Ikanapulo'g Lima nga Dominggo sa Ordinaryong Panahon

ANTIPONA SA PAGSUGOD

Sa akong katarong makakita ako sa imong nawong, O Ginoo; sa pagpakita sa imong himaya mahingpit ang akong kalipay.

PAGBASA GIKAN SA BASAHON NI PROPETA ISAIAS

Is. 55: 10-11

"Kay ingon nga ang ulan ug ang yelo mangahulog gikan sa langit ug dili na mobalik didto, kondili mopatubig hinoon sa yuta aron manurok ang mga tanom niini, ug kahatagag binhi ang magpupugas ug pagkaon ang mga tawo. Ang akong mga pulong usab dili mobalik kanako nga kawang lamang; hinonoa, tumanon niini ang akong tuyo ug molampos gayod kini."

SALMO RESPONSORYO

Ps. 65: 10. 11. 12-13. 14

T. Ang binhi nga nahulog sa maayong yuta mohatag og mabungahong ani.

Giduaw nimo ang yuta ug imo kining gibubuan; imo kining giabunohan pag-ayo. Napuno ang mga katubigan sa Dios; ug imong giandam ang binhi.

T. Ang binhi nga nahulog sa maayong yuta mohatag og mabungahong ani.

Ingon niini ang imong pag-andam sa yuta: gibubuan mo ang iyang mga tudling, gidugmok mo ang iyang mga bugon, gihumok mo kini sa makusog nga ulan, gipanalanginan mo ang iyang abot.

T. Ang binhi nga nahulog sa maayong yuta mohatag og mabungahong ani.

Gipurongpurongan mo ang tuig sa imong manggihatagong kaayo, ug ang imong mga dalan nagasugwak sa abunda nga ani; ang wala matikad nga kaumahan nagasugwak niini, ug ang kalipay nagatugob sa kabungtoran.

T. Ang binhi nga nahulog sa maayong yuta mohatag og mabungahong ani.

Ang kaumahan napuno sa panon sa kahayopan ug ang mga lugot gihabolan sa mga tanom. Nagasinggit sila ug nag-awit sa kalipay.

T. Ang binhi nga nahulog sa maayong yuta mohatag og mabungahong ani.

PAGBASA GIKAN SA SULAT NI SAN PABLO NGADTO SA TAGA-ROMA

Rom. 8: 18-23

Giisip ko nga ang atong mga pag-antos niining panahona dili gayod ikatandi sa himaya sa ipadayag unya kanato. Ang tanang binuhat mahinangpon nga nagpaabot nga ipadayag sa Dios ang iyang mga anak. Kay gihukmang walay kapuslanan ang tanang binuhat, dili tungod sa kaugalingong pagbuot niini, kondili tungod sa pagbuot sa Dios. Apan bisan pa niini, nagpabilin ang paglaum nga moabot gayod ang panahon nga luwason ang tanang binuhat gikan sa kaulipnan sa pagkamadunoton, ug makaambit kini sa mahimayaong kagawasan sa mga anak sa Dios. Nasayod kita nga hangtod karon ang tanang binuhat nag-agulo tungod sa kasakit ingon sa babaye nga nagbati. Apan dili kay ang mga butang ray nag-agulo, kondili lakip kita nga nagbaton na sa Espiritu ingon nga unang gasa sa Dios, samtang nagpaabot kita kon kanus-a sagupa nga mga anak sa Dios ug kanus-a luwasa sa hingpit.

BERSO SA DILI PA ANG EBANGHELYO

Aleluya! Bulahan ang hari nga nagaanhi sa ngalan sa Ginoo; kadait dinhi sa yuta, ug himaya didto sa langit. Aleluya!

