag aron mahimong apostol ni Cristo Jesus, ug gikan usab sa atong igsuon nga si Sostenes—Alang sa simbahan sa Dios sa Corinto, ug sa tanan nga gitawag aron mahimong balaang katawhan sa Dios, nga naiya diha sa ilang pagkahiusa kang Cristo Jesus, uban sa tanang tawo sa tanang dapit nga nagsangpit sa ngalan sa atong Ginoong Jesucristo nga ila ug ato usab nga Ginoo. Ang Dios nga atong Amahan ug ang Ginoong Jesucristo maghatag unta kaninyog grasya ug kalinaw. Sa kanunay nagpasalamat ako sa Dios alang kaninyo tungod sa grasya nga iyang gihatag kaninyo pinaagi kang Cristo Jesus. Kay diha sa pagkahiusa ninyo kang Cristo, nadato kamo sa tanang butang lakip sa tanang pagpanulti ug sa tanang kahibalo. Ang mensahe mahitungod kang Cristo nakagamot na kaninyo, ug tungod niini nakadawat kamo sa tanang panalangin, samtang nagpaabot kamo sa pagpadayag sa atong Ginoong Jesucristo. Lig-onon usab kamo niya hangtod sa katapusan aron wala unyay ikasa-way kaninyo sa adlaw sa pagbalik sa atong Ginoong Jesucristo. Kasaligan ang Dios nga nagtawag kaninyo aron mahiusa sa iyang Anak nga si Jesucristo nga atong Ginoo.

SALMO RESPONSORYO

Ps. 145: 2-3. 4-5. 6-7

Daygon ko sa kahangturan ang imong ngalan, Ginoo.

Himayaon ko ikaw adlaw-adlaw, ug daygon ko ang imong ngalan hangtod sa kahangturan. Dako ang Ginoo ug angay gayod siyang daygon; ang iyang kadako dili matukib.

Daygon ko sa kahangturan ang imong ngalan, Ginoo.

Ang tanang kaliwatan nagadayeg sa imong mga buhat ug nagasangyaw sa imong gahom. Nagasulti sila sa kasanag sa imong mahimayaong kahalangdon ug nagasaysay sa imong katingalahang mga buhat.

Daygon ko sa kahangturan ang imong ngalan, Ginoo.

Nagaasoy sila sa gahom sa imong makalilisang nga mga buhat ug nagabutyag sa imong kadako. Nagasibya sila sa kabantog sa imong naghingapin nga kaayo ug nagaawit nga masadya sa imong katarong.

Daygon ko sa kahangturan ang imong ngalan, Ginoo.

PAGBASA SA SANTOS NGA EBANGHELYO SUMALA NI SAN MATEO

Mt. 24: 42-51

Si Jesus miingon sa iyang mga tinun-an: "Busa pagbantay kamo, kay wala kamo masayod kon unsang adlawa moanhi ang Ginoo. Hinumdomi kini: kon ang agalon sa panimalay nasayod pa sa takna nga iabot sa kawatan, magtukaw gayod siya ug dili motugot nga ang kawatan molungkab sa balay. Busa kamo usab kinahanglan mag-andam kanunay, kay moabot ang Anak sa Tawo sa takna nga kamo wala magpaabot kaniya." "Busa kinsa man ang buotan ug maalamon nga sulugoon? Kadtong gipiyalan sa iyang agalon sa pagdumala sa ubang mga sulugoon, ug sa paghatag kanilag pagkaon sa hustong panahon. Pagkabulahan niadtong sulugoon nga makaplagan sa iyang agalon nga nagtuman niini sa paghiuli niya! Sultihan ko kamo nga ang maong sulugoon himoon sa agalon nga piniyalan sa tanan niyang katigayonan. Apan kon siya daotang sulugoon, moingon siya sa iyang kaugalingon, 'Dugay pang mouli ang akong agalon,' ug mosugod siya pagpamunal sa iyang mga kaubang sulugoon, ug magpalabig kaon ug inom uban sa mga palahubog. Unya ang agalon niadtong sulugoon mahibalik usa niana ka adlaw nga wala niya paabota ug sa takna nga wala niya hibaloi; ug tagodtagoron siya sa agalon ug pahiagomon siya sa gidangatan sa mga tigpakaaron-ingnon. Didto maghilak siya ug magkagot ang iyang ngipon."