[M] Santo Domingo, pari

PAGBASA GIKAN SA BASAHON NI PROPETA HABACUC

Hb. 1: 12-2: 4

O Ginoo ug Balaan kong Dios, dili ba ikaw diha nang daan sa pagsugod sa kapanahonan ug wala kay katapusan? O Ginoo ug akong Tigpanalipod, ang mga taga-Babilonia gipili mo silbing silot ug kastigo kanamo. Tungod sa imong kaputli dili ka motan-aw sa dautan ug sa sayop. Apan nganong gipasagdan mo man ang mga tawong malimbongon, ug nagpakahilom ka man lang samtang gilamoy sa tawong dautan ang tawong matarong? Gihimo mong ingon sa isda sa dagat ang katawhan, ug ingon sa mananap nga walay pangulo. Unya sama sa isda paslon ug pukoton sila sa mga taga-Babilonia. Inigkakuha nilag daghan, magmaya sila. Maghalad pa gani sila ug mosimba sa ilang pukot kay nadato ug nakakaon man silag lamiang pagkaon pinaagi niini. Magpadayon na ba lang silag pamukot ug pagpamatay sa katawhan sa walay kukaluoy? Busa mosaka ako sa bantayang tore ug paaboton kog unsay isulti sa Ginoo kanako bahin sa akong mulo. Unya mitubag kanako ang Ginoo sa pag-ingon: "Isulat ang panan-awon sa tataw kaayo diha sa mga papan aron makalikay ang makabasa niini. Kay may panahon nga gitagal alang sa katumanan sa panan-awon ug mahitabo gayod kini. Busa bisag ingon ug dugay kining matuman, paabota lang. Ug mao kini ang mensahe, 'Kadtong mga dautan dili mabuhi apan ang mga matarong mabuhi kay matinumanon man sila sa Dios!'"

SALMO RESPONSORYO

Ps. 9: 8-9. 10-11. 12-13

Dili gayod nimo biyaan sila nga nangita kanimo, O Ginoo.

Ang Ginoo naglingkod sa iyang trono hangtod sa kahangturan; gibutang niya ang iyang trono alang sa pagpanghukom. Nagahukom siya nga matarong sa kalibutan; nagadumala siya sa katawhan uban sa kaangayan.

Dili gayod nimo biyaan sila nga nangita kanimo, O Ginoo.

Ang Ginoo maoy usa ka dalangpanan alang sa mga gidaugdaog, usa ka kota sa panahon sa kalisdanan. Nagsalig sila kanimo, sila nga nagmahal sa imong ngalan, kay dili ka mobiya kanila nga nangita kanimo, O Ginoo.

Dili gayod nimo biyaan sila nga nangita kanimo, O Ginoo.

Awitig pagdayeg ang Ginoo nga naglingkod sa trono didto sa Sion; isangyaw sa kanasuran ang iyang mga buhat; Kay ang tigpanimalos sa dugo nahinumdom; wala siya mahikalimot sa dangoyngoy sa gisakit nga tawo.

Dili gayod nimo biyaan sila nga nangita kanimo, O Ginoo.

PAGBASA SA SANTOS NGA EBANGHELYO SUMALA NI SAN MATEO

Mt. 17: 14-20

Sa pagbalik nila ngadto sa katawhan, may miduol kang Jesus, miluhod sa iyang atubangan, ug miingon, "Sir, kaloy-i intawon ang akong anak! Patulon siya ug nag-antus pag-ayo ug tungod niini makadaghan na sya mahulog sa kalayo ug sa tubig. Gidala ko na siya ngadto sa imong mga tinun-an, apan wala sila makaayo kaniya." Si Jesus mitubag, "Pagkawalay pagtuo ug pagkasayop ninyo! Magsigi na ba lang akog uban-uban ninyo? Magpunay na lang akog pailob ninyo? Dad-a ngari ang bata!" Ug gimandoan ni Jesus ang yawa ug migula kini gikan sa bata, ug naayo dihadiha ang bata. Unya miduol kang Jesus angg mga tinun-an ug nangutana kaniya, "Nganong wala man kami makapagula sa yawa?" Si Jesus mitubag, "Tungod kay wala kamoy igong pagtuo. Hinumdomi kini: kon kamo may pagtuo nga samag gidak-on sa usa ka liso sa mustasa, makamando kamo niining bungtora, 'Balhin didto!' ug mobalhin kini. Makabuhat kamog bisan unsa!"