Biyernes sa Ikanapulo'g Unom nga Semana sa Ordinaryong Panahon

ANTIPONA SA PAGSUGOD

Ang Dios mao ang akong hinabang. Ang Ginoo maoy gisaligan sa akong kinabuhi. Halaran ko ikaw og sakripisyo, daygon ko ang imong ngalan, O Ginoo, tungod sa imong kaayo.

PAGBASA GIKAN SA BASAHON NI PROPETA JEREMIAS

Jer. 3: 14-17

"Balik kanako, O katawhan nga maluibon, kay ako man ang inyong Dios. Magkuha akog usa kaninyo gikan sa matag lungsod ug duha ka tawo gikan sa matag banay, ug dad-on ko kamo balik ngadto sa Bukid sa Sion. Hatagan ko kamog mga pangulo nga masinugtanon kanako, ug magdumala sila kaninyo uban sa kahibalo ug kaalam. Unya inigsanay na ninyo pag-ayo, dili na hisgotan sa katawhan ang Sudlanan sa Kasabotan sa Ginoo, Dili na kini nila hinumdoman, kay dili na man nila kini kinahanglanon, ni magtinguha pa sila pagbuhat ug lain. Inig-abot na niadtong higayona, ang Jerusalem tawgon nga trono sa Ginoo ug adto na didto magsimba kanako ang tanang kanasuran. Dili na sila magbuhat sumala sa sugyot sa tig-a ug dautan nilang kasingkasing."

SALMO RESPONSORYO

Jer. 31: 10. 11-12. 13

T. Ang Ginoo nagbantay kanato, maingon sa usa ka magbalantay nga nagbantay sa iyang panon.

Pamati-a, O mga nasod, isangyaw kini sa lagyo nga mga yuta, ug ingna: Siya nga nagpatibulaag sa Israel, nagatigum karon kanila, nagabantay siya kanila ingon sa usa ka magbalantay sa iyang panon.

T. Ang Ginoo nagbantay kanato, maingon sa usa ka magbalantay nga nagbantay sa iyang panon.

Ang Ginoo maglukat kang Jacob, magluwas siya kaniya gikan sa kamot sa iyang kaaway. Sa pagsinggit, motungas sila sa kinatumyan sa Sion, magnayan sila ngadto sa mga panalangin sa Ginoo; Ang trigo, ang bino ug ang lana ang karnero ug ang mga baka.

T. Ang Ginoo nagbantay kanato, maingon sa usa ka magbalantay nga nagbantay sa iyang panon.

Unya ang mga dalaga magsadya ug mosayaw, ang mga batan-on nga mga lalaki ug usab ang mga tigulang. Himoon ko ang ilang pagbangotan nga kasadya, lipayon ko ug hupayon ko sila human sa ilang mga kasubo.

T. Ang Ginoo nagbantay kanato, maingon sa usa ka magbalantay nga nagbantay sa iyang panon.

BERSO SA DILI PA ANG EBANGHELYO

Aleluya! Kon karon makadungog kamo sa iyang tingog, ayaw patig-aha ang inyong mga kasingkasing. Aleluya!

PAGBASA SA SANTOS NGA EBANGHELYO SUMALA NI SAN MATEO

Mt. 13: 18-23

Si Jesus miingon sa iyang mga tinun-an, "Busa pamati kamo, ug sabta ninyo ang kahulugan sa sambingay mahitungod sa magpupugas. Kadtong nakadungog sa mensahe mahitungod sa gingharian apan wala makasabut niini mao ang binhi nga nahulog didto sa agianan. Miabot ang Yawa ug gisakmit ang gipugas didto kanila. Ang binhi nga nahulog sa yutang batoon mao ang mga tawo nga malipayong midawat sa mensahe sa pagkadungog nila niini. Apan dili kini makagamot diha kanila, busa dili sila molahutay. Sa pag-abot sa mga kalisdanan ug mga paglutos tungod sa mensahe, moundang dayon sila. Ug ang binhi nga nahulog sa dapit sa mga sampinit mao ang mga tawo nga nakadungog sa mensahe, apan ang mga kabalaka bahin niining kinabuhia ug ang gugma alang sa mga bahandi molumos sa mensahe, ug dili sila makabunga. Ug ang binhi nga napugas didto sa maayong yuta mao ang mga tawo nga nakadungog ug nakasabut sa mensahe; mamunga sila: may mamungag taggatos, ang uban tagkan-uman, ug ang uban tagkatloan."

ANTIPONA SA PANGALAWAT

Ang Ginoo nagpahinumdom sa mga katingalahan nga iyang nabuhat kanato. Siya maluluy-on ug mahigugmaon; siya nag-andam sa tanang kinahanglanon alang sa makanunayon nga nag-alagad kaniya.