[F] Santiago, apostol

ANTIPONA SA PAGSUGOD

Samtang naglakaw si Jesus daplin sa Lanaw sa Galilea, nakita niya ang magsuon nga si Santiago ug si Juan, mga anak ni Zebedeo, nag-andam sa ilang mga pukot ug gitawag sila aron mosunod niya.

PAGBASA GIKAN SA IKADUHANG SULAT NI SAN PABLO NGADTO SA TAGA-CORINTO

2 Cor. 4: 7-15

Apan kami nga nagbaton niining espirituhanong bahandi, sama kami sa mga kolon sa hinimo gikan sa lapok, aron sa pagpakita nga ang labing dakong gahom iya sa Dios, ug dili amoa. Gisakit kami kanunay, apan wala gayod kawad-ig paglaum; gilutos kami, apan wala gayod kawad-ig higala, ug bisan tuod gidagmalan sa makadaghan, wala kami mamatay. Sa tanang panahon gidala namo sa among lawas ang kamatayon ni Jesus aron ang iyang kinabuhi makita dinhi sa among lawas. Sa tibuok namong kinabuhi kanunay kaming namiligro nga mamatay tungod kang Jesus aron makita ang iyang kinabuhi dinhi sa among lawas nga may kamatayon. Kini nagpasabot nga dinhi kanamo, ang kamatayon maoy naggahom; apan diha kaninyo maoy naggahom ang kinabuhi. Ang Kasulatan nag-ingon, "Misulti ako tungod kay mituo man ako." Sa samang diwa sa pagtuo, misulti usab kami tungod kay mituo man kami. Kay nasayod kami nga ang Dios nga nagbanhaw sa Ginoong Jesus, magbanhaw usab kanamo uban kang Jesus, ug iya kaming dad-on uban kaninyo ngadto sa iyang atubangan. Gibuhat kining tanan tungod kaninyo ug sa magakadaghan ang mga tawo nga makadawat sa grasya sa Dios, molabi kadaghan ang ilang mga pag-ampo sa pasalamat alang sa himaya sa Dios.

SALMO RESPONSORYO

Ps. 126: 1-2. 2-3. 4-5. 6

T. Sila nga nagpugas nga naghilak, mag-ani nga uban sa singgit sa kalipay.

Sa pagbalik sa Ginoo sa mga bihag sa Sion, nahisama kita sa mga tawo nga nagdamgo. Ang atong mga ba-ba napuno sa katawa, ang atong mga dila sa mga hudyaka.

T. Sila nga nagpugas nga naghilak, mag-ani nga uban sa singgit sa kalipay.

Unya nag-ingon sila dinha sa kanasuran, "Gihimoan sila sa Ginoo og dagkong mga butang." Gihimoan kita sa Ginoo og dagkong mga butang; ug nalipay gayod kita.

T. Sila nga nagpugas nga naghilak, mag-ani nga uban sa singgit sa kalipay.

O Ginoo, iuli ang among kapalaran, sama sa mga sapa diha sa kamingawan. Sila nga nagpugas nga naghilak mag-ani nga magkatawa.

T. Sila nga nagpugas nga naghilak, mag-ani nga uban sa singgit sa kalipay.

Bisag nanggula sila nga nagdangoyngoy nagdala sa binhi nga igsasabod. Mamauli sila nga maghudyaka, managdala sa ilang ginalab.

T. Sila nga nagpugas nga naghilak, mag-ani nga uban sa singgit sa kalipay.

BERSO SA DILI PA ANG EBANGHELYO

Aleluya! Ako ang nagpili kaninyo, ug gipili ko kamo ug mamungag daghan—mga bunga nga molungtad. Nag-ingon ang Ginoo. Aleluya!

PAGBASA SA SANTOS NGA EBANGHELYO SUMALA NI SAN MATEO

Mt. 20: 20-28

Unya ang asawa ni Sebedeo miadto kang Jesus uban sa iyang mga anak, miyukbo kaniya, ug mihangyo kaniyag usa ka butang. Nangutana si Jesus kaniya, "Unsa may imong gusto?" Siya mitubag, "Isaad kanako nga kining duha ko ka anak palingkoron mo sa imong tuo ug sa imong wala kon maghari ka na." Si Jesus mitubag kanila, "Wala kamo masayod sa inyong gipangayo. Makahimo ba kamo pag-inom sa kupa nga sa dili madugay akong imnan?" Sila mitubag, "Oo makahimo." Si Jesus miingon kanila, "Kamo makainom gayod gikan sa akong kupa, apan wala akoy katungod pagpili kon kinsa ang palingkoron sa akong tuo ug sa akong wala. Kining mga dapita alang lamang niadtong giandaman niini sa akong Amahan." Sa pagkadungog niini sa napulo ka tinun-an, nangasuko sila sa duha ka magsuon. Busa gitawag ni Jesus silang tanan ug giingnan, "Nasayod kamo nga ang mga punoan naghari sa mga tawo, ug ang mga kadagkoan nagmando kanila. Apan dili kini mao ang paagi nga angay ninyong sundon. Kon usa kaninyo buot mahimong dako, kinahanglan nga mag-alagad siya sa tanan; ug kon usa kaninyo buot nga molabaw sa tanan kinahanglan nga magpaulipon siya ninyo—sama sa Anak sa Tawo nga wala moanhi aron alagaran, kondili sa pag-alagad ug paghatag sa iyang kinabuhi aron pagluwas sa daghang tawo."

ANTIPONA SA PANGALAWAT

Miinom sila sa kalis sa Ginoo, ug nahimong mga higala sa Dios.