Huwebes sa Ikanapulo'g Pito nga Semana sa Ordinaryong Panahon

ANTIPONA SA PAGSUGOD

Ang Dios anaa sa iyang santos nga puloy-anan; siya ang magsagop sa nag-inusara siya ang maghatag sa gahom ug kusog ngadto sa iyang katawhan.

PAGBASA GIKAN SA BASAHON NI PROPETA JEREMIAS

Jer. 18: 1-6

Giingnan ako sa Ginoo, "Lakaw ngadto sa balay sa tighimog kulon ug didto ihatag ko kanimo ang akong mensahe." Busa miadto ako ug didto nakita ko ang tighimog kulon nga nagtrabaho. Kon makita pa gani niya nga ang usa ka kulon dili maayo pagkabuhat, iya kining usbon pagmasa ug buhaton ug laing butang. Unya giingnan ako sa Ginoo, "Dili ba mahimo ko kaninyo, katawhan sa Israel, ang gihimo sa tighimog kulon? Kamo ania sa akong kamot ingon sa minasang yuta diha sa kamot sa tighimog kulon. Ako, ang Ginoo, nag-ingon niini."

SALMO RESPONSORYO

Ps. 146: 1-2. 3-4. 5-6

T. Bulahan sila kansang hinabang mao ang Dios ni Jacob.

Dayega ang Ginoo, O kalag ko; Dayegon ko ang Ginoo sa tibuok kong kinabuhi; Awitan ko ang kadayeganan sa akong Dios samtang buhi pa ako.

T. Bulahan sila kansang hinabang mao ang Dios ni Jacob.

Ayaw ibutang ang imong pagsalig diha sa mga kadagkoan, diha sa tawo diin walay kaluwasan. Sa pagbulag sa iyang kalag, mobalik siya ngadto sa iyang yuta: niadtong adlawa mawagtang ang iyang mga laraw.

T. Bulahan sila kansang hinabang mao ang Dios ni Jacob.

Bulahan siya kansang hinabang mao ang Dios ni Jacob kansang kalauman anaa sa Ginoo nga iyang Dios, nga maoy nagbuhat sa langit ug sa yuta, sa kadagatan ug sa tanan nga anaa kanila.

T. Bulahan sila kansang hinabang mao ang Dios ni Jacob.

BERSO SA DILI PA ANG EBANGHELYO

Aleluya! Ang imong mga Pulong, O Ginoo, naghatag ug kasadya sa akong kasingkasing, ang imong pagtulon-an kahayag sa akong mga mata. Aleluya!

PAGBASA SA SANTOS NGA EBANGHELYO SUMALA NI SAN MATEO

Mt. 13: 47-53

Si Jesus miingon ngadto sa katawhan: "Ang Gingharian sa langit sama usab sa usa ka baling nga gitaktak didto sa lanaw, nga nakakuha sa tanang matang sa isda. Inigkapuno na niini, bitaron kini sa mga mananagat ngadto sa daplin sa lanaw ug manglingkod sila aron paghagpat sa isda: ang mga maayong isda isulod nila sa ilang mga bukag, ug ang walay pulos ilang isalibay. Mao usab kini ang mahitabo sa katapusan sa kalibotan: moanhi ang mga anghel ug lainon nila ang mga daotang tawo gikan sa mga maayo, ug itambog sila ngadto sa hudno nga nagdilaab. Didto maghilak sila ug magkagot ang ilang mga ngipon." "Nakasabot ba kamo niining mga butanga?" nangutana si Jesus kanila. "Oo," mitubag sila. Busa miingon siya, "Sa ato pa, ang tanang magtutudlo sa Balaod nga nahimong tinun-an sa Gingharian sa langit sama sa usa ka tagbalay nga nagkuhag bag-o ug karaang mga butang gikan sa iyang tipiganan." Sa nakahuman na si Jesus pagsugilon niining mga sambingaya, mibiya siya niadtong dapita.

ANTIPONA SA PANGALAWAT

Dayga ang Ginoo, kalag ko, ug hinumdomi ang tanan niyang kaayo.