Ikakawhaan nga Domingo sa Ordinaryong Panahon

PAGBASA GIKAN SA BASAHON NI PROPETA ISAIAS

Is. 56: 1. 6-7

Nag-ingon ang Ginoo sa iyang katawhan, "Sunda ang hustisya ug buhata ang matarong, kay sa dili madugay luwason ko na kamo, ug ipaila ko ang akong katarong." "Ang mga langyaw nga miduol sa Ginoo aron pag-alagad kaniya, ug nagtamod sa Adlawng Igpapahulay ug nagtuman sa iyang mga sugo panad-on ko sa balaan kong bukid, ug lipayon ko sila didto sa akong Templo. Ang ilang mga halad-sinunog ug mga halad-inihaw dawaton ko didto sa akong halaran; kay ang akong Templo nganlan mag balay-alampoanan alang sa tanang katawhan."

SALMO RESPONSORYO

Ps. 67: 2-3. 5. 6. 8

O Dios, magadayeg unta kanimo ang tanang mga nasod.

Kaloy-an unta kita sa Dios ug bendisyonan niya; ipadan-ag unta kanato ang iyang nawong. Mahibaw-an unta ang imong dalan dinhi sa yuta; diha sa tanang mga nasod ang imong kaluwasan.

O Dios, magadayeg unta kanimo ang tanang mga nasod.

Maglipay unta ang mga nasod ug magsadya tungod kay nagamando ka sa kanasuran diha sa katarong; ang mga nasod dinhi sa yuta imong agakon.

O Dios, magadayeg unta kanimo ang tanang mga nasod.

Daygon unta ikaw sa katawhan, O Dios; ang tanang kalungsuran magdayeg unta kanimo. Panalanginan unta kita sa Dios, ug ang tanang kautlanan sa yuta mahadlok unta kaniya.

O Dios, magadayeg unta kanimo ang tanang mga nasod.

PAGBASA GIKAN SA SULAT NI SAN PABLO NGADTO SA TAGA-ROMA

Rom. 11: 13-15. 29-32

Karon, bahin kaninyong mga dili Judio: ipasigarbo ko ang akong buluhaton ingon nga apostol ako sa mga dili Judio, aron masina ang akong isigka-Judio ug maluwas ko ang pipila kanila. Kon sa dihang gisalikway sila, ang kalibutan napasig-uli ngadto sa Dios, unsa pa kaha kon dawaton sila? Kinabuhi alang sa mga patay! Kay dili gayod mag-usab-usab ang Dios sa iyang hunahuna labot sa iyang pilion ug panalanginan. Kamong mga dili Judio misupil sa Dios kaniadto, apan karon gikaluy-an kamo sa Dios tungod kay misupil man ang mga Judio. Sa maong pagkaagi, tungod sa kaluoy nga nadawat ninyo, ang mga Judio misupil sa Dios aron sila usab makadawat sa kaluoy sa Dios. Kay gihimo sa Dios ang tanang mga tawo nga masupilon aron ikapakita niya ang iyang kaluoy kanilang tanan.

PAGBASA SA SANTOS NGA EBANGHELYO SUMALA NI SAN MATEO

Mt. 15: 21-28

Mibiya si Jesus niadtong dapita ug miadto sa kayutaan duol sa mga siyudad sa Tiro ug sa Sidon. Usa ka babaye nga taga-Canaan, nga nagpuyo niadtong dapita, miduol kaniya ug mituwaw, "Sir, Anak ni David, kaloy-i intawon ako! Ang anak kong babaye giyawaan ug nag-antus pag-ayo." Apan wala motubag si Jesus. Miduol ang iyang mga tinun-an kaniya ug miingon, "Papahawaa siya kay nag-sunodsunod siya kanato ug saba kaayo!" Unya mitubag si Jesus, "Gipadala ako ngadto lamang sa nawalang mga karnero sa nasod sa Israel." Apan miduol ang babaye ug miluhod sa atubangan ni Jesus. "Sir, tabangi intawon ako!" miingon siya. Si Jesus mitubag, "Dili maayo nga kuhaon ang kalan-on sa mga anak ug ipakaon sa mga iro." Ang babaye mitubag, "Tinuod kana, Sir, apan bisan gani ang mga iro makakaon man sa mga mumho nga mahulog gikan sa lamesa sa agalon." Ug si Jesus mitubag kaniya, "Inday, pagkadako sa imong pagsalig! Matuman ang imong gihangyo." Ug niadto dayong gutloa naayo ang iyang anak.