Martes sa Ikanapulo'g Unom nga Semana sa Ordinaryong Panahon
[m] Saint Lawrence of Brindisi, priest and doctor of the Church
ANTIPONA SA PAGSUGOD
Ang Dios mao ang akong hinabang. Ang Ginoo maoy gisaligan sa akong kinabuhi. Halaran ko ikaw og sakripisyo, daygon ko ang imong ngalan, O Ginoo, tungod sa imong kaayo.
PAGBASA GIKAN SA BASAHON NI PROPETA MIQUEAS
Mi. 7: 14-15. 18-20
Ginoo, bantayi ang imong katawhan nga imong gipili, kay nag-inusara sila sa kamingawan nga gilibotan sa tabunok nga yuta. Pasibsiba sila sa Basan ug sa Galaad ingon kaniadto. Ginoo, paghimog milagro alang kanamo sama sa imong gihimo sa dihang gipagawas mo kami sa Ehipto. Ginoo, may Dios ba nga sama kanimo nga mopasaylo sa kasal-anan sa nahibilin mong katawhan? Dili siya maghambin ug kasuko hangtod sa kahangturan kay maluluy-on man siya. Maluoy na usab siya kanato, tunobtunoban niya ang atong kasal-anan. Ilabog mo ang among mga sala ngadto sa kahiladman sa dagat. Ipakita mo ang imong pagkatinumanon ug gugmang walay paglubad ngadto sa imong katawhan, ang mga kaliwat ni Abraham ug ni Jacob, sumala gisaad mo sa among katigulangan sukad pa sa karaang panahon.
ANG PULONG SA GINOO.
SALMO RESPONSORYO
Ps. 85: 2-4. 5-6. 7-8
T. Ginoo, pakit-a kami sa imong kaluoy.
O Ginoo, gipanalangin mo ang imong yuta; giuli mo ang kahamugaway ni Jacob. Gipasaylo mo ang kalapasan sa imong lungsod; gitabonan mo ang tanan nilang mga sala. Gibakwi mo ang tanan mong kapungot; gisibog mo ang imong nagdilaab nga kasuko.
T. Ginoo, pakit-a kami sa imong kaluoy.
Ibalik kami, O Dios, among manluluwas, ug biyai ang imong kasuko batok kanamo. Masuko ka ba kanunay batok kanamo, padayonon mo ba ang imong kasuko ngadto sa tanang kaliwatan?
T. Ginoo, pakit-a kami sa imong kaluoy.
Dili ba hinoon hatagan mo kami og kinabuhi ug dili ba unya magsadya ang imong lungsod diha kanimo? Ipakita kanamo, O Ginoo, ang imong kaluoy, ug hatagi kami sa imong kaluwasan.
T. Ginoo, pakit-a kami sa imong kaluoy.
BERSO SA DILI PA ANG EBANGHELYO
Aleluya! Dayga ang Ginoo, O Jerusalem, nagpadala siya sa iyang pulong nganhi sa yuta. Aleluya!
PAGBASA SA SANTOS NGA EBANGHELYO SUMALA NI SAN MATEO
Mt. 12: 46-50
Samtang nakigsulti pa si Jesus ngadto sa katawhan, miabot ang iyang inahan ug mga igsuong lalaki. Nagtindog sila didto sa gawas ug buot makigsulti kaniya. Unya usa sa mga tawo didto miingon kaniya, "Ang imong inahan ug mga igsuon atua sa gawas, ug buot sila makigsulti kanimo." Si Jesus mitubag, "Kinsa man ang akong inahan? Kinsa man ang akong mga igsuon?" Unya gitudlo niya ang iyang mga tinun-an ug miingon, "Tan-awa! Kini sila mao ang akong inahan ug ang akong mga igsuon. Kay ang nagbuhat sa gisugo sa akong Amahan nga atua sa langit mao ang akong inahan ug mga igsuon."
ANG EBANGHELYO SA GINOO.
ANTIPONA SA PANGALAWAT
Ang Ginoo nagpahinumdom sa mga katingalahan nga iyang nabuhat kanato. Siya maluluy-on ug mahigugmaon; siya nag-andam sa tanang kinahanglanon alang sa makanunayon nga nag-alagad kaniya.