[F] Ang Pagkausab sa Panagway sa Ginoo

PAGBASA GIKAN SA BASAHON NI PROPETA DANIEL

Dn. 7: 9-10. 13-14

Ug sa pagyahat ni Daniel, may gibutang nga trono ug milingkod niini ang Walay Katapusan; ingon sa niebe ang kaputi sa iyang bisti, ug sama ang iyang buhok kaputi sa delana nga puti kaayo, ang iyang trono kalayo nga nagdilaab; may ligid kini nga kalayo. May suba nga kalayo nga nagbaha gikan sa iyang atubangan; libo ka libo nag-alagad kaniya, ug nagbarog sa atubangan niya, andam ang hukmanan sa paghukom, ug giablihan ang mga basahon. May mga butang pa gayod nga nakita ko sa akong panan-awon. Ug nakita ko uban sa mga panganod sa langit ang daw usa ka tawo, ug miduol siya sa Walay Katapusan, ug gipaila siya kaniya. Ug kaniya gihatag ang gahom ug ang himaya ug ang gingharian, aron alagaran siya sa tanang katawhan, walay pagkatapus ang iyang gahom, kay dili man malaglag ang iyang gingharian.

SALMO RESPONSORYO

Ps. 97: 1-2. 5-6. 9

Ang Ginoo hari, ang labing halangdon labaw sa tibuok kalibutan.

Ang Ginoo hari; pasadyaa ang yuta; palipaya ang daghang mga pulo. Ang mga panganod ug kangitngitanan nagalibot kaniya, ang katarong ug hukom mao ang gibarogan sa iyang trono.

Ang Ginoo hari, ang labing halangdon labaw sa tibuok kalibutan.

Ang mga bukid milanay ingog talo atubangan sa Ginoo, atubangan sa Ginoo sa tibuok kalibutan. Ang mga langit nagasangyaw sa iyang katarong, ug ang tanang katawhan nakakita sa iyang himaya.

Ang Ginoo hari, ang labing halangdon labaw sa tibuok kalibutan.

Tungod kay ikaw, O Ginoo, ang Labing Halangdon labaw sa tibuok kalibutan, gibayaw labaw kaayo sa tanang mga dios.

Ang Ginoo hari, ang labing halangdon labaw sa tibuok kalibutan.

PAGBASA GIKAN SA IKADUHANG SULAT NI SAN PEDRO

2 Pt. 1: 16-19

Kay wala namo ipasikad sa tinumo-tumong mga sugilanon ang among pagsangyaw kaninyo mahitungod sa gamhanang pag-anhi sa atong Ginoong Jesucristo. Kami mismo nakakita sa iyang pagkahalangdon. Didto gayod kami dihang gipasidunggan siya sa Dios nga Amahan, ug may tingog gikan sa Kahitas-an, nga nag-ingon, "Kini ang hinigugma kong Anak nga akong nahimut-an!" Kami mismo nakabati sa maong tingog gikan sa langit, samtang kami uban kaniya didto sa balaan nga bukid. Busa midugang ang among pagsalig sa mensahe nga gisangyaw sa mga propeta. Angay kini nga inyong tagdon pag-ayo, kay kini sama man sa suga nga nagdan-ag diha sa kangitngit, hangtod nga mobanagbanag ang Adlaw sa Ginoo ug ang kahayag sa kabugason modan-ag sa inyong mga kasingkasing.

PAGBASA SA SANTOS NGA EBANGHELYO SUMALA NI SAN MATEO

Mt. 17: 1-9

Tapos sa unom ka adlaw, gidala ni Jesus si Pedro ug ang magsuon nga si Santiago ug si Juan ngadto sa usa ka taas nga bukid. Samtang nagtan-aw sila kaniya, nausab ang iyang panagway; ang iyang nawong misanag sama sa adlaw, ug naputi ang iyang bisti sama sa kahayag. Unya nakita sa tulo ka tinun-an si Moises ug si Elias nga nakigsulti kang Jesus. Si Pedro miingon kang Jesus, "Ginoo, maayo nga ania kita dinhi; kon gusto ka, magbuhat ako dinhi ug tulo ka payag, usa alang kanimo, usa alang kang Moises, ug usa alang kang Elias." Samtang nagsulti siya niini, usa ka masanag nga panganod mitabon kanila, ug unya usa ka tingog gikan sa panganod miingon, "Kini ang pinangga kong Anak nga akong gikahimut-an. Pamati kamo kaniya!" Sa pagkadungog sa mga tinun-an sa tingog, nangahadlok sila pag-ayo ug tungod niini, nanghapa sila. Miduol si Jesus ug gihikap sila. "Tindog kamo ug ayaw kahadlok," miingon siya. Sa paghangad nila, wala na silay nakita gawas kang Jesus. Samtang naglugsong sila sa bukid, gipinahan sila ni Jesus, "Ayaw ninyo isugilon kang bisan kinsa kining panan-awon nga inyong nakita hangtod nga mabanhaw na ang Anak sa Tawo."