Biyernes sa Ikanapulo'g Walo nga Semana sa Ordinaryong Panahon

PAGBASA GIKAN SA BASAHON NI PROPETA NAHUM

Na. 2: 1. 3; 3: 1-3. 6-7

Ninibe, gisulong ka na! Miabot na ang gahom nga molumpag kanimo. Andama ang imong mga panalipod Bantayi ang dalan! Pangandam alang sa gubat! Pula ang taming sa mga suridalo nga misulong kanimo, ug pula usab ang ilang gibisti. Nagpangidlap sama sa kalayo ang ilang mga karwahe ug nagpanikad na ang ilang mga kabayo. Alaot ang siyudad diin naghitak ang pinatyanay, napuno sa mga bakak ug inilog, ug walay hunong ang pagpangawat! Pamati sa hinagiyos sa latigo, sa kabanha sa ligid, sa nagdagan nga mga kabayo ug nag-untol-untol nga karwahe! Misulong na ang mga kabalyero, nagpangidlap ang espada ug nagsinawsinaw ang bangkaw, daghang nangamatay, nagtinpun-og ang mga haya, ug dili kini maihap, nadagma sila sa mga patayng lawas! "Labayon ko ikawg hugaw ug dumtan ko ikaw, ug himoong talan-awon sa katawhan. Ug ang tanan nga motan-aw kanimo molikay ug moingon, "Nagun-ob ang Ninibe; kinsay mohilak alang kaniya? Asa ako mangitag mga tawo nga molipay kaniya?"

SALMO RESPONSORYO

Ps. 32: 35-36. 39. 41

Ako ang magpahamtang sa kamatayon ug maghatag sa kinabuhi.

Hapit na ang adlaw sa ilang katalagman, ug ang ilang kamatayon duol na kanila. Sa walay duhaduha ang Ginoo magbuhat sa katarong alang sa iyang katawhan; sa iyang mga sulugoon malooy siya.

Ako ang magpahamtang sa kamatayon ug maghatag sa kinabuhi.

"Busa hikat-oni ninyo nga ako, ako lamang, mao ang Dios, ug walay laing dios gawas kanako. Ako mao ang nagadala sa kamatayon ug sa kinabuhi, ako ang nagpahamtang sa mga samad ug ang nag-alima kanila.

Ako ang magpahamtang sa kamatayon ug maghatag sa kinabuhi.

Bairon ko ang akong nagpangidlap nga espada, ug ang akong kamot mokuot sa akong gapasan. Uban sa panimalos panimaslan ko ang akong mga kaaway ug balosan ko sila nga nagdumot kanako."

Ako ang magpahamtang sa kamatayon ug maghatag sa kinabuhi.

PAGBASA SA SANTOS NGA EBANGHELYO SUMALA NI SAN MATEO

Mt. 16: 24-28

Unya miingon si Jesus sa iyang mga tinun-an: "Ang buot mahimong akong tinun-an, kinahanglan nga hikalimtan niya ang iyang kaugalingon, pas-anon niya ang iyang krus, ug mosunod siya kanako. Kay ang buot magluwas sa iyang kaugalingong kinabuhi, mawad-an hinuon niini; apan ang mawad-an sa iyang kinabuhi tungod kanako, makabaton niini. May makuha ba ang tawo kon maangkon niya ang tibuok kalibotan apan kawad-an siya sa iyang kinabuhi? Wala gayod! Ang tawo walay bisan unsa nga ikahatag aron mabawi niya ang iyang kinabuhi. Kay ang Anak sa Tawo hapit na moabot uban sa himaya sa iyang Amahan, kinuyogan sa iyang mga anghel, ug unya balosan niya ang tagsa-tagsa sumala sa iyang nabuhat. Hinumdomi kini: dinhi aniay pipila nga dili mamatay hangtod nga hikit-an nila ang Anak sa Tawo nga moabot ingon nga Hari."