Martes sa Ikanapulo'g Lima nga Semana sa Ordinaryong Panahon

ANTIPONA SA PAGSUGOD

Sa akong katarong makakita ako sa imong nawong, O Ginoo; sa pagpakita sa imong himaya mahingpit ang akong kalipay.

PAGBASA GIKAN SA BASAHON NI PROPETA ISAIAS

Is. 7: 1-9

Sa panahon nga si Acas, anak ni Jotan, ug apo ni Oseas, maoy naghari sa Juda, misulong sa Jerusalem si Rasin, hari sa Siria, ug si Peka, ang anak ni Romelia nga hari sa Israel, apan wala nila kini mabuntog. Sa pagkabalita sa hari sa Juda nga ang kasundalohan sa Siria nakasulod na sa yuta sa Israel, nalisang siya ug ang iyang katawhan ug nangurog sila ingon sa kakahoyan sa lasang nga gihuros sa hangin. Ug miingon ang Ginoo kang Isaias, "Lakaw, sugata si Acas. Paubana si Sirhasub nga imong anak. Si Acas atua sa tumoy sa kanal sa tubig sa ibabaw nga linaw duol sa dalan paingon sa uma nga ginganlag Uma sa Maglalaba. Ingna si Acas, 'Pagbantay ug ayaw kahadlok sa kasuko ni Hari Rasin ug ni Hari Peka kay sila sama lamang sa aso sa duha ka agipo nga nagkapalong na. Naglarawg mangil-ad batok kanimo ang Siria ug ang Israel.' Nag-ingon sila, "Sulongon ta ang Juda ug lisangon ta kini; ug buntogon ta kini aron maato, ug paharion ta didto ang anak ni Tabeel." Tungod niini nag-ingon ang Ginoong Dios: "Dili kini mahimo ug dili kini mahitabo. Kay ang Siria sama ra kahuyang sa Damasco, ug ang Damasco sama ra kahuyang ni Rasin. (Kan-umag lima ka tuig gikan karon mabungkag ang Israel, ug dili na mahimong nasod.) Ang Israel sama ra kahuyang sa siyudad sa Samaria, ug ang Samaria sama ra kahuyang kang Hari Peka. Kon kulang kag pagtuo dili ka gayod molungtad."

SALMO RESPONSORYO

Ps. 48: 2-3. 3-4. 5-6. 7-8

T. Ang Dios nagasagang sa iyang siyudad hangtod sa kahangturan.

Halangdon ang Ginoo ug angayng daygon diha sa siyudad sa atong Dios. Ang iyang balaang bukid, labing matahom sa kabukiran, mao ang kalipay sa tibuok nga kalibutan.

T. Ang Dios nagasagang sa iyang siyudad hangtod sa kahangturan.

Ang bukid sa Sion, "Ang kinalay-an sa Amihanan," mao ang siyudad sa dakong Hari. Ang Dios anaa sa iyang mga kota; gibantog siya sa pagka dalangpanan.

T. Ang Dios nagasagang sa iyang siyudad hangtod sa kahangturan.

Kay ania, nagatigum ang mga hari, nagakuyog sila sa pagpangabut; nakakita usab sila, ug nalipong dayon, nangalisang, nangaparot.

T. Ang Dios nagasagang sa iyang siyudad hangtod sa kahangturan.

Nangurog sila didto; masakit, ingog babaye nga nagbati, ingon og usa ka hangin gikan sa Silangan, mihapak sa mga sakayan sa Tarsis.

T. Ang Dios nagasagang sa iyang siyudad hangtod sa kahangturan.

BERSO SA DILI PA ANG EBANGHELYO

Aleluya! Ipadan-ag ang imong nawong ngari sa imong sulugoon, ug tudloi ako sa imong mga balaod. Aleluya!

PAGBASA SA SANTOS NGA EBANGHELYO SUMALA NI SAN MATEO

Mt. 11: 20-24

Unya gisaway ni Jesus ang mga lungsod diin himoa niya ang kadaghanan sa iyang mga milagro, kay ang mga tawo wala man maghinulsol sa ilang mga sala. "Pagkaalaot nimo, Corasin! Pagkaalaot usab nimo, Betsaida! Kay kon ang mga milagro nga nahimo diha kaninyo didto pa himoa sa Tiro ug sa Sidon, ang mga tawo didto dugay na unta nga nagsaput og sako, ug nagbulibod og abo sa ilang ulo aron pagpaila nga sila naghinulsol sa ilang mga sala. Busa hinumdomi nga sa Adlaw sa Paghukom, ang Dios mas maluoy pa sa mga taga-Tiro ug sa taga-Sidon kay kaninyo! Ug ikaw Capernaum, buot kang mobayaw sa imong kaugalingon ngadto sa langit? Itambog ka hinoon ngadto sa impiyerno! Kay kon ang mga milagro nga nahimo diha kanimo didto pa himoa sa Sodoma, ania pa unta kini karong adlawa! Busa hinumdomi nga sa Adlaw sa Paghukom, ang Dios mas maluoy pa sa Sodoma kay kanimo!"

ANTIPONA SA PANGALAWAT

Ang langgam nakakaplag og puloy-anan, ang sayaw nakakitag salag nga kapuy-an sa iyang mga kuyabog diha sa imong mga altar, O Ginoo sa kagahuman, akong Dios. Bulahan sila nga nagapuyo diha sa imong balay, kay sa kanunay magadayeg sila kanimo.