Ikakawhaa'g Usa nga Domingo sa Ordinaryong Panahon

PAGBASA GIKAN SA BASAHON NI PROPETA ISAIAS

Is. 22: 15. 19-23

Mao kini ang giingon sa Ginoo nga Labing Gamhanan, "Adtoa kining tinugyanan nga atua sa Sebna, nga maoy nagdumala sa palasyo sa hari ug ingna siya: 'Palagputon ko imong katungdanan, ug gikan sa imong ikaw sa nahimutangan.'" "Niadtong adlawa paanhion ko ang akong sulugoon nga si Eliakim anak ni Hilkias, ug sul-oban ko siya sa imong bisti, ug baksan ko siya sa imong bakos, ug itugyan ko kaniya ang imong gahom; ug mahimo siyang pangulo sa mga molupyo sa Jerusalem ug sa Juda. Ug isangon ko sa iyang abaga ang katungod sa pag-abli sa balay ni David; siyay moabli niini ug walay makasira; mosira siya niini ug walay makaabli. Ibutang ko siya sa usa ka lig-on nga dapit daw usa ka ugsok, ug mahimo siyang garbo sa iyang banay."

SALMO RESPONSORYO

Ps. 138: 1-2. 2-3. 6. 8

Ginoo, ang imong gugma walay katapusan; ayaw pagbiyai ang buhat sa imong mga kamut.

Pasalamatan ko ikaw, O Ginoo, sa tibuok kong kasingkasing, (kay imong gidungog ang mga pulong sa akong baba); sa atubangan sa mga anghel awiton ko ang imong kadayganan; Nagasimba ako didto sa imong balaan nga templo.

Ginoo, ang imong gugma walay katapusan; ayaw pagbiyai ang buhat sa imong mga kamut.

Pasalamatan ko ang imong ngalan, tungod sa imong kaluoy ug imong kamatuoran; Sa akong pagsangpit, gipatalinghogan mo ako; imo akong gilig-on sulod sa akong kaugalingon.

Ginoo, ang imong gugma walay katapusan; ayaw pagbiyai ang buhat sa imong mga kamut.

Ang Ginoo hataas, apan nagatan-aw siya sa mapaubsanon, ug nakaila siya sa mapahitas-on gikan sa halayo. Ang imong kaayo, O Ginoo, nagalungtad sa kahangturan; ayaw pagbiyai ang buhat sa imong mga kamut.

Ginoo, ang imong gugma walay katapusan; ayaw pagbiyai ang buhat sa imong mga kamut.

PAGBASA GIKAN SA SULAT NI SAN PABLO NGADTO SA TAGA-ROMA

Rom. 11: 33-36

Mga igsuon: Pagkabahandianon gayod sa Dios ug pagkatulugkaron sa iyang kaalam ug kahibalo! Kinsay makasaysay sa iyang hukom? Kinsay makasabot sa iyang mga paagi? Sumala sa giingon sa Kasulatan: "Kinsay nasayod sa hunahuna sa Ginoo? Kinsa makatambag kaniya? Kinsay nakahatag kaniyag bisan unsa, aron iyang baslan?" Kay siyay nagbuhat sa tanang butang, ug nahimong mao karon ang tanang butang pinaagi kaniya ug alang kaniya. Iya sa Dios ang himaya sa walay katapusan! Amen.

PAGBASA SA SANTOS NGA EBANGHELYO SUMALA NI SAN MATEO

Mt. 16: 13-20

Unya miadto si Jesus sa yuta duol sa lungsod sa Cesarea Filipo, ug didto nangutana siya sa iyang mga tinun-an, "Sumala sa mga tawo, kinsa man ang Anak sa Tawo?" Sila mitubag, "May nag-ingon nga siya mao si Juan nga Magbubunyag; ang uban nag-ingon nga siya mao si Elias; samtang ang uban nag-ingon nga siya mao si Jeremias o laing propeta." Si Jesus nangutana kanila, "Apan kamo, unsa may inyong ikasulti? Kinsa man ako?" Ug mitubag si Simon Pedro, "Ikaw mao ang Mesiyas, ang Anak sa Dios nga buhi." Giingnan siya ni Jesus, "Simon, anak ni Jonas, bulahan ka gayod kay kining maong kamatuoran wala moabot kanimo gikan sa bisan kinsang tawo, kondili gihatag kanimo sa akong Amahan nga atua sa langit. Busa sultihan ko ikaw: ikaw si Pedro ug ibabaw niining bato tukoron ko ang akong Simbahan, ug bisan gani ang kamatayon dili gayod makabuntog niini. Ihatag ko kanimo ang mga yawi sa Gingharian sa langit: ang imong idili dinhi sa yuta, idili usab didto sa langit; ug ang imong itugot dinhi sa yuta, itugot usab didto sa langit." Unya gipinahan si Jesus ang iyang mga tinun-an nga dili sila manugilon kang bisan kinsa nga siya mao ang Mesiyas.