Lunes sa Ikakawhaan nga Semana sa Ordinaryong Panahon

PAGBASA GIKAN SA BASAHON NI PROPETA EZEQUIEL

Ez. 24: 15-24

Giingnan na usab ako sa Ginoo, "Tawo, sa dili madugay kuhaon ko gikan kanimo, sa usa ka pagpamilok, ang tawo nga gihigugma mo pag-ayo, apan dili ka magbangotan, ni mohilak, ni moagay ang imong mga luha. Panghupaw apan ayaw lamang pagkusga. Ayaw pagbangotan sa patay. Pagpurong, pagsapatos, ayaw taboni ang imong nawong, ni mokaon ka sa kan-on sa tigbangotan." Busa sa pagkabuntag gisultihan ko ang katawhan ug sa pagkagabii namatay ang akong asawa. Sa pagkasunod buntag gituman ko ang gisugo kanako. Ug miingon kanako ang katawhan, "Nganong gibuhat mo man kini?" Unya giingnan ko sila nga miingon kanako ang Ginoo, "Ingna ang katawhan sa Israel nga nag-ingon ang Ginoong Dios: Pasipalahan ko ang akong Templo nga inyong gipasigarbo ug gimahal, ug ang mga anak nga inyong gibilin mamatay sa espada. Buhaton ninyo ang akong nabuhat, ug ayaw taboni ang inyong nawong ni mokaon kamo sa kan-onon sa tigbangotan. Pagpurong kamo ug pagsapatos; ayaw pagsubo ni paghilak, apan magniwang kamo tungod sa inyong kasal-anan, ug mag-agulo ang usag-usa kaninyo. Si Ezequiel mahimong usa ka ilhanan alang kaninyo, busa buhata ang tanan nga gibuhat niya. Inigkahitabo niini, makaila kamo nga ako mao ang Ginoong Dios."

SALMO RESPONSORYO

Dt. 32: 18-19. 20. 21

Hikalimtan nimo ang Dios nga nagpahimugso kanimo.

Wala ikaw magtagad sa Bato nga nagpahimugso kanimo, hikalimtan mo ang Dios nga nag-anak kanimo, sa pagkakita sa Ginoo niini, napuno siya sa kaluod ug sa kapungot alang sa iyang mga anak nga lalaki ug babaye.

Hikalimtan nimo ang Dios nga nagpahimugso kanimo.

"Tago-on ko ang akong nawong kanila," miingon siya, "ug tan-awon ko unsay mahitabo kanila." Pagkamabalhinon nila nga kaliwat, mga anak nga mabudhion kaayo.

Hikalimtan nimo ang Dios nga nagpahimugso kanimo.

Sanglit ila akong gipalagot sa ilang "dili dios" ug gisuko ako sa ilang walay-hinungdang diosdios. Palagoton ko sila sa usa ka 'dili-katawhan', suk-on ko sila sa usa ka buang nga nasod.

Hikalimtan nimo ang Dios nga nagpahimugso kanimo.

PAGBASA SA SANTOS NGA EBANGHELYO SUMALA NI SAN MATEO

Mt. 19: 16-22

Usa niana ka higayon, may miduol kang Jesus ug nangutana kaniya, "Magtutudlo, unsa may maayo kong buhaton aron madawat ko ang kinabuhing dayon?" Si Jesus mitubag, "Nganong nangutana ka man kanako kon unsa ang maayo? Usa ray maayo, ang Dios lamang. Tumana ang mga sugo kon buot ka mosulod sa kinabuhi." Siya nangutana, "Unsang mga sugoa?" Si Jesus mitubag, "Ayaw pagpatay; ayaw panapaw; ayaw pangawat; ayaw pamakak; tahora ang imong amahan ug inahan; ug higugmaa ang imong isigkatawo ingon sa imong kaugalingon." Ang batan-on mitubag, "Gituman ko kining tanan. Unsa pa may kinahanglan kong buhaton?" Ug miingon si Jesus kaniya, "Kon buot kang mahingpit, lakaw ug ibaligya ang tanan mong katigayonan ug ihatag ang halin ngadto sa mga kabus, ug makabaton ka og mga bahandi didto sa langit; unya balik nganhi ug sunod kanako." Sa pagkadungog niini sa batan-on milakaw siya nga masulob-on kay dato man siya kaayo.