[M] San Pio X, papa

PAGBASA GIKAN SA BASAHON NI PROPETA EZEQUIEL

Ez. 37: 1-14

Gikuptan ako sa Ginoo ug pinaagi sa iyang espiritu, gidala ako niya didto sa walog diin nagkatap ang mga bukog. Ug gilibotlibot niya ako sa pagpatan-aw niini, ug nakita ko nga nalukop sa bukog ang walog ug uga kini kaayo. Ug giingnan ako niya, "Tawo, mabuhi pa ba kining mga bukog?" Ug mitubag ako "Ginoong Dios ikaw ray nasayod niini." Unya giingnan pa gayod ako niya, "Sultihi kining mga bukog nga mamati sila sa Nag-ingon ang Ginoong Dios kaninyo: Paginhawaon ko kamo ug mabuhi kamo pag-usab. Hatagan ko kamog mga ugat ug unod ug panit, ug hatagan ko kamog gininhawa ug mabuhi kamo. Unya makaila na kamo nga ako mao ang Ginoo." Busa misulti ako sumala sa gisugo kanako. Samtang nagsulti ako, may nabati akong kinanaas ug nagkauli ang mga bukog, ug nahimong tibuok nga lawas. Sa pagtan-aw ko, may mga ugat, unod ug panit na kini; apan dili pa moginhawa. Unya giingnan ako sa Dios, "Tawo, sultihi ang hangin nga ako, ang Ginoong Dios, nagsugo kaniya paghuros ug paghatag ug gininhawa niining patayng mga lawas aron mabuhi sila pag-usa." Busa misulti ako sumala sa gisugo kanako ug miginhawa na sila ug nabuhi, ug nanindog sila. Daghan sila kaayo. Unya giingnan ako sa Dios, "Tawo, ang katawhan sa Israel sama niining mga bukog. Miingon sila, 'Uga na ang among mga bukog, ug wala na kami paglaum; patay na gayod kami.' Busa sultihi sila nga nag-ingon ang Ginoong Dios, 'Ablihan ko ang inyong mga lubong ug banhawon ko kamo, O katawhan ko! Dad-on ko kamo balik sa yuta sa Israel. Ug unya hibaw-an ninyo nga ako mao ang lubnganan, ug inigbanhaw ko kaninyo, O katawhan ko! Papuy-on ko diha kaninyo ang akong espiritu, ug mabuhi kamo, ug ibutang ko kamo sa inyong kaugalingong yuta; unya hibaw-an ninyo nga ako, ang Ginoo nga nakigsulti kaninyo, maoy naghimo niini. Ako ang Ginoo nagsulti.'"

SALMO RESPONSORYO

Ps. 107: 2-3. 4-5. 6-7. 8-9

Pasalamati ang Ginoo, kay ang iyang gugma hangtod sa kahangtoran.

Pasultia ang tinubos sa Ginoo, sila nga iyang gitubos gikan sa kamot sa kaaway. Ug iyang gitapok gikan sa kayutaan, gikan sa silangan ug kasadpan, gikan sa Amihanan ug sa Habagatan.

Pasalamati ang Ginoo, kay ang iyang gugma hangtod sa kahangtoran.

Nasalaag sila didto sa kamingawan; wala sila katultol sa dalan ngadto sa siyudad nga walay nagpuyo. Gigutom sila ug giuhaw, naghigos sila sa ilang pagpanglakaw.

Pasalamati ang Ginoo, kay ang iyang gugma hangtod sa kahangtoran.

Nagtawag sila sa Ginoo sa ilang kagul-anan; giluwas sila niya sa ilang mga kalisdanan. Ug gitultolan niya sila sa matarong nga dalan aron makaabut sila sa usa ka siyudad nga dunay mga tawo.

Pasalamati ang Ginoo, kay ang iyang gugma hangtod sa kahangtoran.

Papasalamata sila sa Ginoo tungod sa iyang kalooy ug sa iyang katingalahang mga buhat alang sa mga anak sa mga tawo, Tungod kay iyang gitagbaw ang gipangandoy sa ilang kalag ug gibuhong ang gigutom sa mga butang nga maayo.

Pasalamati ang Ginoo, kay ang iyang gugma hangtod sa kahangtoran.

PAGBASA SA SANTOS NGA EBANGHELYO SUMALA NI SAN MATEO

Mt. 22: 34-40

Sa pagkadungog sa mga Pariseo nga ang mga Saduseo gilupig ni Jesus sa katarungan, nagpanon sila sa pagduol kaniya, ug unya usa kanila, nga magtutudlo sa Balaod, misulay pagbitik kaniya pinaagig pangutana. "Magtutudlo," nangutana siya, "Unsa man ang labing dakong sugo sa Balaod?" Si Jesus mitubag, "'Kinahanglan nga higugmaon mo ang Ginoo nga imong Dios sa tibuok mong kasingkasing, sa tibuok mong kalag, ug sa bug-os mong hunahuna.' Kini ang labing dako ug ang labing importanting sugo. Ang ikaduha nga labing importanting sugo sama sa una: 'Kinahanglan higugmaon mo ang imong isigkatawo ingon sa imong kaugalingon.' Nagsukad niining duha ka sugo ang tibuok Balaod ni Moises ug ang mga pagtulon-an sa mga propeta."