Martes sa Ikakawhaan nga Semana sa Ordinaryong Panahon

PAGBASA GIKAN SA BASAHON NI PROPETA EZEQUIEL

Ez. 28: 1-10

Nag-ingon ang Ginoo kanako, "Tawo, ingna ang pangulo sa Tiro nga nag-ingon ang Ginoong Dios:" "Garboso ka ug miingon, 'Ako usa ka dios ug naglingkod ako sa trono sa mga dios taliwala sa kadagatan,' apan tawo ka lamang, bisan tuod nagpakamaalamon ka daw dios. Nagtuo ka nga mas maalamon ka kay kang Daniel, ug nga walay butang natago gikan kanimo. Pinaagi sa imong kaalam ug salabotan, nadato ka ug nakatigom ug daghang bulawan ug plata. Pinaagi usab sa imong pagkamaayong mamatigayon, midugang kag kadato ug tungod niini nagarboso ka. "Busa nag-ingon ako, ang Ginoong Dios: kay maalamon ka man kaha daw dios, ipasulong ko ikaw sa mga langyaw, sa nasod nga bangis kaayo; bakyawon nila ang ilang espada batok sa imong kaalam aron mawagtang ang imong katahom. Itambog ka nila sa kahiladman ug mamatay ka taliwala sa kadagatan. Tan-awon ta kon moingon ka ba lang gihapon, 'Ako usa ka dios,' sa atubangan sa mopatay kanimo! Mamatay ka sama sa iro, sa kamut sa mga langyaw, nga wala motuo sa Dios. Ako, ang Ginoong Dios, naghatag sa mando."

SALMO RESPONSORYO

Dt. 32: 26-27ab. 27cd-28. 30. 35-36

Ako mao ang magpahamtang sa kamatayon ug ang mohatag sa kinabuhi.

"Moingon unta ako, 'Tapuson ko sila ug papason ko ang ilang ngalan sa handumanan sa mga tawo, kon wala pa ako mahadlok sa pangandak sa ilang mga kaaway, mahadlok nga kining mga kaaway magpasigarbo nga masaypanon.'

Ako mao ang magpahamtang sa kamatayon ug ang mohatag sa kinabuhi.

'Ang among kaugalingong kamut maoy nakapadaug; walay labot ang Ginoo niini.' Kay mga tawo sila nga walay pangisip, wala silay mga salabutan."

Ako mao ang magpahamtang sa kamatayon ug ang mohatag sa kinabuhi.

"Unsaon god pagbuntog sa usa ka tawo og usa ka libo, o pagpadagan sa duruha ka tawo og napulo ka libo, gawas nga kini tungod kay ang ilang Bato nagbaligya kanila ug ang Ginoo mitugyan kanila?"

Ako mao ang magpahamtang sa kamatayon ug ang mohatag sa kinabuhi.

Haduol na ang adlaw sa ilang kalaglagan, ug dili na madugay ang ilang kamatayon! Sa walay duhaduha, ang Ginoo magbuhat og katarong ngadto sa iyang katawhan; sa iyang mga alagad mao gayod siya.

Ako mao ang magpahamtang sa kamatayon ug ang mohatag sa kinabuhi.

PAGBASA SA SANTOS NGA EBANGHELYO SUMALA NI SAN MATEO

Mt. 19: 23-30

Unya miingon si Jesus sa iyang mga tinun-an, "Sultihan ko kamo nga malisod kaayo sa usa ka dato ang pagsulod sa Gingharian sa Langit. Sultihan ko pa kamo: mas lisod pa gayod sa usa ka dato ang pagsulod sa Gingharian sa Dios, kay sa usa ka kamelyo paglusot sa lungag sa dagom." Sa pagkadungog niini sa mga tinun-an nahibulong sila pag-ayo. Busa nangutana sila, "Nan, kinsa ra man diay ang maluwas?" Si Jesus mitutok kanila ug mitubag, "Kini dili mahimo sa tawo; apan mahimo sa Dios ang tanang butang." Unya miingon si Pedro, "Ginoo, among gibiyaan ang tanan ug misunod kami kanimo. Unsa may among mapaabot?" Si Jesus miingon kanila, "Isulti ko kini kaninyo: iniglingkod unya sa Anak sa Tawo sa iyang mahimayaong trono diha sa Bag-ong Kalibutan, kamong napulog-duha ka tinun-an molingkod usab sa mga trono aron paghukom sa napulog-duha ka banay sa Israel. Ug ang tanan nga mibiyag balay, mga igsuon, amahan, inahan, mga anak, o mga uma tungod kanako makadawat og labaw sa usa ka gatos ka pilo, ug hatagan pa gayod siyag kinabuhing dayon. Apan daghan nga karon nag-una maulahi, ug daghan nga karon naulahi mahiuna."