Ikanapulo'g Siyam nga Domingo sa Ordinaryong Panahon

PAGBASA GIKAN SA UNANG BASAHON SA MGA HARI

1 Kgs. 19: 9. 11-13

Miabot si Elias sa usa ka langob ug mipuyo siya didto; ug giingnan siya sa Ginoo, "Unsay gibuhat mo dinhi, Elias?" Ang Ginoo miingon, "Lakaw ug barog sa tumoy sa bukid atubangan sa Ginoo." Unya miagi ang Ginoo, ug may kusog nga hangin nga mihapak sa kabukiran, ug nangatipak ang mga bato, apan ang Ginoo wala diha sa hangin. Ug human sa hangin, miabot ang linog, apan ang Ginoo wala diha sa linog. Human sa linog, misunod ang kalayo, apan ang Ginoo wala diha sa kalayo; ug human sa kalayo may hinay ug malumong tingog. Sa pagkabati niini ni Elias, gitabonan niya ang iyang nawong sa iyang bisti ug migawas siya ug mibarog sa agianan sa langob. Ug may tingog nga miingon kaniya, "Unsay gibuhat mo dinhi, Elias?"

SALMO RESPONSORYO

Ps. 85: 9. 10. 11-12. 13-14

Ginoo, patan-awa kami sa imong kaayo, ug ihatag kanamo ang imong kaluwasan.

Pamati-on ko ang gisangyaw sa Dios; sa Ginoo-kay nagsangyaw siya sa kalinaw. Haduol gayod ang iyang kaluwasan kanila nga mahadlokon kaniya, ang himaya nagapuyo sa atong yuta.

Ginoo, patan-awa kami sa imong kaayo, ug ihatag kanamo ang imong kaluwasan.

Ang kaluoy ug ang kamatuoran magatagbo; ang katarong ug kalinaw maghagkanay. Ang kamatuoran mogitib gikan sa yuta, ug ang katarong modung-aw gikan sa langit.

Ginoo, patan-awa kami sa imong kaayo, ug ihatag kanamo ang imong kaluwasan.

Ang Ginoo mohatag sa iyang mga kaayohan; ug ang atong yuta mohatag sa iyang abot. Ang katarong maglakaw sa iyang atubangan, ug ang kaluwasan diha sa iyang pagaagian.

Ginoo, patan-awa kami sa imong kaayo, ug ihatag kanamo ang imong kaluwasan.

PAGBASA GIKAN SA SULAT NI SAN PABLO NGADTO SA TAGA-ROMA

Rom. 9: 1-5

Mga igsuon: Matuod ang giingon ko nga iya ako ni Cristo ug wala ako mamakak. Ang akong konsiyensya nga gilamdagan sa Espiritu Santo maoy akong saksi nga wala ako magbakak. Gibati ko ang hilabihang kasubo ug kaguol nga walay hunong alang sa akong isigka-Judio nga kabanay ug mga kadugo ko. Tungod kanila palabihon ko nga tunglohon ako sa Dios ug mahimulag kang Cristo. Sila mao ang piniling katawhan sa Dios; gisagop sila ingon nga mga anak sa Dios ug gipaambit sa iyang himaya; ug naghimo siyag mga kasabutan uban kanila ug gihatagan sila sa Balaod. Ila ang matuod nga pagsimba, ug nakadawat sila sa mga saad sa Dios. Kaliwat sila sa mga patriyarka, ug sa ilang kaliwatan natawo si Cristo. Ang Dios nga labaw sa tanan daygon unta hangtod sa kahangturan! Amen.

PAGBASA SA SANTOS NGA EBANGHELYO SUMALA NI SAN MATEO

Mt. 14: 22-33

Unya gipasakay ni Jesus ang mga tinun-an sa sakayan ug gipauna niya ngadto sa tabok sa lanaw, ug iyang gipalakaw ang mga tawo. Tapus niya palakta ang mga tawo, mitungas siya nga nag-inusara sa usa ka bungtod aron pag-ampo. Ug sa pagkagabii na, si Jesus nag-inusara didto. Niadtong tungora ang sakayan didto na sa lawod, gikusokuso sa mga balod, kay ang hangin sungsungon man. Sa may mga alas tres sa kaadlawon, si Jesus miadto kanila nga naglakaw sa tubig. Sa pagkakita sa mga tinun-an kaniya nga naglakaw sa tubig, nangahadlok sila pag-ayo. "Anaay mutlo!" miingon sila, ug naniyagit sila sa kalisang. Si Jesus miingon kanila, "Ayaw kamo kahadlok! Ako kini!" Unya si Pedro miingon, "Ginoo, kon ikaw kana, palakta ako sa tubig nganha kanimo." "Dali ngari," mitubag si Jesus. Busa mikawas si Pedro sa sakayan ug milakaw sa tubig ngadto kang Jesus. Apan sa pagkamatikod niya sa hangin, nahadlok siya ug misugod pagkaunlod. "Ginoo, luwasa ako!" misinggit siya. Dihadiha gidawat siya ni Jesus ug gibira ug miingon si Jesus kaniya, "Pagkadiyotay sa imong pagtuo! Nganong nagduhaduha ka man?" Ug nanakay silang duha sa sakayan, ug milurang ang hangin. Ang mga tinun-an nga didto sa sakayan misimba kang Jesus, ug miingon, "Ikaw gayod ang Anak sa Dios!"