Huwebes sa Ikanapulo'g Siyam nga Semana sa Ordinaryong Panahon

PAGBASA GIKAN SA BASAHON NI EZEQUIEL

Ez. 12: 1-2

Giingnan ako sa Ginoo, "Tawo, nagpuyo ka tipon sa katawhan nga masupilon. May mata sila, apan dili makakita; may dalunggan, apan dili makadungog, kay masupilon man sila."

SALMO RESPONSORYO

Ps. 78: 56-57. 58-59. 61-62

Ayaw hikalimti ang mga buhat sa Ginoo.

Gisulay nila ug misukol sila batok sa Dios nga Labing Halangdon, ug wala nila ampingi ang iyang kasugoan. Mitalikod sila ug wala magtuman sama sa ilang katigulangan; misumbalik sila samag mabudhiong gapasan.

Ayaw hikalimti ang mga buhat sa Ginoo.

Gisuko nila siya sa ilang tag-as nga halaranan ug sa ilang mga diosdios gihaling nila ang iyang pagpanibubho. Ang Dios nakadungog ug napungot ug gisalikway pag-ayo ang Israel.

Ayaw hikalimti ang mga buhat sa Ginoo.

Iyang gitahan ang iyang kusog aron mabihag, ang iyang himaya ngadto sa mga kamut sa kaaway. Gibiyaan niya ang iyang katawhan aron laglagon ug napungot siya batok sa iyang kabilin.

Ayaw hikalimti ang mga buhat sa Ginoo.

PAGBASA SA SANTOS NGA EBANGHELYO SUMALA NI SAN MATEO

Mt. 18: 21-19: 1

Unya miduol si Pedro kang Jesus ug nangutana, "Ginoo, makapila ba makasala kanako ang akong isigkatawo ug ako gihapon siyang pasayluon? Makapito ba?" Si Jesus mitubag, "Dili kay makapito ra, kondili kapitoan ka pito. Kay ang Gingharian sa langit sama man sa usa ka hari nga nakighusay sa mga utang sa iyang mga sulugoon. Sa diha nga nagsugod siya paghusay, gidala ngadto kaniya ang usa ka sulugoon nga nakautang kaniyag milyon ka pisos. Ug tungod kay wala man siyay igong ikabayad sa iyang utang, misugo ang iyang agalon nga ibaligya siya ingon nga usa ka ulipon, lakip ang iyang asawa ug ang iyang mga anak ug ang tanan nga iyaha, aron makabayad siya sa utang. Miluhod ang sulugoon atubangan sa iyang agalon, ug nagpakiluoy nga nag-ingon, 'Sir, ayaw intawon ako apikiha, kay bayran ko ra ikaw sa tanan!' Naluoy kaniya ang agalon, busa gipapas niya ang utang sa sulugoon ug iyang gipalakaw." "Milakaw ang tawo ug gikasugat niya ang usa sa iyang mga kaubang sulugoon nga nakautang kaniyag pipila lamang ka pisos. Gilabni dayon niya ug gituok, ug giingnan, 'Bayri na ko sa imong utang!' Ang iyang kaubang sulugoon miluhod ug nagpakiluoy kaniya sa pag-ingon, 'Ayaw intawon ako apikiha kay bayran ko ra ikaw!' Apan wala siya mosugot; hinonoa, gipapriso niya hangtod nga makabayad sa utang. Sa pagkakita sa ubang sulugoon sa nahitabo, nasubo sila pag-ayo, ug nangadto sila sa ilang agalon ug siya gisuginlan nila sa tanan. Busa gipatawag sa agalon ang sulugoon ug giingnan, 'Banyaga ka! Gipapas ko ang tanan mong utang kay nagpakiluoy ka man kanako. Angay ka untang maluoy sa imong isigkasulugoon, ingon nga ako naluoy kanimo.' Nasuko pag-ayo ang agalon, ug gipapriso niya ang sulugoon aron silotan hangtod nga makabayad siya sa tanang utang." Ug gitapos ni Jesus ang sambingay sa pag-ingon, "Ingon usab niana ang buhaton kaninyo sa akong Amahan nga atua sa langit kondili kamo mopasaylo sa inyong isigkatawo sa kinasingkasing gayod." Tapos si Jesus makasulti niining mga butanga, mibiya siya sa Galilea ug miadto sa Judea, tabok sa Suba sa Jordan.