[M] San Alfonso Maria de Liguori, obispo ug doktor sa Simbahan

PAGBASA GIKAN SA BASAHON NI PROPETA JEREMIAS

Jer. 26: 11-16. 24

Miingon ang mga pari ug ang mga propeta ngadto sa mga pangulo ug sa katawhan, "Kining tawhana angay silotan sa kamatayon tungod sa iyang gisulti batok sa atong siyudad. Kamo mismo nakadungog kaniya." Unya miingon ako sa mga pangulo ug sa katawhan, "Gisugo ako sa Ginoo sa pagsulti sa tanan nga nadungog ninyo nga gisulti ko batok niining temploha ug niining siyudara. Kinahanglan nga usbon ninyo ang inyong pagkinabuhi ug ang inyong mga buhat, ug tumanon ninyo ang mga nga inyong Dios. Kon buhaton ninyo kini, dili ipadayon sa Ginoo pagpahamtang ang katalagman nga iya untang ipahamtang kaninyo. Karon ania ako ubos sa inyong gahom. Buhata kanako ang gihunahuna ninyo nga angay kanako. Apan hibaloi ninyo kini: kon patyon ako ninyo, kamo ug ang tanang molupyo niining siyudara sad-an tungod sa pagpatay sa tawong walay sala, kay ang Ginoo man ang nagsugo kanako sa pagsulti niining tanan kaninyo." Unya ang mga pangulo ug ang katawhan miingon ngadto sa mga pari ug sa mga propeta, "Dili angay silotan sa kamatayon kining tawhana, kay siya misulti man kanato sa ngalan sa Ginoo nga atong Dios." Apan gipanalipdan ako ni Ahikam, anak ni Safan, busa wala siya itugyan ngadto sa katawhan aron ipapatay.

SALMO RESPONSORYO

Ps. 69: 15-16. 30-31. 33-34

Ginoo, diha sa imong dakong gugma, tubaga ako.

Palingkawasa ako sa kalapukan; hinaut unta nga dili ako maunlod. Maluwas unta ako sa akong mga kaaway, ug sa kahiladman sa katubigan. Dili unta ako malumsan sa mga tubig sa baha, ni suyupon ako sa kahiladman, ni ang gahong magtak-um sa iyang ba-ba ibabaw kanako.

Ginoo, diha sa imong dakong gugma, tubaga ako.

Apan gipaantos ako ug anaa sa kasakitan; ang imong makaluluwas nga hinabang, O Dios, manalipod unta kanako. Dayegon ko ang ngalan sa Dios diha sa awit, ug himayaon ko siya uban sa pasalamat.

Ginoo, diha sa imong dakong gugma, tubaga ako.

Tan-awa, kamong mga mapaubsanon, ug pagsadya; kamo nga nangita sa Dios, magmalipayon unta ang inyong mga kasingkasing. Kay ang Ginoo nagpatalinghog sa kabus, ug ang mga iyaha nga anaa sa talikala, dili niya isalikway.

Ginoo, diha sa imong dakong gugma, tubaga ako.

PAGBASA SA SANTOS NGA EBANGHELYO SUMALA NI SAN MATEO

Mt. 14: 1-12

Niadtong panahona, si Herodes, ang nagmando sa Galilea, nakabalita mahitungod kang Jesus. "Siya mao gayod si Juan nga Magbubunyag nga nabanhaw," giingnan niya ang iyang mga opisyal. "Kini ang hinungdan nga kining mga gahoma anaa kaniya." Kay si Herodes mao may nagsugo nga dakpon si Juan ug gapuson ug prisohon. Gibuhat niya kini tungod kang Herodias, ang asawa sa iyang igsuon nga si Felipe. Kay si Juan nga Magbubunyag nagpunay man god og sulti kang Herodes nga dili matarong nga mangasawa siya kang Herodias. Si Juan buot patyon ni Herodes, apan nahadlok siya sa mga Judio, kay sila miila man kang Juan nga usa ka propeta. Sa pagsaulog sa adlawng natawhan ni Herodes, misayaw atubangan sa tanang nanambong ang anak nga babaye ni Herodias. Si Herodes nahimuot pag-ayo busa misaad siya kaniya sa pag-ingon, "Ipanumpa ko nga hatagan ko ikaw bisag unsay imong pangayoon!" Sinugyotan sa iyang inahan, miingon siya kang Herodes, "Ihatag kanako karon dayon ang ulo ni Juan nga Magbubunyag nga isulod og bandihado!" Nasubo ang hari, apan tungod sa panumpa nga iyang gihimo atubangan sa tanan niyang mga dinapit, misugo siya nga hatagan ang dalagita sa iyang gipangayo. Busa iyang gipapunggotan si Juan didto sa prisohan. Ang ulo gidala diha sa bandihado ug gihatag ngadto sa dalagita, ug gidala niya kini ngadto sa iyang inahan. Unya miabot ang mga tinun-an ni Juan ug ilang gihipos ang lawas ug gilubong; human niini, giadto nila si Jesus ug ilang gisuginlan sa nahitabo.