Miyerkoles sa Ikanapulo'g Walo nga Semana sa Ordinaryong Panahon

PAGBASA GIKAN SA BASAHON NI PROPETA JEREMIAS

Jer. 31: 1-7

Nag-ingon ang Ginoo, "Taliabot ang panahon nga ako mahimong Dios sa tanang banay sa Israel ug sila maakong katawhan. Gikaluy-an ko didto sa disyerto kadtong miikyas aron dili sila mamatay. Sa dihang nangandoy silag pahulay, nagpakita ako kanila didto sa halayo. Mga Israelita gihigugma ko kamo kanunay, busa gipadayon ko pagpaila kaninyo ang gugma kong walay paglubad. Tukoron ko kamo pag-usab, ug magbasal kamo sa mga tambor ug magsayaw tungod sa kalipay. Mananom kamo pag-usab og mga paras didto sa kabungtoran sa Samaria, ug kadtong nagtanom makakaon gayod sa mga abot niini. Oo, moabot gayod ang panahon nga ang mga bantay mosinggit gikan sa bungtod sa Efraim; 'Tana! Mangadto kita sa Sion, ngadto sa atong Ginoo nga atong Dios!'" Nag-ingon ang Ginoo, "Pag-awit kamo tungod sa kalipay alang sa Israel, ang labing gamhanang nasod. Awita ang inyong alawiton sa pagdayeg, 'Giluwas na sa Ginoo ang iyang katawhan, Giluwas niya ang tanang nahibilin.'"

SALMO RESPONSORYO

Jer. 31: 10. 11-12. 13

Ang Ginoo magbantay kanato maingon sa usa ka magbalantay nga nagbantay sa iyang panon.

Pamatia O mga nasud, isangyaw kini sa lagyo nga kayutaan, ug ingna: Siya nga nagpatibulaag sa Israel, nagatigum karon kanila, nagbantay siya kanila ingon sa usa ka magbalantay sa iyang panon.

Ang Ginoo magbantay kanato maingon sa usa ka magbalantay nga nagbantay sa iyang panon.

Ang Ginoo maglukat kang Jacob, magluwas siya kaniya gikan sa kamot sa iyang kaaway. Sa pagsinggit, motungas sila sa kinatumyan sa Sion, magmaya sila ngadto sa mga panalangin sa Ginoo.

Ang Ginoo magbantay kanato maingon sa usa ka magbalantay nga nagbantay sa iyang panon.

Unya ang mga dalaga magsadya ug magsayaw, ang mga batan-ong lalake ug usab ang mga tigulang, Ilisan ko ang ilang pagbangotan og kasadya, lipayon ko ug hupayon ko sila human sa ilang mga kasubo.

Ang Ginoo magbantay kanato maingon sa usa ka magbalantay nga nagbantay sa iyang panon.

PAGBASA SA SANTOS NGA EBANGHELYO SUMALA NI SAN MATEO

Mt. 15: 21-28

Unya mibiya si Jesus niadtong dapita ug miadto sa kayutaan duol sa mga siyudad sa Tiro ug sa Sidon. Usa ka babaye nga taga-Canaan, nga nagpuyo niadtong dapita, miduol kaniya ug mituwaw, "Sir, Anak ni David, kaloy-i intawon ako! Ang anak kong babaye giyawaan ug nag-antos pag-ayo." Apan wala motubag si Jesus. Miduol ang iyang mga tinun-an kaniya ug miingon, "Papahawaa siya kay nagsunodsunod siya kanato ug saba kaayo!" Unya mitubag si Jesus, "Gipadala ako ngadto lamang sa nawalang mga karnero sa nasod sa Israel." Apan miduol ang babaye ug miluhod sa atubangan ni Jesus. "Sir, tabangi intawon ako!" miingon siya. Si Jesus mitubag, "Dili maayo nga kuhaon ang kalan-on sa nga anak ug ipakaon sa mga iro." Ang babaye mitubag, "Tinuod kana, Sir, apan bisan gani ang mga iro makakaon man sa mga mumho nga mahulog gikan sa lamesa sa agalon." Ug si Jesus mitubag kaniya: "Inday, pagkadako sa imong pagsalig! Matuman ang imong gihangyo." Ug niadto dayong gutloa naayo ang iyang anak.