[F] Santa Maria Magdalena

PAGBASA GIKAN SA AWIT SA MGA AWIT

Sg. 3: 1-4

Matag gabii, sa akong higdaanan, nagdamgo ako sa akong minahal; gipangita ko siya, apan wala ko siya hikaplagi. Mibangon ako ug misuroy sa siyudad, sa kadalanan ug sa kasuoksuokan; gipangita ko ang akong hinigugma, apan wala ko siya hikaplagi. Hitagboan ako sa mga guwardiya nga nagpatrolya sa siyudad. Gipangutana ko sila, "Wala ba kamo makakita sa akong hinigugma?" Apan sa pagbiya ko gayod sa mga guwardiya, hikaplagan ko ang akong hinigugma. Ako siyang gigakos ug wala ko siya palakta hangtod nga nadala ko siya sa balay sa akong inahan, sa lawak sa nag-anak kanako.

PAGBASA GIKAN SA IKADUHANG SULAT NI SAN PABLO NGADTO SA TAGA-CORINTO

2 Cor. 5: 14-17

Kay giharian kami sa gugma ni Cristo ug kay nasayod kami nga may usa ka tawo nga namatay alang sa tanan ug kini nagpasabot nga ang tanang mga tawo nakaambit sa iyang kamatayon. Namatay siya alang sa tanang mga tawo aron ang mga buhi dili na magkinabuhi alang sa ilang kaugalingon kondili alang kaniya nga namatay ug gibanhaw tungod kanila. Busa dili na kami maghukom kang bisan kinsa pinaagi sa tawhanong sukdanan. Kaniadto among gihukman si Cristo sa tawhanong sukdanan apan karon dili na kini namo buhaton. Kay bisan kinsa nga nahiusa kang Cristo, bag-o na siyang binuhat. Ang daan miagi na ug ang bag-o miabot na.

SALMO RESPONSORYO

Ps. 63: 2. 3-4. 5-6. 8-9

Ang akong kalag giuhaw kanimo, O Ginoo, akong Dios.

O Dios, ikaw ang akong Dios nga akong gipangita; kanimo nangandoy ang akong unod ug giuhaw ang akong kalag sama sa yuta nga uhaw, walay kinabuhi ug walay tubig.

Ang akong kalag giuhaw kanimo, O Ginoo, akong Dios.

Sa ingon nagsud-ong kanimo diha sa santuwaryo aron pagtan-aw sa imong gahom ug sa imong himaya. Kay ang imong kaluoy mas maayo kay sa kinabuhi; ang akong mga ngabil maghimaya kanimo.

Ang akong kalag giuhaw kanimo, O Ginoo, akong Dios.

Sa ingon niini daygon ko ikaw samtang buhi pa ako, sa pagbayaw ko sa akong mga kamut sangpiton ko ang imong ngalan. Ingon sa kabuhong sa usa ka bangkite mabusog ang akong kalag, ug sa masadya nga mga ngabil magdayeg kanimo ang akong baba.

Ang akong kalag giuhaw kanimo, O Ginoo, akong Dios.

Ikaw ang akong hinabang, ug diha sa landong sa imong mga pako nagasinggit ako sa kalipay. Ang akong kalag nagadangop pag-ayo kanimo; ang imong tuong kamut nagasapnay kanako.

Ang akong kalag giuhaw kanimo, O Ginoo, akong Dios.

PAGBASA SA SANTOS NGA EBANGHELYO SUMALA NI SAN JUAN

Jn. 20: 1-2. 11-18

Sayo sa Domingo sa buntag, samtang ngitngit pa, si Maria Magdalena miadto sa lubnganan ug nakita niya nga ang bato naligid na gikan sa baba sa lubnganan. Midagan siya ug miadto kang Simon Pedro ug sa tinun-an nga gimahal ni Jesus, ug giingnan niya sila, "Gikuha nila sa lubnganan ang Ginoo ug wala kami mahibalo kon hain nila ibutang siya!" Naghilak si Maria nga nagbarog didto sa gawas sa lubnganan. Unya mitikubo siya aron paglili sa lubnganan, ug nakita niya didto ang duha ka anghel nga nagbistig puti ug naglingkod sa dapit nga nahimutangan sa lawas ni Jesus, ang usa didto dapit sa iyang ulo, ug ang usa dapit sa iyang tiil. "Day, nganong naghilak ka man?" Sila nangutana kaniya. Siya mitubag, "Ila man god nga gikuha ang akong Ginoo, ug wala ako mahibalo kon hain nila ibutang siya!" Sa pagkahuman niyag sulti niini, milingi siya ug iyang nakita si Jesus nga nagbarog didto; apan wala siya makaila nga si Jesus diay kadto. "Day, nganong naghilak ka man?" nangutana si Jesus kaniya. "Kinsa man ang imong gipangita?" Nagtuo si Maria nga siya mao ang hardinero, busa miingon siya kaniya, "Kon ikaw maoy nagkuha kaniya, tug-ani ako kon hain mo siya ibutang, kay kuhaon ko siya." Si Jesus miingon kaniya, "Maria!" Ug si Maria miatubang kang Jesus ug miingon sa Hebreo, "Rabboni!" (nga sa ato pa, "Magtutudlo.") Unya giingnan siya ni Jesus, "Ayaw akog hikapa kay wala pa ako mahibalik sa Amahan. Adtoa hinoon ang akong mga igsuon ug suginli sila nga moadto ako sa akong Amahan ug inyong Amahan, sa akong Dios ug inyong Dios." Busa gisuginlan ni Maria Magdalena ang mga tinun-an nga nakakita siya sa Ginoo, ug nga gisultihan siya ni Jesus niini.