Ikanapulo'g Walo nga Domingo sa Ordinaryong Panahon

PAGBASA GIKAN SA BASAHON NI PROPETA ISAIAS

Is. 55: 1-3

Ang Ginoo miingon, "Kamong giuhaw, ngari kamo ug inom. Bisag wala kamoy kuwarta, ngari palit ug kaon! Palit kamog bino ug gatas nga walay bayad. Nganong gastoon man ninyo ang inyong kuwarta nianang dili makabusog? Pamati kamo kanako, ug makakaon kamog maayong pagkaon, ug matagbaw kamo. Pamati kamo ug duol kanako, aron dili kamo mamatay; maghimo akog walay katapusang kasabutan uban kaninyo ug panalanginan ko kamo sumala sa akong gisaad kang David."

SALMO RESPONSORYO

Ps. 145: 8-9. 15-16. 17-18

Ang kamut sa Ginoo maoy nagapakaon kanato; iyang gitagbaw ang tanan natong mga kinahanglan.

Ang Ginoo maayo ug maluluy-on, dugay nga masuko og dako sa kaluoy. Ang Ginoo maayo alang sa tanan ug maluluy-on sa tanan niyang mga binuhat.

Ang kamut sa Ginoo maoy nagapakaon kanato; iyang gitagbaw ang tanan natong mga kinahanglan.

Ang mata sa tanan nagatan-aw nga malaumon kanimo, ug gihatagan mo sila sa ilang kalan-on sa husto nga panahon; Gibukhad mo ang imong kamut ug gitagbaw mo ang imong kamut ug gitagbaw mo ang tinguha sa tanang buhi.

Ang kamut sa Ginoo maoy nagapakaon kanato; iyang gitagbaw ang tanan natong mga kinahanglan.

Ang Ginoo matarong diha sa tanan niyang mga paagi ug balaan diha sa tanan niyang mga buhat. Ang Ginoo haduol sa tanan nga nagasangpit kaniya, sa tanan nga nagasangpit kaniya diha sa kamatuoran.

Ang kamut sa Ginoo maoy nagapakaon kanato; iyang gitagbaw ang tanan natong mga kinahanglan.

PAGBASA GIKAN SA SULAT NI SAN PABLO NGADTO SA TAGA-ROMA

Rom. 8: 35. 37-39

Busa, kinsay makapahimulag kanato sa gugma ni Cristo? Ang kasamok ba, ang kalisdanan, ang mga paglutos, ang gutom, ang kakabus, ang katalagman, o ang kamatayon? Dili! Hinonoa, taliwala niining tanan, may hingpit kitang kadaogan pinaagi kaniya nga nahigugma kanato! Kay siguro ako nga walay bisan unsa nga makapahimulag kanato sa iyang gugma: bisan ang kamatayon, ni ang kinabuhi, ni ang mga anghel, ni ang mga langitnong punoan o mga gahom, ni ang mga butang karon ug sa umaabot nga kapanahonan; bisan ang kalibutan sa itaas o sa ilalom—wala gayoy bisan unsa sa mga binuhat nga makapahimulag kanato sa gugma sa Dios nga naato pinaagi sa atong Ginoong Cristo Jesus.

PAGBASA SA SANTOS NGA EBANGHELYO SUMALA NI SAN MATEO

Mt. 14: 13-21

Sa pagkadungog ni Jesus sa balita nga gipatay si Juan, mibiya siya niadtong dapita sakay sa usa ka sakayan ug miadto nga nag-inusara sa usa ka dapit nga awaaw. Nakabalita niini ang mga tawo, ug namiya sila sa ilang mga lungsod, ug milakaw sila aron pag-agpas kaniya. Si Jesus mikawas sa sakayan ug sa pagkakita niya sa dakong pundok sa mga tawo, giabot siyag dakong kaluoy kanila, ug giayo niya ang ilang mga masakiton. Niadtong hapona ang iyang mga tinun-an miduol kaniya ug miingon, "Hapon na kaayo, ug awaaw kining dapita. Busa palakta ang mga tawo ug paadtoa sila sa mga balangay aron mamalit og pagkaon." Si Jesus mitubag, "Dili kinahanglan nga manlakaw pa sila; kamo mismo ang maghatag kanilag pagkaon." Sila mitubag, "Lima ra ka pan ug duha ka isda ang among dala." Si Jesus miingon, "Dad-a ngari." Unya iyang gipalingkod sa kasagbotan ang mga tawo ug gikuha niya ang lima ka pan ug ang duha ka isda; unya miyahat siya sa langit ug nagpasalamat sa Dios. Ug gipikaspikas niya ang mga pan ug gihatag ngadto sa mga tinun-an, ug gihatag usab kini sa mga tinun-an ngadto sa mga tawo. Nangaon ang tanan ug nangabusog. Unya gihipos sa mga tinun-an ang sobra nga nakapuno og napulog-duha ka bukag. Lima ka libo ang gidaghanon sa mga tawo nga nangaon, walay labot sa mga babaye ug sa mga bata.