Huwebes sa Ikanapulo'g Unom nga Semana sa Ordinaryong Panahon

ANTIPONA SA PAGSUGOD

Ang Dios mao ang akong hinabang. Ang Ginoo maoy gisaligan sa akong kinabuhi. Halaran ko ikaw og sakripisyo, daygon ko ang imong ngalan, O Ginoo, tungod sa imong kaayo.

PAGBASA GIKAN SA BASAHON NI PROPETA JEREMIAS

Jer. 2: 1-3. 7-8. 12-13

Gisugo ako sa Ginoo sa pag-adto sa Jerusalem aron pagsangyaw sa iyang mensahe sa tanang molupyo sa maong siyudad. "Wala ako malimot sa imong kabuotan sa batan-on pa ikaw, ug sa lunsay nga gugma mo kanako sa bag-o pa kitang naminyo; miunong ka nako bisan sa kamingawan, ug bisan sa dapit nga walay tanom. Akoa ikaw, O Israel, ikaw ang labing maayo sa akong anihon; gikastigo ko ang tanan nga nagsakit kanimo, ug gipadad-an ko silag kasamok. Ako, ang Ginoo, maoy nagsulti niini." Gidala ko sila ngadto sa tabunok nga yuta, aron magpahimulos sila sa abot sa uma niini, ug uban pang maayong mga butang. Apan gihugawhugawan nila ang yuta nga gihatag ko kanila. Ang kaparian wala na magtagad kon hain ang Ginoo; ang mga batid sa balaod wala gani makaila kanako. Misupil kanako ang mga kadagkoan; ang mga propeta nagsulti na sa ngalan ni Baal, ug nagsimba sa walay pulos nga mga diosdios. "Busa, ako, ang Ginoo, nagpakurog sa langit aron malisang ug mahibulong ang katawhan. Duha ka matang sa sala nga nahimo sa akong katawhan: Mibiya sila kanako, ang tinubdan sa bugnawng tubig, ug nagkawot hinuon silag atabay nga dali rang mohubas."

SALMO RESPONSORYO

Ps. 36: 6-7. 8-9. 10-11

T. O Ginoo, ikaw ang tinubdan sa kinabuhi.

O Ginoo, ang imong kalooy nagaabot sa kalangitan; ang imong kamatinud-anon, ngadto sa kapanganoran, Ang imong katarong saman sa kabukiran sa Dios; ang imong mga hukom, ingon sa gamhanang kahiladman.

T. O Ginoo, ikaw ang tinubdan sa kinabuhi.

Pagkabililhon sa imong kalooy, O Dios. Ang mga anak sa mga tawo nagadangop sa landong sa imong mga pako. Napuno sila sa unang mga gasa sa imong balay; gikan sa imong makalipay nga mga sapa imo silang gitagaan og tubig aron imnon. .

T. O Ginoo, ikaw ang tinubdan sa kinabuhi.

Kay diha kanimo anaa ang tinubdan sa kinabuhi, ug diha sa imong kahayag nakakita kamig kahayag. Padayona ang imong kalooy alang sa imong mga kahigalaan, ang imong makataronganon nga panalipod sa tawo nga matarong og kasingkasing.

T. O Ginoo, ikaw ang tinubdan sa kinabuhi.

BERSO SA DILI PA ANG EBANGHELYO

Aleluya! Nagalaum ako sa Ginoo, nagasalig ako sa iyang Pulong. Aleluya!

PAGBASA SA SANTOS NGA EBANGHELYO SUMALA NI SAN MATEO

Mt. 13: 10-17

Unya ang mga tinun-an miduol kang Jesus ug nangutana kaniya, "Nganong maggamit ka mag sambingay inigsulti mo kanila?" Si Jesus mitubag: "Ang mga tinago sa Gingharian sa Langit gipadayag na kaninyo, apan wala ipadayag kanila. Kay ang adunay iya, dugangan pa aron maiya ang labaw sa iyang gikinahanglan; apan ang tawo nga walay nahot, kuhaan pa gayod bisan gani sa diyotay nga iyaha. Kini ang katarungan nga naggamit ako og mga sambingay kon magsulti kanila; kay nagtan-aw sila, apan dili makakita, ug namati sila, apan dili makadungog ni makasabut. Busa natuman ang panagna ni Isaias: 'Bisag unsaon ninyo pagpamati, dili kamo makasabut; bisag unsaon ninyo pagtan-aw, dili kamo makakita. Kay kining mga tawhana gahig ulo; Gisampungan nila ang ilang mga dalunggan, ug gipiyong ang ilang mga mata. Kay dili sila buot makakita, ug dili buot makadungog, kay tingali unyag makasabut sila ug mobalik kanako, ug sila akong ayohon, nag-ingon ang Dios.' Apan kamo, pagkabulahan ninyo! Kay makakita ang inyong mga mata ug makadungog ang inyong mga dalunggan. Hinumdumi kini: daghang mga propeta ug daghang mga tawo sa Dios nga buot gayod unta motan-aw sa inyong nakita, apan wala sila makakita; ug mamati unta sa inyong nadungog, apan wala sila makabati."

ANTIPONA SA PANGALAWAT

Ang Ginoo nagpahinumdom sa mga katingalahan nga iyang nabuhat kanato. Siya maluluy-on ug mahigugmaon; siya nag-andam sa tanang kinahanglanon alang sa makanunayon nga nag-alagad kaniya.