[M] San Bernardo, abad ug doktor sa Simbahan

PAGBASA GIKAN SA BASAHON NI PROPETA EZEQUIEL

Ez. 36: 23-28

Ipakita ko unsa kabalaan ug kahalangdon ang akong ngalan nga inyong gipakaulawan, aron makaila sila nga ako mao ang Ginoo, pinaagi sa akong buhaton kaninyo diha gayod sa ilang atubangan. Kay kuhaon ug tigumon ko kamo gikan sa nagkalainlaing nasod, ug dad-on ko kamo balik sa inyong yuta. Buboan ko kamong limpiyong tubig ug malimpiyo kamo sa tanan ninyong kahugawan lakip sa inyong pagkamaki-diosdios. Hatagan ko kamog bag-ong kasingkasing ug bag-ong Espiritu, ug kuhaon ko ang inyong matig-a nga kasingkasing ug ilisan ko kinig kasingkasing nga masinugtanon. Ibutang ko sa sulod ninyo ang akong espiritu ug himoon ko kamong masinugtanon sa akong mga gimbut-an ug mga lagda. Adto na kamo puyo sa yuta nga gihatag ko sa inyong katigulangan, ug mahimo na kamong akong katawhan ug ako mainyo nang Dios.

SALMO RESPONSORYO

Ps. 51: 12-13. 14-15. 18-19

Ibubo ko kaninyo ang malinis nga tubig ug hugasan ko ang tanan ninyong mga sala.

Usa ka malinis nga kasingkasing gamaa dinhi kanako, O Dios, ug usa ka makanunayong espiritu bag-oha sulod kanako. Ayaw ako isalikway sa imong atubangan, ug ayaw kuhaa gikan kanako ang imong balaang espiritu.

Ibubo ko kaninyo ang malinis nga tubig ug hugasan ko ang tanan ninyong mga sala.

Ibalik kanako ang kasadya sa imong kaluwasan, ug padayona dinhi kanako ang mauyonong espiritu. Tudloan ko ang mga malapason sa imong mga dalan, ug ang makas-asala mamalik kanimo.

Ibubo ko kaninyo ang malinis nga tubig ug hugasan ko ang tanan ninyong mga sala.

Kay dili ikaw mahimuot sa mga sakripisyo; kon maghalad ako og halad nga sinunog, dili ikaw modawat niini. Ang akong sakripisyo, O Dios, mao ang mahinulsolon nga espiritu; usa ka kasingkasing nga mahinulsolon ug mapaubsanon, O Dios, dili nimo tamayon.

Ibubo ko kaninyo ang malinis nga tubig ug hugasan ko ang tanan ninyong mga sala.

PAGBASA SA SANTOS NGA EBANGHELYO SUMALA NI SAN MATEO

Mt. 22: 1-14

Migamit na usab si Jesus og mga sambingay sa iyang pagpakigsulti sa mga tawo. "Ang Gingharian sa Langit sama sa usa ka hari nga naghikay og usa ka kombira sa kasal alang sa iyang anak nga lalaki. Gisugo niya ang iyang mga sulugoon aron pagpahibalo sa mga dinapit nga paadtoon na sila sa kombira, apan mibalibad ang mga dinapit. Busa nagsugo siyag laing mga sulugoon ug giingnan niya, 'Sultihi ninyo ang mga dinapit nga andam na ang kombira; giihaw na ang akong mga baka ug ang mga pinatambok nga nati, ug nahikay na ang tanan. Pangari na kamo sa kombira sa kasal!' Apan wala magtagad ang mga dinapit, ug nagpadayon sila sa ilang mga buluhaton: ang usa miadto sa iyang uma, ang usa sa iyang tindahan, samtang ang uban midakop sa mga sulugoon, ug gibunalan ug gipatay nila. Tungod niini nasuko pag-ayo ang hari, ug gipadala niya ang iyang mga sundalo ug gipamatay kadtong mga mamumuno, ug gisunog ang ilang siyudad. Unya gitawag niya ang iyang mga sulugoon ug giingnan, 'Andam na ang akong kombira sa kasal, apan dili angay niini ang mga tawo nga akong dinapit. Busa pangadto kamo sa kadalanan ug dapita ang tanan nga inyong makaplagan.' Ug ang mga sulugoon nangadto sa kadalanan ug gidala nila ang tanan nga ilang nakaplagan, maayo ug daotan, ug napuno sa mga tawo ang dapit nga gikombirahan." "Unya misulod ang hari aron pagtan-aw sa mga dinapit, ug nakita niya ang usa ka tawo nga wala magsul-ob og bisti sa kasal. Gipangutana siya sa hari, 'Higala, giunsa man nimo pagsulod dinhi nga wala ka man magsul-ob sa bisti sa kasal?' Apan wala motingog ang tawo. Unya miingon ang hari sa iyang mga sulugoon, 'Gapusa ninyo ang iyang mga kamut ug tiil ug ilabog siya ngadto sa kangitngit sa gawas. Didto maghilak siya ug magkagot ang iyang mga ngipon.'" Ug gitapos ni Jesus ang sambingay sa pag-ingon, "Kay daghan ang gidapit, apan diyotay ra ang gipili."