Martes sa Ikanapulo'g Pito nga Semana sa Ordinaryong Panahon

ANTIPONA SA PAGSUGOD

Ang Dios anaa sa iyang santos nga puloy-anan; siya ang magsagop sa nag-inusara siya ang maghatag sa gahom ug kusog ngadto sa iyang katawhan.

PAGBASA GIKAN SA BASAHON NI PROPETA JEREMIAS

Jer. 14: 17-22

Ang Ginoo nagsugo kanako sa pagsulti sa katawhan bahin sa akong kasubo ug sa pag-ingon, "Manaligdig unta ang mga luha sa akong mga mata, sa walay hunong adlaw ug gabii, kay samdan ang akong katawhan ug grabi kini kaayo. Kon moadto ako sa kaumahan, makita ko ang mga haya niadtong nangamatay sa gubat; ug kon moadto ako sa kalungsoran, makita ko ang mga tawo nga himatyon sa gutom. Nagpadayon ang mga propeta ug mga pari sa ilang buhat, apan wala sila masayod sa ilang gibuhat." Ginoo, gisalikway mo na ba sa hingpit ang Juda? Nasilag ka ba sa mga molupyo sa Sion? Ngano bang gisamaran mo man kamig grabi ug dili na maayo? Nangandoy kami sa kalinaw, apan walay kalinaw nga miabot; naglaom kami sa among kaayohan, apan kalisang hinuon ang midangat kanamo. Gisugid namo ang among sala kanimo, Ginoo, ingon man ang mga sala sa among katigulangan; nakasala mi kanimo. Ayaw hikalimti ang imong mga saad, ug ayaw intawon kami isalikway. Ayaw pakaulawi ang Jerusalem, ang dapit diin anaa ang halangdon mong trono; tumana ang kasabutan nga gihimo mo uban kanamo; ayaw kini kawanga. Walay diosdios sa mga nasod nga makapaulan, ug ang langit bisan sa iyang kaugalingon lamang dili makapaalindahaw. Ikaw ang among gilaoman, O Ginoong Dios namo, kay ikaw lamang ang makahimo niining mga butanga.

SALMO RESPONSORYO

Ps. 79: 8. 9. 11. 13

T. Tungod sa himaya sa imong ngalan, O Ginoo, luwasa kami.

Ayaw hinumdomi batok kanamo ang mga kadautan kanhi; ang imong kaluoy madali unta nga moabot kanamo, kay nahimutang kami sa dakong kalisdanan.

T. Tungod sa himaya sa imong ngalan, O Ginoo, luwasa kami.

Tabangi kami, O Dios, among manluluwas tungod sa himaya sa imong ngalan; Luwasa kami ug pasayloa ang among kasal-anan, tungod sa imong ngalan.

T. Tungod sa himaya sa imong ngalan, O Ginoo, luwasa kami.

Paabota nganha kanimo ang agulo sa mga binilanggo sa imong dakong gahom luwasa sila nga gihukman sa kamatayon, unya kami, imong lungsod ug mga karnero sa imong panon, magpasalamat kanimo sa kahangturan; latas sa tanang kaliwat among isangyaw ang imong kadayganan.

T. Tungod sa himaya sa imong ngalan, O Ginoo, luwasa kami.

BERSO SA DILI PA ANG EBANGHELYO

Aleluya! Ang akong mga karnero mamati sa akong tingog; nakaila ako kanila ug sila nagsunod kanako. Aleluya!

PAGBASA SA SANTOS NGA EBANGHELYO SUMALA NI SAN MATEO

Mt. 13: 36-43

Unya mibiya si Jesus sa mga tawo ug misulod sa balay. Ang iyang mga tinun-an miduol kaniya ug miingon, "Sultihi kami sa kahulugan sa sambingay mahitungod sa mga sagbot sa uma." Si Jesus mitubag, "Ang tawo nga nagpugas sa maayong binhi mao ang Anak sa Tawo; ang uma mao ang kalibutan; ang maayong binhi mao ang mga tawo nga sakop sa Gingharian; ang mga sagbot mao ang mga tawo nga sakop sa Yawa; ug ang kaaway nga nagsabod sa mga sagbot mao ang Yawa. Ang pagpangani mao ang katapusan sa kalibutan, ug ang mangangani mao ang mga anghel. Maingon nga ang mga sagbot hipuson ug sunogon, mao usab kini ang mahitabo sa katapusan sa kalibutan: ang Anak sa Tawo magsugo sa iyang mga anghel sa paghipos gikan sa iyang Gingharian sa tanan nga maoy nakaangin sa mga tawo sa pagpakasala, ingon man ang tanan nga nagbuhat og daotan, ug itambog sila ngadto sa hudno nga nagdilaab, diin maghilak sila ug magkagot sa ilang ngipon. Unya ang katawhan sa Dios modan-ag sama sa adlaw didto sa Gingharian sa ilang Amahan. Busa pamati kon may dalunggan kamo!"

ANTIPONA SA PANGALAWAT

Dayga ang Ginoo, kalag ko, ug hinumdomi ang tanan niyang kaayo.