[S] Bihilya sa Pagpasaka sa Bulahang Birhen Maria

PAGBASA GIKAN SA UNANG BASAHON SA CRONICAS

1 Chr. 15: 3-4. 15-16; 16: 1-2

Unya gitigom ni David ang tibuok Israel didto sa Jerusalem aron dad-on ang Sudlanan sa Kasabotan sa Dios ngadto sa dapit nga giandam niya alang niini. Gitigom niya ang mga anak ni Aaron ug ang mga sakop sa banay ni Levi. Giyayongan sa mga Levita ang Sudlanan sumala sa mando sa Ginoo pinaagi kang Moises. Gimandoan usab ni David ang mga pangulong Levita sa pagpilig mga sakop sa ilang banay ingon nga mga musikero ug motugtog sa mga alpa, lira ug piyangpiyang sa mga honi sa kalipay. Gidala ug gipahimutang nila ang Sudlanan sa Kasabotan sa Dios sulod sa tolda nga giandam ni David alang niini, ug nagsunog silag mga halad nga mananap ug mga halad sa pakigdait ngadto sa Dios. Ug human kini ikahalad ni David, gipanghatagan niya silang tanan og tagsa ka buok pan, karne ug pasas.

SALMO RESPONSORYO

Ps. 132: 6-7. 9-10. 13-14

Ginoo, tungas sa dapit nga imong pahulayanan, ikaw ug ang arka sa imong kasantos.

Ania, nakadungog kami niini didto sa Efrata; hikaplagan namo kini sa kaumahan sa Jaar. Manulod kita ngadto sa iyang puloy-anan, manimba kita diha sa tumbanan sa iyang mga tiil.

Ginoo, tungas sa dapit nga imong pahulayanan, ikaw ug ang arka sa imong kasantos.

Magsul-ob unta og katarong ang imong kaparian; magsinggit unta sa kalipay ang mga nagtuo kanimo. Tungod kang David imong sulugoon, ayaw isalikway ang pangaliya sa imong dinihogan.

Ginoo, tungas sa dapit nga imong pahulayanan, ikaw ug ang arka sa imong kasantos.

Kay ang Ginoo nagpili sa Sion; gipalabi niya siya aron maoy iyang puy-an. "Ang Sion maoy akong pahulayanan sa kahangturan; diha kaniya ako magpuyo, kay gipalabi ko man siya."

Ginoo, tungas sa dapit nga imong pahulayanan, ikaw ug ang arka sa imong kasantos.

PAGBASA GIKAN SA UNANG SULAT NI SAN PABLO NGADTO SA TAGA-CORINTO

1 Cor. 15: 54-57

Kon ang madunot masul-oban na sa dili madunot, ug kon ang mamatay masul-oban na sa dili mamatay, matuman ang Kasulatan nga nag-ingon: "Gilaglag ang kamatayon ug hingpit na ang kadaugan!" "O Kamatayon, hain na ba ang imong kadaugan? O Kamatayon, hain na ang imong kalala?" Ang kalala sa kamatayon naggikan sa sala, ug ang gahom sa sala naggikan sa Balaod. Apan salamat sa Dios nga naghatag kanatog kadaugan pinaagi sa atong Ginoong JesuCristo!

PAGBASA SA SANTOS NGA EBANGHELYO SUMALA NI SAN LUKAS

Lk. 11: 27-28

Human makasulti si Jesus niini, may usa ka babaye nga mituwaw taliwala sa pundok sa mga tawo ug miingon kaniya, "Bulahan ang babaye nga maoy nagsabak ug nagpasuso kanimo!" Apan si Jesus mitubag, "Bulahan hinoon sila nga namati sa pulong sa Dios ug nagtuman niini!"