Ikanapulo'g Unom nga Dominggo sa Ordinaryong Panahon

ANTIPONA SA PAGSUGOD

Ang Dios mao ang akong hinabang. Ang Ginoo maoy gisaligan sa akong kinabuhi. Halaran ko ikaw og sakripisyo, daygon ko ang imong ngalan, O Ginoo, tungod sa imong kaayo.

PAGBASA GIKAN SA BASAHON SA KAALAM NI SOLOMON

Wis. 12: 13. 16-19

Ang tanang butang ilalom sa imong pag-atiman, ug walay laing Dios nga imong kasanghiran sa imong mga hukom. Ang imong kusog mao ang tinubdan sa hustisya. Makapakita ka ug kaluoy sa matag-usa, kay ikaw Ginoo man sa tanan. Nagapakita ka sa imong kusog sa diha nga ang mga tawo may katahap sa kahingpit sa imong gahom, ug gisilotan mo si bisan kinsa nga nahibalo sa imong gahom apan nangahas sa dili pagpanumbaling niini. Bisan aduna kay hingpit nga gahom, apan ikaw usa ka maluluy-on nga maghuhukom. Makabuhat ka unta bisan unsa batok kanamo sa bisan unsang panahon nga gusto mo, apan inay niana, gimandoan mo hinoon kami sa dakong pagpailob. Pinaagi sa mga butang nga imong nabuhat gitudloan nimo ang imong katawhan nga ang usa ka tawo nga matarong kinahanglan usab nga maluluy-on. Gihatagan mo ang imong katawhan og dakong paglaum pinaagi sa pagtugot kanila sa paghinulsol sa ilang mga sala.

SALMO RESPONSORYO

Ps. 86: 5-6. 9-10. 15-16

T. Ginoo, maayo Ikaw ug mapasayluon.

Ikaw, O Ginoo, maayo ug mapasayluon, puno sa kaluoy alang sa tanan nga magasangpit kanimo. Patalinghugi, O Ginoo, ang akong pag-ampo ug pamati-a ang tingog sa akong pangamuyo.

T. Ginoo, maayo Ikaw ug mapasayluon.

Ang tanang mga nasod nga imong gibuhat moabot ug mosimba kanimo, O Ginoo, ug maghimaya sa imong ngalan. Kay halangdon ka man ug naghimo ka og katingalahang mga buhat; ikaw lamang mao ang Dios.

T. Ginoo, maayo Ikaw ug mapasayluon.

Ikaw, O Ginoo, maoy usa ka Dios nga maluluy-on ug mahigugmaon, dugay nga masuko, puno sa kaluoy ug kamatinumanon. Lingia ako ug kaloy-i ako; ihatag ang imong kusog ngadto sa imong sulugoon.

T. Ginoo, maayo Ikaw ug mapasayluon.

PAGBASA GIKAN SA SULAT NI SAN PABLO NGADTO SA TAGA-ROMA

Rom. 8: 26-27

Sa samang pagkaagi, sa atong pagkahuyang tabangan kita sa Espiritu, kay wala kita masayod unsaon nato pag-ampo ang Espiritu mismo mangaliyupo sa Dios alang kanato, uban sa mga pag-agulo nga dili ikasaysay. Ug ang Dios nga nasayod sa kasingkasing sa tawo, nasayod unsay gihunahuna sa Espiritu, kay ang Espiritu mangaliyupo sa Dios alang sa iyang katawhan sumala sa iyang kabubut-on.

BERSO SA DILI PA ANG EBANGHELYO

Aleluya! Ang imong mga pulong, O Ginoo, Espiritu ug kinabuhi, naghupot ikaw sa mga pulong sa kinabuhi nga walay katapusan. Aleluya!

