[M] San Juan Maria Vianney, pari

PAGBASA GIKAN SA BASAHON NI PROPETA JEREMIAS

Jer. 30: 1-2. 12-15. 18-22

Ang Ginoo, ang Dios sa Israel, miingon kanako, "Isulat sa usa ka libro ang tanan nga giingon ko kanimo. Nag-ingon ang Ginoo ngadto sa iyang katawhan, "Dili na maalim ang inyong mga samad ingon man ang inyong mga bun-og. Walay moamuma kaninyo, ug walay tambal alang sa inyong kabahong, ni paglaom nga maayo pa kamo. Gikalimtan na kamo sa tanan ninyong hinigugma; wala na sila magtagad kaninyo. Giataki ko kamo sama sa akong kaaway, ug pait ang silot nga inyong naagoman, kay daghan man kamog sala, ug daotan kamo kaayo. Ayaw na kamog bagulbol bahin sa inyong mga kadaot; dili na mamaayo ang inyong balatian. Gisilotan ko kamo sa ingon tungod sa kadaghan sa inyong mga sala, ug sa hilabihan ninyong pagkadaotan. Nag-ingon ang Ginoo, "Ibalik ko ang mga kaliwat ni Jacob sa ilang kaugalingong nasod, ug kaluy-an ko ang matag banay nila; ang Jerusalem tukoron pag-usab, ingon man ang palasyo sa hari. Ang mga nagpuyo niini mag-awit og mga pagdayeg, ug maninggit sa kalipay. Pasanayon ko sila ug pasidunggan usab. Ibalik ko ang kanhing gahom sa maong nasod, ug lig-onon ko kini pag-usab: silotan ko ang tanan nga nagdaogdaog kanila. Ang momando kanila ila nang kadugo, usa ka pangulo nga kauban ra nila. Inigdapit ko kaniya, modu-ol siya dayon; walay mangahas pagduol kanako kon dili ko siya dapiton. Sila maakong katawhan, ug ako mailang Dios. Ako, ang Ginoo, ang nagsulti niini."

SALMO RESPONSORYO

Ps. 102: 16-18. 19-21. 29. 22-23

Ang Ginoo magtukod pag-usab sa Sion ug mopakita diha sa tibuok niyang himaya.

Ang mga nasud magtahod sa imong ngalan, O Ginoo, ug ang tanang mga hari sa yuta magtahod sa imong himaya, Diha sa matukod na pag-usab sa Ginoo ang Sion ug mopakita diha sa iyang himaya; Sa iyang pagtagad sa pag-ampo sa hangol, ug sa wala niya pagtamay sa ilang pag-ampo.

Ang Ginoo magtukod pag-usab sa Sion ug mopakita diha sa tibuok niyang himaya.

Isulat kini alang sa kaliwat nga umaabot, ug ang iyang umaabot nga mga binuhat pagdayega sa Ginoo. "Ang Ginoo mitan-aw gikan sa iyang balaang bukid, gikan sa langit ginanaw niya ang yuta, Aron pagpamati sa agulo sa mga binilanggo, aron pagluwas kanila nga gihukman alang sa kamatayon."

Ang Ginoo magtukod pag-usab sa Sion ug mopakita diha sa tibuok niyang himaya.

Ang mga anaa sa imong sulugoon molungtad, ug ang ilang kaliwat magpadayon diha sa imong atubangan, Aron ang ngalan sa Ginoo isangyaw sa Sion; ug ang iyang pagdayeg, diha sa Jerusalem. Diha nga ang katawhan magpundok, ug ang mga gingharian, aron pag-alagad sa Ginoo.

Ang Ginoo magtukod pag-usab sa Sion ug mopakita diha sa tibuok niyang himaya.

PAGBASA SA SANTOS NGA EBANGHELYO SUMALA NI SAN MATEO

Mt. 14: 22-36

Unya gipasakay ni Jesus ang mga tinun-an sa sakayan ug gipauna niya ngadto sa tabok sa lanaw, ug iyang gipalakaw ang mga tawo. Tapos niya palakta ang mga tawo, mitungas siya nga nag-inusara sa usa ka bungtod aron pag-ampo. Ug sa pagkagabii na, si Jesus nag-inusara didto. Niadtong tungora ang sakayan didto na sa lawod, gikusokuso sa mga balod, kay ang hangin sungsongon man. Sa may alas tres sa kadlawon, si Jesus miadto kanila, nga naglakaw sa tubig. Sa pagkakita sa mga tinun-an kaniya nga naglakaw sa tubig, nangahadlok sila pag-ayo. "Anaay multo!" miingon sila, ug naniyagit sila sa kalisang. Si Jesus miingon kanila, "Ayaw kamo kahadlok! Ako kini!" Unya si Pedro miingon, "Ginoo, kon ikaw man, palakta ako sa tubig nganha kanimo." "Dali ngari." mitubag si Jesus. Busa mikawas si Pedro sa sakayan ug milakaw sa tubig ngadto kang Jesus. Apan sa pagkamatikod niya sa hangin, nahadlok siya ug misugod pagkaunlod. "Ginoo, luwasa ako!" misinggit siya. Dihadiha gidawat siya ni Jesus ug gibira ug miingon si Jesus kaniya, "Pagkadiyotay sa imong pagtuo! Nganong nagduhaduha ka man?" Ug nanakay silang duha sa sakayan, ug milurang ang hangin. Ang mga tinun-an nga didto sa sakayan misimba kang Jesus, ug miingon, "Ikaw gayod ang Anak sa Dios!" Mitabok sila sa lanaw ug midunggo sa Genesaret, ug si Jesus nailhan sa mga tawo. Busa gipakuha nila ang mga masakiton sa kasikbit nga kayutaan ug ilang gidala ngadto kang Jesus. Mihangyo sila kaniya nga pahikapon ang mga masakiton bisan na lang sa sidsid sa iyang bisti; ug ang tanan nga nakahikap niini nangaayo.

PAGBASA SA SANTOS NGA EBANGHELYO SUMALA NI SAN MATEO

Mt. 15: 1-2. 10-14

May pipila ka Pariseo ug mga magtutudlo sa Balaod gikan sa Jerusalem nga miduol kang Jesus. Nangutana sila kaniya, "Nganong naglapas man ang imong mga tinun-an sa pagtulon-an nga gipasunod kanato sa atong mga katigulangan? Dili sila manghunaw sa hustong paagi sa dili pa sila mangaon!" Unya gipaduol ni Jesus ang mga tawo ngadto kaniya ug miingon siya kanila, "Pamati kamo ug sabta ninyo kini: Dili ang mosulod sa baba sa tawo ang makahugaw kaniya kondili ang mogula sa iyang baba." Unya miduol kaniya ang mga tinun-an ug miingon, "Nasayod ka ba nga naglagot ang mga Pariseo tungod sa imong gisulti?" Si Jesus mitubag, "Ang tanang tanom nga wala itanom sa akong Amahan nga atua sa langit pagaibton. Pasagdi lang sila kay sila mga giya nga buta. Ug kon ang usa ka buta maoy mag-agak sa laing buta, silang duha mangahulog sa kanal."