Martes sa Ikakawhaa'g Usa nga Semana sa Ordinaryong Panahon

PAGBASA GIKAN SA IKADUHANG SULAT NI SAN PABLO NGADTO SA TAGA-TESALONICA

2 Thes. 2: 1-3. 14-16

Mahitungod sa pag-anhi sa atong Ginoong Jesucristo ug sa iyang pagtigom kanato aron pagpakig-uban kaniya, naghangyo ako kaninyo mga igsuon: ayaw kamo kahikugang dayon ug kabalaka sa taho nga ang Adlaw sa Ginoo miabot na. Ayaw kinig tuohi bisag gipasikad pa kini sa tagna o sa wali o sa sulat nga kuno gikan kanamo. Ayaw kamo palimbong ni bisan kinsa sa bisan unsang paagi. Kay ang maong Adlaw dili moabot kon dili pa mahitabo ang katapusang pag-alsa batok sa Dios ug dili pa motungha ang Tawong Yawan-on nga gitagana alang sa impyerno. Mao kini ang tuyo sa Dios sa iyang pagpili kaninyo pinaagi sa Maayong Balita nga among giwali kaninyo aron makaambit kamo sa himaya sa atong Ginoong Jesucristo. Busa mga igsuon, ampingi ang mga kamatuoran nga among gitudlo kaninyo pinaagi sa wali ug sa sulat. Hinaot unta nga ang atong Ginoong Jesucristo ug ang Dios nga atong Amahan nga nahigugma kanato ug naghatag kanatog walay katapusan nga kadasig ug maayong paglaum pinaagi sa iyang grasya.

SALMO RESPONSORYO

Ps. 96: 10. 11-12. 13

Moabot ang Ginoo aron maghukom sa yuta.

Isulti diha sa kanasuran: Ang Ginoo hari. Gihimo niya ang kalibutan nga malig-on, aron dili gayod matarog; nagadumala siya sa iyang lungsod uban sa kaangayan.

Moabot ang Ginoo aron maghukom sa yuta.

Maglipay ang kalangitan ug magsadya ang yuta; molanog ang dagat ug ang nagpuno niini; Magsadya ang kapatagan ug ang tanan nga anaa kanila.

Moabot ang Ginoo aron maghukom sa yuta.

Manglukso sila sa kasadya atubangan sa Ginoo kay nag-abot siya; nagaabot siya aron maghari sa yuta. Maghari siya sa kalibutan uban sa katarong ug sa kalungsoran uban sa iyang kamakanunayon.

Moabot ang Ginoo aron maghukom sa yuta.

PAGBASA SA SANTOS NGA EBANGHELYO SUMALA NI SAN MATEO

Mt. 23: 23-26

Si Jesus miingon ngadto sa katawhan: "Pagkaalaut ninyong mga magtutudlo sa Balaod ug kamong mga Pariseo! Mga tigpakaaron-ingnon! Naghatag kamo ngadto sa Dios sa ikapulong bahin bisan gani sa mga lamas sama sa herbabuyna, sa anis, ug sa kaningag, apan wala ninyo tumana ang mas importanting mga pagtulon-an sa Balaod ingon pananglit sa hustisya ug sa kaluoy ug sa kamatinud-anon. Angay unta nga buhaton ninyo kini sa walay pagbiya sa ubang pagtulon-an. Mga giya nga buta! Salaon ninyo ang lagong nga anaa sa inyong ilimnon, apan lamyon ninyo ang kamelyo!" "Pagkaalaut ninyong mga magtutudlo sa Balaod ug kamong mga Pariseo! Mga tigpakaaron-ingnon! Gilinisan ninyo ang gawas nga bahin sa inyong baso ug plato, apan ang sulod napuno sa inyong mga sinakmit pinaagi sa panlupig ug kahakog. Mga Pariseo nga buta! Limpiyohi una ninyo ang sulod sa kupa, ug malimpyo usab ang gawas niini!"