Lunes sa Ikanapulo'g Walo nga Semana sa Ordinaryong Panahon

PAGBASA GIKAN SA BASAHON NI PROPETA JEREMIAS

Jer. 28: 1-17

Sa ikalima ka bulan sa ikaupat ka tuig nga si Sedequias maoy hari, si Ananias, anak ni Asur usa ka propeta nga taga Gabaon, misulti kanako didto sa templo. Gisultihan niya ako atubangan sa mga pari ug sa katawhan nga ang Ginoo nga Labing Gamhanan, ang Dios sa Israel, nag-ingon: "Gikuhaan kog gahom ang hari sa Babilonia. Sulod sa duha ka tuig dad-on ko balik nganhi ang tanang mahal nga kabtangan nga gikuha ni Nabucodonosor gikan sa templo ug gidala ngadto sa Babilonia. Dad-on ko usab pagbalik si Joaquin, hari sa Juda anak ni Joakim lakip ang tanang binihag gikan sa Juda. Oo, kuhaan kog gahom ang hari sa Babilonia. Ako, ang Ginoo, nagsulti niini." Unya miingon ako kang Propeta Ananias atubangan sa mga pari ug sa katawhan didto sa templo. "Mao kanay akong gilaoman. Naglaom ako nga buhaton kini sa Ginoo ug tumanon niya ang tanan mong gipamulong, ug dad-on gayod niya balik nganhi gikan sa Babilonia, ang tanang mahal nga kabtangan sa templo ug ang tanang tawo nga gipamihag. Apan pamati kamo sa isulti ko karon kaninyo ug sa katawhan. Ang mga propeta sa karaang panahon, sa wala pa kamo ug ako, nanagna nga may gubat, gutom ug kamatay nga mahitabo sa daghang mga nasod ug sa gamhanang mga gingharian. Apan ang propeta nga nanagna bahin sa kalinaw, mailhan lamang nga siya sinugo gayod sa Ginoo kon matinuod ang iyang gipanagna." Unya gikuha ni Ananias ang yugo sa akong liog ug iya kining gibalibali. Ug miingon si Ananias atubangan sa tanang tawo, "Ang Ginoo miingon nga sa ingon niining paagiha balibalion sa Ginoo ang yugo nga gisangon ni Nabucodonosor sa liog sa tanang nasod; iya gayod kining himoon sulod sa duha ka tuig." Unya mibiya ako. Wala madugay giingnan ako sa Ginoo, "Adtoa si Ananias ug ingna siya nga nag-ingon ang Ginoo, nga mahimo mo pagbalibali ang yugo nga kahoy, apan ilisan kini niyag yugo nga puthaw. Ang Ginoong Labing Gamhanan ang Dios sa Israel, nag-ingon nga iyang sangonan og yugong puthaw kining tanang nasod, ug sila mag-alagad kang Hari Nabucodonosor, Hari sa Babilonia. Nag-ingon pa gani ang Ginoo nga bisan ang mga ihalas nga mananap iyang paalagaron kang Nabucodonosor." Unya miingon ako kang Ananias, "Pamati, Ananias! Wala ka sugoa sa Ginoo, ug gipatuo mog bakak kining katawhan. Busa nag-ingon ang Ginoo nga ipapatay ka niya, ug sa dili pa matapos kining tuiga, mamatay ka kay gitudloan mo man ang katawhan sa pagsukol sa Ginoo." Namatay gayod si Propeta Ananias sa ikapito ka bulan sa maong tuig.

SALMO RESPONSORYO

Ps. 119: 29. 43. 79. 80. 95. 102

Tudloi ako sa imong mga balaod, O Ginoo.

Liway kanako ang dalan sa kabakakan, ug gasahi ako sa imong balaod.

Tudloi ako sa imong mga balaod, O Ginoo.

Ayaw pagkuhaa ang pulong sa kamatuoran gikan sa akong ba-ba kay diha sa imong mga gimbut-an anaa ang akong kalauman.

Tudloi ako sa imong mga balaod, O Ginoo.

Paaria kanako sila nga mahadlokon kanimo ug pailha sila sa imong kasugoan.

Tudloi ako sa imong mga balaod, O Ginoo.

Himoang hingpit ang akong kasingkasing diha sa imong kasugoan, aron dili ako kaulawan.

Tudloi ako sa imong mga balaod, O Ginoo.

Ang mga makasasala nagahulat aron paglaglag kanako, apan nanumbaling ako sa imong kasugoan.

Tudloi ako sa imong mga balaod, O Ginoo.

Sa imong mga gimbut-an wala ako motipas, kay imo man ako nga gitudloan.

Tudloi ako sa imong mga balaod, O Ginoo.

PAGBASA SA SANTOS NGA EBANGHELYO SUMALA NI SAN MATEO

Mt. 14: 13-21

Sa pagkadungog ni Jesus sa balita nga gipatay si Juan, mibiya siya niadtong dapita sakay sa usa ka sakayan ug miadto nga nag-inusara sa usa ka dapit nga awaaw. Nakabalita niini ang mga tawo, ug namiya sila sa ilang mga lungsod, ug milakaw sila aron pag-agpas kaniya. Si Jesus mikawas sa sakayan, ug sa pagkakita niya sa dakong pundok sa mga tawo, giabot siyag dakong kaluoy kanila, ug giayo niya ang ilang mga masakiton. Niadtong hapona ang iyang mga tinun-an miduol kaniya ug miingon, "Hapon na kaayo, ug awaaw kining dapita. Busa palakta ang mga tawo ug paadtoa sila sa mga balangay aron mamalit ug pagkaon." Si Jesus mitubag, "Dili kinahanglan nga manlakaw pa sila; kamo mismo ang maghatag kanilag pagkaon." Sila mitubag, "Lima ra ka buok pan ug duha ka isda ang among dala." Si Jesus miingon, "Dad-a ngari." Unya iyang gipalingkod sa kasagbotan ang mga tawo ug gikuha niya ang lima ka pan ug ang duha ka isda; unya miyahat siya sa langit ug nagpasalamat sa Dios. Ug gipikaspikas niya ang mga pan ug gihatag ngadto sa mga tinun-an, ug gihatag usab kini sa mga tinun-an ngadto sa mga tawo. Nangaon ang tanan ug nangabusog. Unya gihipos sa mga tinun-an ang sobra nga nakapuno ug napulog-duha ka bukag. Lima ka libo ang gidaghanon sa mga tawo nga nangaon, walay labot sa mga babaye ug sa mga bata.