[M] Santa Clara, birhen

PAGBASA GIKAN SA BASAHON NI PROPETA EZEQUIEL

Ez. 2: 8-3: 4

Ang Ginoo miingon kanako, "Apan ikaw, tawo, ayaw pagmasupilon sama kanila; bukha ang imong ba-ba ug kan-a ang ihatag ko kanimo." Unya dihay kamut nga gituy-od ngari kanako ug may gikuptan kining linukot nga basahon. Gibukhad niya kini sa akong atubangan ug may sulat kini sa luyogluyo; ang nahisulat niini bahin sa pagbangotan ug kagul-anan. Unya miingon ang Dios kanako, "Tawo, kan-a kining basahon ug lakaw ug sultihi ang katawhan sa Israel." Busa ginganga ko ang akong ba-ba ug gihatag niya kanako ang basahon. Ug miingon siya, "Tawo, kan-a kini aron mabusog ka." Busa gikaon ko kini ug sama kini katam-is sa dugos. Unya miingon na usab siya kaanko, "Tawo, lakaw ngadto sa katawhan sa Israel ug sultihi sila sa akong mga pulong."

SALMO RESPONSORYO

Ps. 119: 14. 24. 72. 103. 111. 131

Katam-is tagamtamon sa imong saad.

Sa paagi sa imong mga gimbut-an nalipay ako, ingon og diha sa tanang mga bahandi.

Katam-is tagamtamon sa imong saad.

Oo, ang imong mga sugo mao ang akong kalipay sila ang akong mga magtatambag.

Katam-is tagamtamon sa imong saad.

Ang Balaod sa imong ba-ba mas bililhon alang kanako kay sa linibo nga bulawan ug plata.

Katam-is tagamtamon sa imong saad.

Katam-is nga tagamtamon sa imong mga saad, mas matam-is kay sa dugos alang sa akong ba-ba.

Katam-is tagamtamon sa imong saad.

Ang imong mga sugo maoy akong sulondon hangtod sa kahangtoran; sila ang kalipay sa akong kasingkasing.

Katam-is tagamtamon sa imong saad.

Nag-hingahinga ako sa kahidlaw alang sa imong mga sugo.

Katam-is tagamtamon sa imong saad.

PAGBASA SA SANTOS NGA EBANGHELYO SUMALA NI SAN MATEO

Mt. 18: 1-5. 10. 12-14

Niadtong higayona ang mga tinun-an nangadto kang Jesus ug nangutana: "Kinsa man ang labing dako sa Gingharian sa langit?" Si Jesus mitawag og usa ka bata ug gipatindog niya sa atubangan nila, ug miingon siya: "Hinumdomi kini: gawas kon mausab kamo ug mahimong sama sa mga bata, dili gayod kamo makasulod sa Gingharian sa langit. Ang labing dako sa Gingharian sa langit mao ang magpaubos sa iyang kaugalingon ug magpakasama niining bata. Ug ang magadawat og usa ka bata nga sama niini sa akong ngalan, magdawat kanako." "Matngoni ninyo nga dili kamo magtamay bisag usa niining mga gagmayng bata. Kay sultihan ko kamo nga ang ilang mga anghel atua kanunay sa atubangan sa akong Amahan didto sa langit." "Sa inyong hunahuna, unsa may buhaton sa usa ka tawo kon kawad-an siyag usa sa iyang usa ka gatos ka karnero? Iya gayong biyaan ang kasiyaman ug siyam nga manibsib didto sa bungtod ug molakaw siya aron pagpangita sa nawala. Sultihan ko kamo nga inigkakaplag niya niini, mas malipay pa siya pag-ayo tungod niining karneroha kay sa kasiyamag-siyam nga wala mawala. Sa mao nga pagkaagi, ang inyong Amahan nga atua sa langit dili buot nga may mawala bisag usa niining mga gagmayng bata."