[M] San Buenaventura, obispo ug doktor sa Simbahan

ANTIPONA SA PAGSUGOD

Nag-ingon ang Ginoo, duawon ko ang akong kahayopan, ug patunghaon ko ang magbalantay nga mag-atiman nila. Apan ako ang Ginoo maoy mailang Dios.

PAGBASA GIKAN SA BASAHON NI PROPETA ISAIAS

Is. 10: 5-7. 13-16

Ang Ginoo miingon, "Ang Asiria mao ang bunal nga akong gamiton sa pagsilot sa akong gikasuk-an. Ipasulong ko sa Asiria ang nasod nga wala moila kanako, mga tawo nga nakapasuko kanako; gisugo ko siya sa pagpanulis ug pagyatakyatak sa katawhan nga daw lapok sa kadalanan." Apan may dautang laraw ang hari sa Asiria; maoy tuyo niya ang paglaglag ug paghanaw sa daghang kanasuran; Kay miingon man ang hari sa Asiria, "Ang kusog sa akong kamut maoy naghimo niini, ingon man ang akong kaalam; giilog ko ang mga nasod ug gisakmit ko ang ilang mga katigayonan; sama sa usa ka torong baka gilumpag ko ang ilang mga trono, ug gipalukapa ko ang naglingkod niini. Nakaplagan ko daw naa sa salag ang bahandi sa katawhan; ug ingon sa mga tawo nga nanguha sa mga itlog nga gipamiyaan na, gihipos ko ang tibuok kalibutan; ug walay kuyabog didto nga mikapakapa o minganga o mipiyak." Apan ang Ginoo miingon, "Manghambog ba ang wasay nga labaw siya kaysa tawo nga naggamit niini? O magpagarbo ba ang gabas batok sa tawo nga naggamit niini? Ang lipak bay mobunal sa naggunit niini? O ang sungkod ba hinoon ang moalsa sa tawo nga nagsungkod niini?" Ang Ginoo nga Labing Gamhanan magpadalag sakit aron pagsilot sa mga maayog lawas; diha kanila magdilaab kanunay ang kalayo.

SALMO RESPONSORYO

Ps. 94: 5-6. 7-8. 9-10. 14-15

T. Ang Ginoo dili mobiya sa iyang lungsod.

O Ginoo, ilang giyatakan ang imong lungsod, ilang gisakit ang imong kabilin. Ilang gipatay ang balo ug langyaw ilang gibuno ang ilo.

T. Ang Ginoo dili mobiya sa iyang lungsod.

Ug nagaingon sila, "Ang Ginoo dili makakita; ang Dios ni Jacob dili makamatngon." Sabta ninyo, kamong mga walay buot diha sa katawhan; ug kamong mga buang, anus-a man kamo makakat-on?

T. Ang Ginoo dili mobiya sa iyang lungsod.

Siya nga naghimo sa dunggan dili ba makadungog? Siya nga nagbuhat sa mata dili ba makakita? Siya nga nagatudlo sa kanasuran dili ba mobadlong, siya nga naghatag sa mga tawo og kahibalo?

T. Ang Ginoo dili mobiya sa iyang lungsod.

Kay ang Ginoo dili mobiya sa iyang lungsod, ni magpasagad sa iyang kabilin; Apan ang panghukom maanaa na usab uban sa katarong, ug ang tanang mga matarong og kasingkasing magsunod niini.

T. Ang Ginoo dili mobiya sa iyang lungsod.

BERSO SA DILI PA ANG EBANGHELYO

Aleluya! Nagalaum ako sa Ginoo, nagasalig ako sa iyang Pulong. Aleluya!

PAGBASA SA SANTOS NGA EBANGHELYO SUMALA NI SAN MATEO

Mt. 11: 25-27

Unya si Jesus miingon, "O Amahan, Ginoo sa langit ug sa yuta! Nagpasalamat ako kanimo kay gipadayag mo man ngadto sa mga walay kahibalo ang imong gililong sa mga maalamon ug sa mga makinaadmanon. Oo, Amahan, natuman kini kay mao may imong gusto ug pagbuot." "Ang akong Amahan naghatag kanako sa tanang butang. Walay nakaila sa Anak gawas sa Amahan, ug walay nakaila sa Amahan gawas sa Anak ug kadtong mga tawo nga buot sa Anak nga makaila sa Amahan."

ANTIPONA SA PANGALAWAT

Wala kamo magpili kanako, nag-ingon ang Ginoo; kondili ako maoy nagpili kaninyo, ug nagbutang kaninyo aron manlakaw kamo ug maghatag og daghang bunga, ug ang inyong bunga magpabilin.