Lunes sa Ikanapulo'g Lima nga Semana sa Ordinaryong Panahon

ANTIPONA SA PAGSUGOD

Sa akong katarong makakita ako sa imong nawong, O Ginoo; sa pagpakita sa imong himaya mahingpit ang akong kalipay.

PAGBASA GIKAN SA BASAHON NI PROPETA ISAIAS

Is. 1: 10-17

Pamati-a ninyo kamong mga pangulo ug katawhan sa Jerusalem sama kamo sa taga Sodoma ug Gomora. Nag-ingon ang Ginoo, "Walay bili alang kanako ang daghan ninyong mga halad; gipul-an na ako sa mga halad nga mga karnero nga inyong gisunog, ug sa mga tambok sa mga mananap; giluod na ako sa dugo sa torong baka, ug sa nating karnero, o sa mga laking kanding. Kinsay nagsugo kaninyo sa pagdala niining tanan inig samba ninyo kanako? Ayaw na kamo pagtunob sa akong Templo. Ayaw na kamo pagdala sa mga halad nga walay kapuslanan; wala akoy gusto sa insenso. Dili na nako dawaton ang inyong pagsaulog sa bag-ong bulan, sa Adlawng Igpapahulay, ug ang inyong pagsimba. Ang inyong mga bag-ong bulan ug ang naandan nga mga pangilin ngil-ad na alang kanako; gisamokan ako ug gipul-an na niini. "Sa dihang ibayaw ninyo ang inyong mga kamut, dili ako motan-aw kaninyo; dili ako mamati bisan pag kapila kamo mag-ampo, kay naduhig sa dugo ang inyong kamut. Panghugas kamo ug hinloi ninyo ang inyong kaugalingon hunong na sa pagbuhat ug dautan ug buhata ang maayo; patunhaya ang hustisya, ug tabangi ang gidaugdaog; panalipdi ang mga ilo, ug labani ang mga biyuda."

SALMO RESPONSORYO

Ps. 50: 8-9. 16-17. 21. 23

T. Sa matarong akong ipakita ang makaluluwas nga gahom sa Dios.

Dili tungod sa imong mga sakripisyo gibadlong ko ikaw, kay ang imong mga halad nga sinunog anaa sa akong atubangan kanunay. Wala ako magkuha og toro gikan sa imong balay, ni mga kanding gikan sa imong panon.

T. Sa matarong akong ipakita ang makaluluwas nga gahom sa Dios.

Nganong giasoy mo man ang akong mga kasugoan, ug giangkon sa imong ba-ba ang akong mga kasabutan. Bisan kon gidumtan mo ang disiplina ug gisalikway mo ang akong mga pulong?

T. Sa matarong akong ipakita ang makaluluwas nga gahom sa Dios.

Sa pagbuhat mo niining mga butanga, magpakabungog ba lamang ako? O naghunahuna ka ba nga sama ako kanimo? Badlongon ko ikaw diha sa pagpahinumdom kanila sa imong atubangan. Ang magahalad og pagdayeg agig sakripisyo nagahimaya kanako; ug kaniya nga nagalakaw sa matarong ipakita ko ang kaluwasan sa Dios.

T. Sa matarong akong ipakita ang makaluluwas nga gahom sa Dios.

BERSO SA DILI PA ANG EBANGHELYO

Aleluya! Dawata ninyo kining mensahe dili ingon nga iya sa tawo kondili nga iya gayod sa Dios. Aleluya!

PAGBASA SA SANTOS NGA EBANGHELYO SUMALA NI SAN MATEO

Mt. 10: 34-11: 1

Miingon si Jesus sa iyang mga tinun-an, "Ayaw kamo paghunahuna nga mianhi ako aron pagdalag kalinaw sa kalibutan; dili kalinaw ang gidala ko, kondili espada. Mianhi ako aron magkabangi ang mga anak nga lalaki ug ang ilang amahan, ang mga anak nga babaye ug ang ilang inahan, ug ang mga umagad nga babaye ug ang ilang ugangan nga babaye; ang labing mangil-ad nga kaaway sa tawo mao ra unya ang mga sakop sa iyang kaugalingong panimalay." "Ang nagmahal sa iyang amahan o sa iyang inahan labaw kanako, dili angay kanako; ug kadtong nagmahal sa iyang anak labaw kanako, dili angay kanako. Ang dili mopas-an sa iyang krus ug mosunod kanako, dili angay kanako. Ug kadtong mag-amping sa iyang kinabuhi, kawad-an hinoon niini; apan ang kawad-an sa iyang kinabuhi tungod kanako, makabaton niini. "Ang modawat kaninyo, modawat usab kanako; ug ang modawat kanako, modawat usab kaniya nga nagsugo kanako. Ang modawat sa sinugo sa Dios tungod sa iyang pagkasinugo sa Dios, gantihan usab sa ganti nga madawat sa sinugo; ug ang modawat sa tinuod nga maayong tawo, tungod sa iyang pagkamaayong tawo, gantihan usab sa ganti nga madawat sa maayong tawo. Ug hinumdomi kini: kadtong magpainom bisan na lag bugnawng tubig sa labing ubos sa akong mga sumusunod, tungod kay siya akong sumusunod, gantihan gayod." Human pahimangnoi ni Jesus ang iyang napulog-duha ka tinun-an, mibiya siya niadtong dapita ug miadto sa kasikbit nga mga lungsod aron pagtudlo ug pagwali.

ANTIPONA SA PANGALAWAT

Ang langgam nakakaplag og puloy-anan, ang sayaw nakakitag salag nga kapuy-an sa iyang mga kuyabog diha sa imong mga altar, O Ginoo sa kagahuman, akong Dios. Bulahan sila nga nagapuyo diha sa imong balay, kay sa kanunay magadayeg sila kanimo.