[M] Santa Marta, Santa Maria ug San Lazaro

ANTIPONA SA PAGSUGOD

Misulod si Jesus sa usa ka balangay ug usa ka babaye, Marta ang ngalan miabiabi kaniya didto sa iyang balay.

PAGBASA GIKAN SA UNANG SULAT NI SAN JUAN

1 Jn. 4: 7-16

Mga igsuon, maghigugmaay kita kay ang gugma naggikan sa Dios. Ang nahigugma sa iyang isigkatawo anak sa Dios ug nakaila sa Dios. Ang wala mahigugma sa iyang isigkatawo wala makaila sa Dios, kay ang Dios gugma man. Gipadayag sa Dios ang iyang gugma kanato pinaagi sa pagpadala sa iyang Bugtong Anak nganhi sa kalibutan, aron makabaton kita sa kinabuhing walay katapusan pinaagi kaniya. Ang matuod nga gugma mao kini: dili kita maoy unang nahigugma sa Dios, kondili siya maoy unang nahigugma kanato, ug gipadala niya ang iyang Anak aron pinaagi kaniya mapasaylo ang atong mga sala. Mga igsuon, kon ingon niini ang paghigugma sa Dios kanato, nan maghigugmaay kita. Wala pay tawo nga nakakita sa Dios; apan kon maghigugmaay kita, magpuyo kanato ang Dios ug mahingpit dinhi kanato ang iyang gugma. Masiguro nato nga anaa kita sa Dios ug anaa kanato ang Dios kay gihatag na man niya kanato ang iyang Espiritu. Nakita nato ug gisugilon sa uban nga gipadala sa Amahan ang iyang Anak aron pagluwas sa kalibutan. Ang magpahayag nga si Jesus mao ang Anak sa Dios, anaa sa Dios ug ang Dios anaa kaniya. Ug nasayod kita ug nagtuo nga gihigugma kita sa Dios. Ang Dios gugma ug ang nagkinabuhi subay sa gugma anaa sa Dios ug ang Dios anaa kaniya.

SALMO RESPONSORYO

Ps. 34: 2-3. 4-5. 6-7. 8-9. 10-11

T. Dayegon ko ang Ginoo sa tanang panahon.

Dayegon ko ang Ginoo sa tanang mga panahon; ang iyang pagdayeg ania kanunay sa akong baba. Pahimayaa ang akong kalag diha sa Ginoo; ang mapaubsanon mamati kanako ug malipay.

T. Dayegon ko ang Ginoo sa tanang panahon.

Himayaa ang Ginoo uban kanako, mag-ambahan kita aron pagbayaw sa iyang ngalan. Gipangita ko ang Ginoo, ug gitubag ako niya ug giluwas ako niya sa tanan kong gikahadlokan.

T. Dayegon ko ang Ginoo sa tanang panahon.

Paglaum kamo kaniya aron mosanag kamo sa kasadya, ug ang inyong mga nawong dili manlipaghong sa kaulaw. Sa pagsangpit sa gisakit nga tawo, namati ang Ginoo ug giluwas siya sa tanan niyang kagul-anan.

T. Dayegon ko ang Ginoo sa tanang panahon.

BERSO SA DILI PA ANG EBANGHELYO

Aleluya! Ako ang kahayag sa kalibutan, ang mosunod kanako makabaton sa kahayag sa kinabuhi ug dili na gayod maglakaw diha sa kangitngit. Aleluya!

PAGBASA SA SANTOS NGA EBANGHELYO SUMALA NI SAN JUAN

Jn. 11: 19-27

Ug daghang mga Judio miduaw kang Marta ug kang Maria aron paghupay sa ilang kaguol gumikan sa kamatayon sa ilang igsuon. Sa pagkabalita ni Marta nga taliabot si Jesus, migula siya aron pagsugat kaniya; apan nagpabilin sa balay si Maria. Si Marta miingon kang Jesus, "Kon dinhi ka pa lamang, Ginoo, dili unta mamatay ang akong igsuon! Hinoon, nasayod ako nga bisan karon mohatag ang Dios kanimo bisag unsay imong pangayoon." Si Jesus miingon kaniya, "Mabanhaw ang imong igsuon." Siya mitubag, "Nahibalo ako nga mabanhaw siya sa katapusang adlaw." Ug si Jesus miingon kaniya, "Ako ang pagkanbanhaw ug ang kinabuhi. Ang nagtuo kanako, bisan tuod mamatay, mabuhi; ug ang tanan nga buhi ug nagtuo kanako dili gayod mamatay. Mituo ka ba niini?" Ug siya mitubag, "Oo, Ginoo, mituo ako nga ikaw ang Mesiyas, ang Anak sa Dios, nga moanhi sa kalibutan."

ANTIPONA SA PANGALAWAT

Miingon si Marta kang Jesus: Ikaw si Cristo, Anak sa Dios nga buhi nga mianhi ning kalibutan.