Miyerkoles sa Ikanapulo'g Siyam nga Semana sa Ordinaryong Panahon

PAGBASA GIKAN SA BASAHON NI PROPETA EZEQUIEL

Ez. 9: 1-7; 10: 18-22

Unya misinggit ang Dios, "Duol kamong mga manlalaglag sa siyudad ug dad-a ang inyong hinagiban sa paglaglag." Ug dihay unom ka tawo nga miduol gikan sa ganghaan didto sa ganghaan sa Templo nga nag-atubang sa amihanan. Nagdala silag hinagiban sa pagpatay ug kuyog kanila ang usa ka tawo nga nagbistig lino, ug nagdalag sulatanan. Unya nanulod sila ug mibarog tupad sa halaran nga tumbaga. Niining higayona ang himaya sa Dios sa Israel nga diha sa kerubin mikayab ngadto sa pultahan sa balay. Unya gitawag niya ang tawo nga nagbistig lino ug nagdalag sulatanan, ug giingnan siya sa Ginoo, "Suroy sa siyudad sa Jerusalem ug butangig patik ang agtang sa tanan nga naghupaw ug nag-agulo tungod sa mga ngilngig nga buhat nga gihimo sa mga molupyo niini." Giingnan usab niya ang uban, "Sunod kamo kaniya ug pamatya ninyo sa walay kukaluoy ang mga molupyo sa siyudad. Pamatya ang mga tigulang ug ang mga batan-on ingon man ang kabataan ug kababaye-an, apan ayaw ilakip pagpatay kadtong may patik sa ilang agtang. Sugdi ninyo kini paghimo didto sa akong Templo." Busa giuna nila pagpamatay ang kadagkoan nga didto sa Templo. Unya giingnan sila sa Dios, "Lakaw na kamo; hugawhugawi ninyo ang Templo ug lukpa ninyo ang mga hawanan sa inyong mga pinatay." Busa nanlakaw sila ug gipamatay ang mga molupyo sa siyudad. Unya gikan sa pultahan sa Templo, ang himaya sa Ginoo miadto sa ibabaw sa mga kerubin ug mipabilin didto. Ang mga kerubin milupad uban sa ilang mga ligid, ug mibarog sila sa pultahan sa ganghaan sa Templo sa Ginoo. Kining maong ganghaan diha dapit sa sidlakan. Diha sa ibabaw sa mga kerubin ang himaya sa Dios sa Israel. Mao kini ang mga mananap nga akong nakita didto sa daplin sa Suba sa Sebar, nga nagyayong sa Dios sa Israel nga naglingkod sa iyang trono. May upat ka nawong ang matag usa kanila ug upat usab ka pako, ug daw kamut sa tawo ang ilang kamut nga diha ilalom sa ilang mga pako. Ang ilang mga nawong mao gayod ang mga nawong nga akong nakita didto sa daplin sa Suba sa Sebar. Silang tanan mipanaw sa walay likoliko.

SALMO RESPONSORYO

Ps. 113: 1-2. 3-4. 5-6

Ang himaya sa Ginoo labing taas kay sa kapanganuran.

Aleluya.

Dayga ninyo, kamong mga sulugoon sa Ginoo, dayga ang ngalan sa Ginoo. Daygon unta ang ngalan sa Ginoo karon ug hangtod sa kahangturan.

Ang himaya sa Ginoo labing taas kay sa kapanganuran.

Aleluya.

Gikan sa pagsubang hangtod sa pagsalop sa adlaw daygon unta ang ngalan sa Ginoo. Labaw sa tanang kanasuran mao ang Ginoo; labaw sa kalangitan ang iyang himaya.

Ang himaya sa Ginoo labing taas kay sa kapanganuran.

Aleluya.

Kinsay sama sa Ginoo nga atong Dios, nga naglingkod sa trono sa kahitas-an ug nagadung-aw gikan sa langit ug sa yuta nga anaa sa ubos?

Ang himaya sa Ginoo labing taas kay sa kapanganuran.

Aleluya.

PAGBASA SA SANTOS NGA EBANGHELYO SUMALA NI SAN MATEO

Mt. 18: 15-20

Si Jesus miingon sa iyang mga tinun-an: "Kon ang imong igsuon makasala kanimo, adtoa siya ug pakit-a siya sa iyang sayop. Apan himoa kini nga kamo rang duha. Kon mamati siya kanimo, magkauli ang inyong maayong kabubut-on. Apan kon siya dili mamati kanimo, pagdalag usa o duha ka tawo, aron 'ang matag sumbong kapamatud-an sa duha o tulo ka saksi,' sumala sa giingon sa Kasulatan. Ug kondili gayod siya mamati kanila, isulti ang tanan ngadto sa simbahan. Ug kondili siya mamati sa simbahan, isipa siya nga usa ka langyaw o kobrador sa buhis." "Ug busa sultihan ko kamo: ang inyong idili dinhi sa yuta, idili usab didto sa langit, ug ang inyong itugot dinhi sa yuta, itugot usab didto sa langit." "Ug sultihan ko pa gayod kamo: Kon duha kaninyo dinhi sa yuta magkauyon pagpangayo bisag, unsang butanga, kini ihatag kaninyo sa akong Amahan nga atua sa langit. Kay kon may duha kon tulo nga magkatigom sa akong ngalan, atua ako uban kanila."