PAGBASA SA SANTOS NGA EBANGHELYO SUMALA NI SAN MATEO

Mt. 13: 1-23

Nianang adlawa mibiya si Jesus sa balay ug miadto sa daplin sa lanaw, ug milingkod siya didto aron pagtudlo. Daghan kaayo ang mga tawo nga mialirong kaniya, ug tungod niini misakay siya sa usa ka sakayan ug milingkod samtang ang mga tawo didto nagbarog sa lapyahan. Migamit siyag mga sambingay aron pagtudlo kanilag daghang mga butang. Miingon siya, "May usa ka tawo nga miadto sa uma aron pagpugas. Sa pagsabod niya sa binhi, pipila niini didto mahulog sa agianan, ug miabot ang mga langgam ug nanuka niini. Ang uban nahulog sa yuta nga batoon ug nanurok dayon kay dili man lalom ang yuta niini. Apan pagsubang na sa adlaw, nalawos ang mga linghod nga tanom, ug kay wala man makagamot pag-ayo, nangalaya dayon kini. Ang ubang mga binhi didto mahulog sa dapit sa mga sampinit, nanubo ang mga sampinit ug milumos sa mga tanom. Apan ang uban nahulog sa maayong yuta ug nanguhay: may nanguhay og taggatos, ang uban tagkan-uman, ug ang uban tagkatloan." Ug miingon si Jesus, "Busa pamati kamo kon kamo dunay dalunggan!" Unya ang mga tinun-an miduol kang Jesus ug nangutana kaniya, "Nganong maggamit ka mag sambingay inigsulti mo kanila?" Si Jesus mitubag, "Ang mga tinago sa Gingharian sa langit gipadayag na kaninyo, apan wala ipadayag kanila. Kay ang adunay iya, dugangan pa aron maiya ang labaw sa iyang gikinahanglan; apan ang tawo nga walay nahut, kuhaan pa gayod bisan gani sa diyotay nga iyaha. Kini ang katarungan nga naggamit ako og mga sambingay kon magsulti kanila: kay nagtan-aw sila, apan dili makakita, ug namati sila, apan dili makadungog ni makasabut. Busa natuman ang panagna ni Isaias: 'Bisag unsaon ninyo pagpamati, dili kamo makasabut; bisag unsaon ninyo pagtan-aw, dili kamo makakita. Kay kining mga tawhana gahig ulo; gisampongan nila ang ilang mga dalunggan, ug gipiyong ang ilang mga mata. Kay dili sila buot makakita, ug dili buot makadungog, kay tingali unyag makasabut sila ug mobalik kanako, ug sila akong ayohon, nag-ingon ang Dios." "Apan kamo, pagkabulahan ninyo! Kay makakita ang inyong mga mata ug makadungog ang inyong mga dalunggan. Hinumdomi kini: daghang mga propeta ug daghang mga tawo sa Dios nga buot gayod unta motan-aw sa inyong nakita, apan wala sila makakita; ug mamati unta sa inyong nadungog, apan wala sila makabati." "Busa pamati kamo, ug sabta ninyo ang kahulogan sa sambingay mahitungod sa magpupugas. Kadtong nakadungog sa mensahe mahitungod sa gingharian apan wala makasabut niini mao ang binhi nga nahulog didto sa agianan. Miabot ang Yawa ug gisakmit ang gipugas didto kanila. Ang binhi nga nahulog sa yutang batoon mao ang mga tawo nga malipayong midawat sa mensahe sa pagkadungog nila niini. Apan dili kini makagamot diha kanila, busa dili sila molahutay. Sa pag-abot sa mga kalisdanan ug mga paglutos tungod sa mensahe, moundang dayon sila. Ug ang binhi nga nahulog sa dapit sa mga sampinit mao ang mga tawo nga nakadungog sa mensahe, apan ang mga kabalaka bahin niining kinabuhia ug ang gugma alang sa mga bahandi molumos sa mensahe, ug dili sila makabunga. Ug ang binhi nga napugas didto sa maayong yuta mao ang mga tawo nga nakadungog ug nakasabut sa mensahe; mamunga sila: may mamungag taggatos, ang uban tagkan-uman, ug ang uban tagkatloan."

ANTIPONA SA PANGALAWAT

Ang langgam nakakaplag og puloy-anan, ang sayaw nakakitag salag nga kapuy-an sa iyang mga kuyabog diha sa imong mga altar, O Ginoo sa kagahuman, akong Dios. Bulahan sila nga nagapuyo diha sa imong balay, kay sa kanunay magadayeg sila kanimo.