Ikanapulo'g Pito nga Domingo sa Ordinaryong Panahon

ANTIPONA SA PAGSUGOD

Ang Dios anaa sa iyang santos nga puloy-anan; siya ang magsagop sa nag-inusara. Siya ang maghatag sa gahom ug kusog ngadto sa iyang katawhan.

PAGBASA GIKAN SA UNANG BASAHON SA MGA HARI

1 Kgs. 3: 5. 7-12

Usa ka gabii niana, samtang didto si Salomon sa Gabaon, mipakita kaniya ang Ginoo pinaagi sa usa ka damgo ug miingon kaniya, "Pangayo kanako bisag unsa." Ug si Salomon miingon: "O Ginoo nga akong Dios, gihimo mong hari ang imong alagad ilis sa akong amahan nga si David, bisan tuod batan-on pa ako kaayo, ug walay hibangkaagan sa pagpangulo. Ug ang imong alagad ania sa taliwala sa katawhan nga imong gipili, usa ka dako nga katawhan nga dili maihap tungod sa kadaghan. Busa hatagi ang imong alagad og kaalam aron mahibalo siya pagdumala sa imong katawhan, uban ang katarong; kay kinsa may makamando niining daghang katawhan?" Nahimuot ang Ginoo nga kini ang gipangayo ni Salomon. Ug giingnan siya sa Dios, "Tungod kay kini man ang imong gipangayo, ug wala ka mangayo og taas nga kinabuhi o bahandi o sa kinabuhi sa imong mga kaaway, hatagan ko ikaw sa imong gipangayo. Hatagan ko ikawg kaalam nga wala pa maangkon ni bisan kinsa kaniadto ni sa umaabot nga panahon."

SALMO RESPONSORYO

Ps. 119: 57. 72. 76-77. 127-128. 129-130

T. Ginoo, gihigugma ko ang imong mga sugo.

Nagaingon ako, O Ginoo, nga ang akong bahin mao ang pag-amping sa imong mga pulong. Ang balaod sa imong ba -ba mas bililhon alang kanako kay sa linibo nga salapi nga bulawan ug plata.

T. Ginoo, gihigugma ko ang imong mga sugo.

Maghupay unta kanako ang imong kaluoy sumala sa imong saad ngadto sa imong mga sulugoon. Padangata kanako ang imong kaluoy aron mabuhi ako kay ang imong balaod maoy akong kalipay.

T. Ginoo, gihigugma ko ang imong mga sugo.

Kay gihigugma ko ang imong sugo labaw sa bulawan bisan unsa katahum. Kay diha sa tanan mong mga kasugoan nagapadayon ako paglakaw; kaaway ko ang tanang dautan nga agianan.

T. Ginoo, gihigugma ko ang imong mga sugo.

Katingalahan ang imong mga gimbut-an; busa ako silang gituman. Ang pagpadayag sa imong mga pulong nagahatag og kahayag, nagahatag og salabutan sa tawo nga yano.

T. Ginoo, gihigugma ko ang imong mga sugo.

PAGBASA GIKAN SA SULAT NI SAN PABLO NGADTO SA TAGA-ROMA

Rom. 8: 28-30

Nasayod kita nga diha sa tanang butang nagbuhat ang Dios alang sa kaayohan niadtong nahigugma kaniya ug sa iyang mga tinawag sumala sa iyang tuyo. Kadtong gipili nang daan sa Dios, gilain niya aron mahisama sa iyang Anak, aron ang iyang Anak mahimong kamagulangan sa daghang mga magsuon. Busa gitawag sa Dios kadtong iya nang gilain; wala lamang niya tagwa sila kondili gihimo usab niyang matarong ug gipaambit sa iyang himaya.

BERSO SA DILI PA ANG EBANGHELYO

Aleluya! Ako mao ang dalan, ang kamatuoran, ug ang kinabuhi, nag-ingon ang Ginoo; walay moadto sa Amahan, kondili moagi kanako. Aleluya!

PAGBASA SA SANTOS NGA EBANGHELYO SUMALA NI SAN MATEO

Mt. 13: 44-52

Si Jesus miingon ngadto sa katawhan, "Ang Gingharian sa langit sama sa usa ka bahandi nga gilubong didto sa usa ka uma. Ug nahitabo nga hikalutan kini sa usa ka tawo, apan iyang gilubong pag-usab. Hilabihan niyang lipaya ug tungod niini milakaw siya ug iyang gibaligya ang tanan niyang katigayonan, ug unya mibalik siya ug iyang gipalit ang uma." "Ang Gingharian sa langit sama usab sa usa ka negosyante nga nangitag maanindot nga mga mutya. Sa dihang nakakaplag siyag usa ka mutya nga may talagsaong kaanindot, milakaw siya ug gibaligya ang tanan niyang katigayonan, ug unya gipalit ang mutya." "Ang Gingharian sa langit sama usab sa usa ka baling nga gitaktak didto sa lanaw, nga nakakuha sa tanang matang sa isda. Inigkapuno na niini, bitaron kini sa mga mananagat ngadto sa daplin sa lanaw ug manlingkod sila aron paghagpat sa isda: ang mga maayong isda isulod nila sa ilang mga bukag, ug ang walay pulos ilang isalibay. Mao usab kini ang mahitabo sa katapusan sa kalibutan: moanhi ang mga anghel ug lainon nila ang mga daotang tawo gikan sa mga maayo, ug itambog sila ngadto sa hudno nga nagdilaab. Didto maghilak sila ug magkagot ang ilang mga ngipon." "Nakasabut ba kamo niining mga butanga?" nangutana si Jesus kanila. "Oo," mitubag sila. Busa miingon siya, "Sa ato pa, ang tanang magtutudlo sa Balaod nga nahimong tinun-an sa Gingharian sa langit sama sa usa ka tagbalay nga nagkuhag bag-o ug karaang mga butang gikan sa iyang tipiganan."

ANTIPONA SA PANGALAWAT

Dayga ang Ginoo, kalag ko, ug hinumdomi ang tanan niyang kaayo.