Sabado sa Ikanapulo'g Lima nga Semana sa Ordinaryong Panahon

ANTIPONA SA PAGSUGOD

Sa akong katarong makakita ako sa imong nawong, O Ginoo; sa pagpakita sa imong himaya mahingpit ang akong kalipay.

PAGBASA GIKAN SA BASAHON NI PROPETA MIQUEAS

Mi. 2: 1-5

Alaot kadtong mga tawo nga bisag naghigda naglarawg dautan! Inigkabuntag, kon makahigayon na sila, buhaton nila ang ilang gilaraw. Ilang sakmiton ang mga uma nga ilang nagustohan, ingon man ang mga balay, ug mga kabtangan. Busa nag-ingon ang Ginoo, "Batok kaninyo may gilaraw akong dautan, nga dili gayod ninyo kalikayan; aron dili na kamo magpagarbo kay magkalisodlisod man kamo. Niadtong adlawa awitan kamo sa mga tawo ug awit sa pagbugalbugal; moingon sila, 'Wala na kami nahot, kay gikuha man sa Ginoo ang among yuta, gipahatpahat niya ang among mga kaumahan ngadto sa nagbihag kanamo,'" Busa walay usa kaninyo unya nga makadawat ug yuta inigbahinbahin na niini pag-usab.

SALMO RESPONSORYO

Ps. 10: 1-2. 3-4. 7-8. 14

T. O Ginoo, ayaw hikalimti ang kabus.

O Ginoo, nganong nagpalayo ka? Nganong mitago ka sa panahon sa kagul-anan? Ang dautan nagahasul nga mapahitas-on sa tawo nga gisakit nga nahimutang sa mga lit-ag nga gigama sa mga dautan.

T. O Ginoo, ayaw hikalimti ang kabus.

Kay ang dautang tawo nagahimaya sa iyang kahakog, ug ang dawo nanamastamas, wala magtagad sa Ginoo. Ang dautang tawo nangandak, "Dili siya manimalos niini"; "Walay Dios," maoy katibuk-an sa iyang mga hunahuna.

T. O Ginoo, ayaw hikalimti ang kabus.

Ang iyang ba-ba puno sa tunglo, kadautan ug limbong; ubos sa iyang dila anaa ang binuang ug kadautan. Nagahupo siya aron pagbudhi duol sa kabalangayan; sa tago gibuno niya ang walay sala; ang iyang mga mata nagabantay sa mga way palad.

T. O Ginoo, ayaw hikalimti ang kabus.

Ikaw nakakita, kay nagasud-ong ka sa kaalaut ug kaguol, gidawat mo sila diha sa imong mga kamut. Diha kanimo nagasalig ang way-palad nga tawo; sa mga ilo ikaw ang mananabang.

T. O Ginoo, ayaw hikalimti ang kabus.

BERSO SA DILI PA ANG EBANGHELYO

Aleluya! Ang tawo dili mabuhi sa pan lamang, kondili sa tanang pulong nga nagagikan sa baba sa Dios. Aleluya!

PAGBASA SA SANTOS NGA EBANGHELYO SUMALA NI SAN MATEO

Mt. 12: 14-21

Unya nanlakaw ang mga Pariseo ug naglaraw sa pagpatay kang Jesus. Sa pagkadungog ni Jesus niini, mibiya siya niadtong dapita; ug mikuyog kaniya ang daghang mga tawo. Giayo niya ang tanang masakiton, ug gidid-an sila pagpanugilon mahitungod kaniya, aron matuman ang giingon ni propeta Isaias: "Ang Dios nag-ingon, ania ang akong sulugoon nga akong gipili, ang akong gihigugma ug gikahimut-an. Kaniya pakunsaron ko ang akong Espiritu, ug isangyaw niya ang akong kabubut-on ngadto sa tanang katawhan. Apan dili siya makiglalis ni mosinggit, ni mohimo siyag masaba nga pakigpulong sa kadalanan; dili niya balion ang bawog nga bugang, ni palungon niya ang nagkaawop nga suga. Magpadayon siya sa iyang buhat hangtod nga mapatunhay niya ang hustisya; ug siyay mahimong paglaum sa tanang katawhan."

ANTIPONA SA PANGALAWAT

Ang langgam nakakaplag og puloy-anan, ang sayaw nakakitag salag nga kapuy-an sa iyang mga kuyabog diha sa imong mga altar, O Ginoo sa kagahuman, akong Dios. Bulahan sila nga nagapuyo diha sa imong balay, kay sa kanunay magadayeg sila kanimo.