[S] Ang Pagpasaka sa Bulahang Birhen Maria

PAGBASA GIKAN SA BASAHON SA ANG GIPADAYAG

Rv. 11: 19; 12: 1-6. 10

Unya naabli ang templo sa langit, ug nakita sa sulod niini ang Sudlanan sa Kasabotan sa Dios. Unya may kilat, kagahob, dalugdog, linog ug mibunok ang yelo. Unya nagpakita ang usa ka dakong tilimad-on didto sa langit: may usa ka babaye nga nagbistig adlaw ug nagtunob sa bulan, ug gikoronahan siyag napulog-duha ka bitoon. Hapit na siya moanak ug nagtiyabaw siya sa kasakit. Laing tilimad-on nagpakita didto sa langit. May dakong dragon nga pula nga may pito ka ulo, napulo ka sungay, ug may korona ang matag ulo niini. Gikahig niya sa iyang ikog ang ikatulong bahin sa mga bitoon sa langit ug gitambog ngadto sa yuta. Mibarog siya sa atubangan sa babayeng hapit na manganak aron tukbon niya ang bata nga mahimugso. Unya gianak sa babaye ang usa ka batang lalaki nga maghari sa kanasuran sa paagi nga higpit kaayo. Apan gisakmit ang bata ug gidala ngadto sa Dios ug sa iyang trono. Mikagiw ang babaye ngadto sa kamingawan diin ang Dios nag-andam kaniya og dapit, ug did didto atimanon siya sulod sa usa ka libo ug duha ka gatos ug kan-uman ka adlaw. Unya nadungog ko ang singgit gikan sa langit nga nag-ingon, "Ania na gayod ang kaluwasan gikan sa Dios! Gipadayag na gayod sa Dios ang gahom niya ingon nga Hari, ug gipakita na sa Mesiyas ang iyang awtoridad! Kay ang tigsumbong sa atong mga kaigsuonan nga nagbarog sa atubangan sa Dios ug nagsumbong kanila adlaw ug gabii, gihinginlan na gikan sa langit."

SALMO RESPONSORYO

Ps. 45: 10. 11. 12. 16

Nagabarog ang Rayna diha sa imong tuo, dinayanan og bulawan.

Ang rayna nagapahiluna sa imong tuo diha sa bulawan sa Ophir.

Nagabarog ang Rayna diha sa imong tuo, dinayanan og bulawan.

Pamati, O anak nga babaye, ug tan-awa; ipaabong ang imong dunggan; hikalimti ang imong lungsod ug ang balay sa imong amahan.

Nagabarog ang Rayna diha sa imong tuo, dinayanan og bulawan.

Busa tinguhaon sa hari ang imong kaanyag; kay siya man ang imong Ginoo.

Nagabarog ang Rayna diha sa imong tuo, dinayanan og bulawan.

Gidala sila sa sulod uban sa kalipay ug kasadya; nanulod sila sa palasyo sa hari.

Nagabarog ang Rayna diha sa imong tuo, dinayanan og bulawan.

PAGBASA GIKAN SA UNANG SULAT NI SAN PABLO NGADTO SA TAGA-CORINTO

1 Cor. 15: 20-26

Apan ang tinuod mao nga gibanhaw si Cristo, ingon nga pasalig nga kadtong nangamatay banhawon usab. Kay ingon nga miabot ang kamatayon pinaagi sa usa ka tawo, moabot usab ang pagkabanhaw pinaagi sa usa ka tawo. Kay ingon nga nangamatay ang tanang mga tawo tungod sa ilang pagkahiusa kang Adan, banhawon usab ang tanan tungod sa ilang pagkahiusa kang Cristo. Apan ang matag usa anaa sa iyang husto nga dapit: si Cristo maoy una sa tanan, unya mosunod kadtong iya ni Cristo inig-abot na niya. Unya moabot ang katapusan ug buntogon ni Cristo ang tanang pangulo nga espirituhanon, mga awtoridad, mga kagamhanan, ug itugyan niya ang Gingharian ngadto sa Dios nga Amahan. Kay kinahanglan maghari si Cristo hangtod mabuntog sa Dios ang tanan niyang mga kaaway ug himoon sila nga tumbanan sa iyang mga tiil. Ang katapusang kaaway nga buntogon mao ang kamatayon.

PAGBASA SA SANTOS NGA EBANGHELYO SUMALA NI SAN LUKAS

Lk. 1: 39-56

Wala madugay, nangandam si Maria ug midali pag-adto sa kabungtoran, ngadto sa usa ka lungsod sa Judea. Miadto siya sa balay ni Zacarias ug nangumosta kang Isabel. Sa pagkabati ni Isabel sa pangumosta ni Maria, milihok ang bata sulod sa iyang tiyan. Unya napuno sa Espiritu Santo si Isabel, ug misulti sa makusog, "Bulahan ka sa tanang mga babaye! Bulahan ang bata nga imong ianak! Ngano kaha nga miduaw man kanako ang inahan sa akong Ginoo? Kay pagkadungog ko gayod sa imong pangumosta miulpot sa kalipay ang bata nga akong gisabak. Bulahan ka nga mituo nga matuman gayod ang mensahe sa Ginoo kanimo." Unya miingon si Maria, "Nagdayeg ang akong kasingkasing sa Ginoo, ug nagmalipayon ang akong kalag tungod sa Dios nga akong Manluluwas. Tungod kay nahinumdom siya kanako, nga iyang ubos nga sulugoon! Ug sukad karon ang tanang tawo motawag kanakog bulahan, tungod sa mga dagkong butang nga gihimo kanako sa Gamhanang Dios. Balaan ang iyang ngalan; Nagpakita siyag kaluoy sa tanan nga may kahadlok kaniya, gikan sa usa ka kaliwatan ngadto sa laing kaliwatan. Gibakyaw niya ang iyang bukton nga gamhanan ug gipatibulaag ang mga tawo nga mapahitas-on uban sa tanan nilang laraw. Gipukan niya ang mga hari nga gamhanan gikan sa ilang mga trono, ug gituboy ang mga mapaubsanon. Gibusog niya sa mga maayong butang ang mga gigutom, ug iyang gipapahawa nga walay dala ang mga dato. Gituman niya ang iyang gisaad sa atong mga katigulangan; Mitabang siya kang Israel nga iyang sulugoon, ug nahinumdom siya pagpakitag kaluoy kang Abraham ug sa tanan niyang mga kaliwat hangtod sa kahangturan!" Mipuyo si Maria og mga tulo ka bulan uban kang Isabel, ug unya mipauli sila.