PAGBASA SA SANTOS NGA EBANGHELYO SUMALA NI SAN MATEO

Mt. 13: 24-43

Unya misugilon si Jesus kanilag laing sambingay: "Ang Gingharian sa langit sama sa usa ka tawo nga nagpugas og maayong binhi didto sa iyang uma. Usa niana ka gabii, samtang nangatulog ang tanan, usa ka kaaway miadto ug misabod og liso sa mga sagbot sagol sa trigo, ug unya mibiya. Sa nakatubo na ang mga tanom ug misugod na sa pagbuswak ang mga uhay, diha pa mailhi ang mga sagbot. Ang mga sulugoon sa tag-iya miduol kaniya ug miingon, 'Sir, maayong binhi ang gipugas mo sa imong uma, busa diin man gikan ang mga sagbot?' Siya mitubag, 'Usa ka kaaway ang naghimo niini.' Sila nangutana kaniya, 'Gusto ka bang pangibton namo ang mga sagbot?' Siya mitubag, 'Ayaw! Kay sa inyo unyang pagpangibot sa mga sagbot, maapil unyag kaibot ang trigo. Pasagdi ninyo nga ang trigo ug ang mga sagbot magdungag tubo hangtod sa ting-ani, kay ingnon ko ra unya ang mga mangangani: Ibta ninyo pag-una ang mga sagbot, bugkosa kini ug ilabay ngadto sa kalayo; apan tigoma ang trigo ug hiposa didto sa akong kamalig.'" Unya misugilon si Jesus og laing sambingay: "Ang Gingharian sa Langit sama sa liso sa mustasa, ang labing gamay sa tanang liso. Gikuha kini sa usa ka tawo ug gipugas didto sa iyang uma, ug sa pagtubo na sa maong binhi, nahimo kini nga labing dako sa tanang tanom. Kini nahimong kahoy, ug nanugpa ang mga langgam ug nagsalag sa iyang mga sanga." Si Jesus misugilon na usab kanila ug laing sambingay: "Ang Gingharian sa langit sama sa igpapatubo sa pan. Gikuha kini sa usa ka babaye ug gisagol sa usa ka takus nga harina hangtod mitubo ang tibuok minasa." Si Jesus migamit og mga sambingay aron pagsugilon niining mga butanga ngadto sa mga tawo; wala siyay gisulti kanila bisag unsa kondili pinaagig sambingay. Gihimo niya kini aron matuman ang giingon sa propeta: "Mogamit akog mga sambingay kon makigsulti ako kanila, suginlan ko silag mga butang nga wala pa hibaloi sukad mabuhat ang kalibutan." Unya mibiya si Jesus sa mga tawo ug misulod sa balay. Ang iyang mga tinun-an miduol kaniya ug miingon, "Sultihi kami sa kahulugan sa sambingay mahitungod sa mga sagbot sa uma." Si Jesus mitubag, "Ang tawo nga nagpugas sa maayong binhi mao ang Anak sa Tawo; ang uma mao ang kalibutan; ang maayong binhi mao ang mga tawo nga sakop sa Gingharian; ang mga sagbot mao ang mga tawo nga sakop sa yawa; ug ang kaaway nga nagsabod sa mga sagbot mao ang yawa. Ang pagpangani mao ang katapusan sa kalibutan, ug ang mangangani mao ang mga anghel. Maingon nga ang mga sagbot hipuson ug sunogon, mao usab kini ang mahitabo sa katapusan sa kalibutan: ang Anak sa Tawo magsugo sa iyang mga anghel sa paghipos gikan sa iyang gingharian sa tanan nga maoy nakaangin sa mga tawo sa pagpakasala, ingon man ang tanan nga nagbuhat og daotan, ug itambog sila ngadto sa hudno nga nagdilaab, diin maghilak sila ug magkagot ang ilang ngipon. Unya ang katawhan sa Dios modan-ag sama sa adlaw didto sa gingharian sa ilang Amahan. Busa pamati kon may dalunggan kamo."

ANTIPONA SA PANGALAWAT

Ang Ginoo nagpahinumdom sa mga katingalahan nga iyang nabuhat kanato. Siya maluluy-on ug mahigugmaon; siya nag-andam sa tanang kinahanglanon alang sa makanunayon nga nag-alagad kaniya.