[M] San Maximiliano Kolbe, pari ug martir

PAGBASA GIKAN SA BASAHON NI PROPETA EZEQUIEL

Ez. 16: 1-15. 60. 63 (TINAAS)

Miingon na usab kanako ang Ginoo, "Tawo, ibutyag sa Jerusalem ang iyang mga salawayong buhat." "Ingna siya nga ang Ginoong Dios nag-ingon, 'Gikan ka sa yuta sa Canaan; ang imong amahan Amorihanon ug ang imong inahan Hitihanon. Ug sa imong pagkahimugso walay miputol sa imong pusod ni may midigo kanimo, ni gihaplasan kag asin, ni giputos kag mga hapin. Wala gayoy naluoy kanimo walay mihimo sa usa niini nganha kanimo; hinonoa, gilabay ka hinuon sa uma, kay gikasilagan ka man sukad sa adlaw sa imong pagkahimugso." "Ug sa dihang miagi ako duol kanimo, nakita ko ikaw nga naglunang sa kaugalingon mong dugo, ug giingnan ko ikaw nga mabuhi ka, ug motubo sama sa usa ka tanom sa uma. Mitubo ug midako ka ug nahimong dalaga; maayong pagkaporma ang imong suso, mitag-as ang imong buhok, apan nagpabilin kang hubo." "Sa pag-agi ko pag-usab duol kanimo, nakita ko ikaw nga andam na sa kaminyoon, busa gibukhad ko ang akong kupo ug gitabonan ko ang imong pagkahubo. Nanumpa ako kanimo ug naghimong kasabutan uban kanimo ug nahimo ikaw nga akoa," nag-ingon ang Ginoong Dios. "Unya gidigo ko ikaw ug gihinloan ang dugo nga diha sa imong lawas, ug gidihogan kag lana. Unya gisul-oban ko ikaw og bisti nga binordahan ug gisapatosan kag panit nga humok ug gipurongan ko ang imong ulo og pinong lino ug gisul-oban og sidang panapton. Ug gidayan-dayanan ko ikaw og mga alahas, gisul-oban og pulseras ug gikwentasan. Unya gitaoran kog singsing ang imong ilong ug gibutangag ariyos ang imong dalunggan, ug gikoronahan kag matahom nga korona. Sa ingon niana gidayan-dayanan kag bulawan ug plata, ug ang imong bisti pinong lino, seda, ug panapton nga binordahan; ang imong kalan-on labing maayong harina, dugos ug lana. Nahimo kang matahom kaayo daw rayna. Ang imong katahom nga hingpit mikaylap sa kanasuran tungod kay gihatag ko man kanimo ang imong katahom," nag-ingon ang Ginoong Dios. "Apan gihimo mong puhonan ang imong katahom, ug nahimo kang dautan nga babaye tungod niini, ug gidani mo sa imong pagkabigaon ang mga lumalabay." "Apan hinumdoman ko ang akong kasabutan uban kanimo sa batan-on ka pa ug himoon ko uban kanimo ang usa ka kasabutan nga walay katapusan." "Ug sa ingon, mahinumdom ka ug maulaw, ug dili ka na gayod mosulti pag-usab tungod sa imong kaulaw, inigpasaylo ko sa tanan mong nabuhat," nag-ingon ang Ginoong Dios.

PAGBASA GIKAN SA BASAHON NI PROPETA EZEQUIEL

Ez. 16: 59-63 (MINUBO)

Ang Ginoong Dios nag-ingon, "Silotan ko ikaw sumala sa angay kanimo kay gilapas mo man ang imong panumpa ug mga saad. Apan hinumdoman ko ang akong kasabotan uban kanimo sa batan-on ka pa ug himoon ko uban kanimo ang usa ka kasabotan nga walay kataposan. Unya hinumdoman mo ang imong mga nabuhat ug maulaw ka unya inigdala ko sa imong mga igsoong babaye, ang imong magulang ug ang imong manghod, ug ihatag ko sila kanimo ingon nga imong mga anak bisan tuod ug dili kini apil sa kasabotan nato. Bag-ohon ko ang atong kasabotan ug masayran mo nga ako mao ang Ginoo. Ug sa ingon, mahinumdom ka ug maulaw ug dili ka na gayod mosulti pag-usab tungod sa imong kaulaw inigpasaylo nako sa tanan nimong nabuhat."

SALMO RESPONSORYO

Is. 12: 2-3. 4. 5-6

Nahupay ang imong kasuko, aron paglipay kanako.

Sa tinuoray ang Dios mao ang akong manluluwas; masaligon ako ug wala akoy kahadlok. Ang akong kusog ug akong kaisog mao ang Ginoo, ug siya mao ang akong manluluwas. Magkawos kamo nga malipayon gikan sa tubod sa kaluwasan.

Nahupay ang imong kasuko, aron paglipay kanako.

Pagpasalamat kamo sa Ginoo, isangyaw ang iyang ngalan; taliwala sa kanasuran ipahibalo ang iyang mga binuhatan, isangyaw unsa kahalangdon ang iyang ngalan.

Nahupay ang imong kasuko, aron paglipay kanako.

Awitig pagdayeg ang Ginoo tungod sa iyang mahimayaong mga buhat ipahibalo kini ngadto sa tibuok kalibutan. Singgit kamo nga malipayon, O Siyudad sa Sion. Kay halangdon diha sa imong taliwala anaa ang Santos sa Israel.

Nahupay ang imong kasuko, aron paglipay kanako.

PAGBASA SA SANTOS NGA EBANGHELYO SUMALA NI SAN MATEO

Mt. 19: 3-12

Pipila ka Pariseo miduol ug misulay pagbitik kaniya pinaagi sa pagpangutana, "Nagtugot ba ang atong Balaod nga ang bana makabulag sa iyang asawa sa bisan unsang hinungdan?" Si Jesus mitubag, "Wala ba kamo makabasa niining bahina sa Kasulatan? Sa sinugdan ang Dios naghimo kanila nga lalaki ug babaye, ug miingon, 'Tungod niini ang lalaki mobiya sa iyang amahan ug inahan ug motipon sa iyang asawa, ug silang duha mahimong usa.' Busa dili na sila duha, kondili usa lamang. Tungod niini kinahanglan nga dili bulagon sa tawo ang gihiusa sa Dios." Ang mga Pariseo nangutana kaniya, "Kon mao kana, nganong nagtugot man si Moises nga ang bana mosulat sa iyang asawa og pahibalo sa pakigbulag ug siya makabulag na kaniya?" Si Jesus mitubag, "Mitugot si Moises kaninyo sa pagbulag sa inyong asawa kay kamo gahi mag-ulo. Apan dili gayod kini mao sa sinugdan. Busa sultihan ko kamo nga bisag kinsa ang mobulag sa iyang asawa nga wala magluib kaniya, makapanapaw kon siya magminyog lain." Ang iyang mga tinun-an miingon kaniya, "Kon mao kini ang mahitabo tali sa bana ug asawa, maayo pag dili nalang magminyo." Si Jesus mitubag, "Kining maong pagtulon-an dili alang sa tanan, kondili alang lamang niadtong gihatagan sa Dios niini. Kay may nagkalainlaing mga katarungan nganong dili makaminyo ang ubang mga tawo: may dili gayod makahimo pagminyo kay natawo nga kapon nang daan; ang uban dili maka-minyo kay gikapnan man sila sa mga tawo; ug ang uban dili makaminyo tungod sa Gingharian sa Langit. Siya nga makahimo, padawata niining akong gitudlo."