Lunes sa Ikanapulo'g Unom nga Semana sa Ordinaryong Panahon

ANTIPONA SA PAGSUGOD

Ang Dios mao ang akong hinabang. Ang Ginoo maoy gisaligan sa akong kinabuhi. Halaran ko ikaw og sakripisyo, daygon ko ang imong ngalan, O Ginoo, tungod sa imong kaayo.

PAGBASA GIKAN SA BASAHON NI PROPETA MIQUEAS

Mi. 6: 1-4. 6-8

Pamati-a ang kiha sa Ginoo batok sa Israel. Ipahayag sa kabukiran ang imong sumbong; saysayi niini ang kabungtoran! Pamati-a, O kabukiran, ang kiha sa Ginoo sa iyang katawhan; kamong lig-ong mga sukaranan sa kalibutan, patalinghug kamo kay ang Ginoo makigharong sa Israel. Ang Ginoo nag-ingon, "Unsa bay nahimo ko kaninyo, O katawhan ko? Nganong gipul-an na man kamo kanako? Tubaga ninyo ako! Hinumdomi nga akoy nagkuha kaninyo sa Ehipto, ug nagluwas kaninyo sa kaulipnan; akoy nagpadala kang Moises, kang Aaron ug kang Miriam." Unsa may angay kong ihalad sa Ginoo inigsimba ko na kaniya? Magdala ba akog halad nga sunogon, mga nating baka nga usa ka tuig ang kagulangon? Malipay ba ang Ginoo sa linibong karnero ug sa napulo ka libong suba nga lana sa olibo? Dili! Igo na ba kon ihalad ko ang kamagulangan kong anak alang sa akong sala? Dili! Gipakita niya kanimo, O tawo, unsa ang maayo. Ang gipaabot sa Ginoo kanimo mao ang pagbuhat sa kaangayan, sa pagpakita sa makanunayong gugma ug sa pagkinabuhi diha sa mapaubsanong pakig-uban sa atong Dios.

SALMO RESPONSORYO

Ps. 50: 5-6. 8-9. 16-17. 21. 23

T. Sa matarong ipakita ko ang makaluluwas nga gahom sa Dios.

"Tapoka ang akong mga buotan diha sa akong atubangan, kamong nakigsabot kanako pinaagi sa sakripisyo." Ug ang mga langit magasangyaw sa iyang katarong; kay ang Dios mismo mao ang maghuhukom.

T. Sa matarong ipakita ko ang makaluluwas nga gahom sa Dios.

Dili tungod sa imong mga sakripisyo gibadlong ko ikaw, kay ang imong mga halad nga sinunog ania kanunay sa akong atubangan. Wala ako magkuha og toro gikan sa imong balay, ni mga kanding gikan sa imong panon.

T. Sa matarong ipakita ko ang makaluluwas nga gahom sa Dios.

"Nganong giasoy mo man ang akong kasugoan, ug gibungat mo ang akong kasabutan sa imong ba-ba, bisan kontra nimo ang disiplina ug gisalikway mo ang akong mga pulong?

T. Sa matarong ipakita ko ang makaluluwas nga gahom sa Dios.

Sa pagbuhat nimo niining mga butanga, magpakabungol ba na lamang ako? O naghunahuna ka ba nga sama ako kanimo? Badlongon ko ikaw diha sa pagpahinumdom ko kanila sa imo nga atubangan. Ang magahalad og pagdayeg agig sakripisyo nagahimaya kanako, ug kaniya nga naglakaw sa matarong ipakita ko ang kaluwasan sa Dios."

T. Sa matarong ipakita ko ang makaluluwas nga gahom sa Dios.

BERSO SA DILI PA ANG EBANGHELYO

Aleluya! Nagalaum ako sa Ginoo, nagasalig ako sa iyang Pulong. Aleluya!

PAGBASA SA SANTOS NGA EBANGHELYO SUMALA NI SAN MATEO

Mt. 12: 38-42

Unya pipila ka magtutudlo sa Balaod ug mga Pariseo miingon, "Magtutudlo, buot kami motan-aw kanimo nga maghimog milagro." "Pagkadaotan ug pagkawalay pagtuo sa Dios sa mga tawo niining panahona!" mituwaw si Jesus. "Milagro ang inyong gipangayo kanako? Dili ako mohimo niini. Ang milagro nga ikahatag ko kaninyo mao ra ang milagro nga nahitabo kang Jonas nga propeta. Ingon nga si Jonas tulo ka adlaw ug tulo ka gabii didto sa tiyan sa dakong isda, ang Anak sa Tawo usab tulo ka adlaw ug tulo ka gabii sa ilalom sa yuta. Sa Adlaw sa Paghukom ang mga tawo sa Ninibe mamangon ug mosudya kaninyo, kay naghinulsol man sila sa ilang mga sala sa pagkadungog nila sa wali ni Jonas; ug hibaloi nga dinhi aniay labaw pa kang Jonas! Sa Adlaw sa Paghukom ang Rayna sa Habagatan mobangon ug mosudya kaninyo, kay mipanaw siyag katunga sa kalibutan aron lang pagpamati sa makinaadmanong mga pagtulon-an ni Salomon; ug hibaloi nga dinhi aniay labaw pa kang Salomon!"

ANTIPONA SA PANGALAWAT

Ang Ginoo nagpahinumdom sa mga katingalahan nga iyang nabuhat kanato. Siya maluluy-on ug mahigugmaon; siya nag-andam sa tanang kinahanglanon alang sa makanunayon nga nag-alagad kaniya.