Huwebes sa Ikanapulo'g Lima nga Semana sa Ordinaryong Panahon

ANTIPONA SA PAGSUGOD

Sa akong katarong makakita ako sa imong nawong, O Ginoo; sa pagpakita sa imong himaya mahingpit ang akong kalipay.

PAGBASA GIKAN SA BASAHON NI PROPETA ISAIAS

Is. 26: 7-9. 11. 16-19

Ginoo, hapsay ang dalan sa mga matarong; patag ang dalan nga ilang agian. Maghulat kami sa imong pagbuot, O Ginoo, ang paghandom sa imong ngalan maoy among kalipay. Panahon sa kagabhion nangandoy ako kanimo sa tibuok kong kasingkasing; sa diha nga hukman mo ang kalibutan ug ang katawhan niini, masayod silang tanan unsa gayod ang hustisya. Ikaw nga nagbuhat sa tanan alang kanamo, mohatag kanamo sa kalinaw. Gikastigo mo ang imong katawhan, Ginoo, ug sa ilang kaguol, nag-ampo sila kanimo. Tungod kanimo, Ginoo, sama kami sa usa ka babaye nga nagbati, nga naglit-ad-lit-ad sa kasakit, ug nagpakita sa iyang giantos tungod sa bata nga hapit na mogula; sama kami sa nagbati nga nag-antos sa kasakit, apan hangin ray among gianak. Kay wala man kami mosanay, wala nay mopuyo sa kalibutan. Mabanhaw ang imong mga patay, ug mobangon ang ilang mga lawas. Kamong nahitipon na sa abog mobangon ug moawit sa kalipay! Ingon nga ang yamog makapabugnaw sa yuta, banhawon sa Ginoo kadtong dugay nang nangamatay.

SALMO RESPONSORYO

Ps. 102: 13-14. 15. 16-18. 19-21

T. Gikan sa langit midung-aw ang Ginoo sa yuta.

Ikaw, O Ginoo, nagalungtad sa kahangturan, ug ang imong ngalan itaas sa tanang kaliwatan. Motindog ikaw ug malooy sa Sion, kay panahon na nga malooy ka kaniya. Kay ang iyang mga bato mahal alang sa imong mga sulugoon, ug ang iyang abog makatandog kanila aron sila maluoy.

T. Gikan sa langit midung-aw ang Ginoo sa yuta.

Ang mga nasod magtahod sa imong ngalan, O Ginoo, ug ang tanang mga hari sa yuta magtahod sa imong himaya, diha nga ang Ginoo magtukod pag-usab sa Sion ug mopakita diha sa iyang himaya; diha nga iyang tagdon ang pangamuyo sa biniyaan, ug iyang dunggon ang ilang mga pag-ampo.

T. Gikan sa langit midung-aw ang Ginoo sa yuta.

Isulat kini alang sa kaliwat nga umaabot, ug ang iyang umaabot nga mga binuhat padayga sa Ginoo: "Ang Ginoo midung-aw gikan sa iyang balaang bukid, gikan sa langit gitan-aw niya ang yuta, aron pagpamati sa agulo sa mga binilanggo, aron pagluwas kanila nga gihukman sa kamatayon."

T. Gikan sa langit midung-aw ang Ginoo sa yuta.

BERSO SA DILI PA ANG EBANGHELYO

Aleluya! Ang Ginoo matinud-anon diha sa tanan niyang mga pulong ug balaan diha sa iyang mga buhat. Aleluya!

PAGBASA SA SANTOS NGA EBANGHELYO SUMALA NI SAN MATEO

Mt. 11: 28-30

Si Jesus miingon sa iyang mga tinun-an: "Umari kamo kanako, kamong tanan nga gikapuyan ug gibug-atan sa inyong gipas-an, ug papahulayon ko kamo. Isangon ang akong yugo ug sunda ninyo ako, kay malumo ako ug mapaubsanon sa espiritu, ug makapahulay kamo. Sayon ang yugo nga akong ihatag kaninyo, ug gaan ang ipapas-an ko kaninyo."

ANTIPONA SA PANGALAWAT

Ang langgam nakakaplag og puloy-anan, ang sayaw nakakitag salag nga kapuy-an sa iyang mga kuyabog diha sa imong mga altar, O Ginoo sa kagahuman, akong Dios. Bulahan sila nga nagapuyo diha sa imong balay, kay sa kanunay magadayeg sila kanimo.