Miyerkoles sa Ikakawhaa'g Usa nga Semana sa Ordinaryong Panahon

PAGBASA GIKAN SA IKADUHANG SULAT NI SAN PABLO NGADTO SA TAGA-TESALONICA

2 Thes. 3: 6-10. 16-18

Mga igsuon, sa ngalan sa Ginoong Jesucristo, pahilayo kamo sa tanang kaigsuonan nga nagtinapulan ug wala magtuman sa among gipahimangno kanila. Kay nahibaloan ninyo nga angay kamong manig-ingon kanamo. Wala kami magtinapulan sa diha pa kami kaninyo. Wala kami magpadulot ug pagkaon nga wala namo bayri; hinonoa, nagbuhat ug nagbudlay kami sa adlaw ug gabii aron dili makahasol kang bisan kinsa kaninyo. Gihimo namo kini dili tungod kay wala kami katungod pagpangayog suhol, kondili aron mahimo kami nga inyong sumbanan. Samtang diha pa kami uban kaninyo, giingnan namo kamo, "Ayaw pakan-a ang dili motrabaho." Hinaut unta nga ang Ginoo mismo nga mao ang tuboran sa atong kalinaw kanunay maghatag kaninyog kalinaw sa tanang paagi. Ang Ginoo mag-uban kaninyong tanan. Ako mismo, si Pablo, maoy nagsulat niining pangumosta. Kini ang akong paagi pagpirma sa tanang sulat, ug ingon niini ang akong sinulatan. Hinaut unta nga ang grasya sa atong Ginoong Jesucristo mag-uban kaninyong tanan.

SALMO RESPONSORYO

Ps. 128: 1-2. 4-5

Bulahan sila nga mahadlokon sa Ginoo.

Bulahan ikaw nga mahadlokon sa Ginoo, nga nagalakaw sa iyang kadalanan. Kay magakaon ka sa bunga sa imong binuhatan; mabulahan gayod ikaw ug mapanalanginan.

Bulahan sila nga mahadlokon sa Ginoo.

Nga Ania, ingnon niini pagpanalangin ang tawo mahadlokon sa Ginoo. Ang Ginoo manalangin kanimo gikan sa Sion; makakita unta ikaw sa kausbawan sa Jerusalem sa tanang mga adlaw sa imong kinabuhi.

Bulahan sila nga mahadlokon sa Ginoo.

PAGBASA SA SANTOS NGA EBANGHELYO SUMALA NI SAN MATEO

Mt. 23: 27-32

Si Jesus miingon: "Pagkaalaut ninyong mga magtutudlo sa Balaod ug kamong mga Pariseo! Mga tigpakaaron-ingnon! Sama kamo sa mga pantiyon nga pinintalag puti, nga maanindot tan-awon sa gawas, apan sa sulod puno sa mga bukog sa mga patay ug sa mga hugawng butang. Sa samang paagi, sa gawas makita sa tanan nga kamo maayo, apan sa sulod ninyo puno kamo sa mga pagpakaaron-ingnon ug sa mga sala." "Pagkaalaut ninyong mga magtutudlo sa Balaod ug kamong mga Pariseo! Mga tigpakaaron-ingnon! Nagbuhat kamog mga maanindot nga lubnganan alang sa mga propeta ug giadornohan ninyo ang mga monumento niadtong mga maayog kinabuhi, ug nag-ingon kamo, 'Kon kami nagpuyo pa sa panahon sa atong mga katigulangan, dili unta namo himoon ang ilang gibuhat, ni patyon ang mga propeta.' Busa giangkon ninyo nga mga kaliwat kamo niadtong mga tawo nga mipatay sa mga propeta! Busa padayon ug tiwasa ninyo ang gisugdan sa inyong mga katigulangan!"