Biyernes sa Ikanapulo'g Upat nga Semana sa Ordinaryong Panahon

ANTIPONA SA PAGSUGOD

Sulod sa imong Templo, O Dios, gihandum namo ang imong mahigugmaong kaluoy. Sumala sa imong ngalan, mao usab ang pagdayeg kanimo nga miabot hangtod sa kinatumyan sa yuta; ang imong tuong kamut puno sa katarungan.

PAGBASA GIKAN SA BASAHON NI PROPETA OSEAS

Hos. 14: 2-10

Andama ang inyong igsusulti, ug balik sa Ginoo. Ingna siya, "Pasayloa ang tanan namong kalapasan ug dawata ang among pangaliyupo ug tumanon namo ang among gisaad kanimo. Dili makaluwas kanamo ang Asiria, dili na kami mokabayo sa mga kabayo; ug dili na kami moisip nga among Dios ang binuhat sa among kamut. Maluluy-on ka niadtong walay laing kadangpan." Ang Ginoo miingon, "Himoon ko silang matinuohon ug higugmaon ko sila, kay nahanaw na ang kasuko ko kanila. Mahimo akong sama sa yamog alang sa Israel; ug mamulak siya sama sa liryo, mogamot siya pag-ayo daw usa ka dakong kahoy; molipang ang iyang mga salingsing ug mahisama siya katahom sa olibo, ug mangalimyon siya sama sa Lebanon. Mamauli sila ug magpuyo sa silong sa akong landong; molambo siya sama sa tanaman ug mamulak sama sa paras; ug ang iyang alimyon sama sa bino sa Lebanon. O katawhan sa Israel, unsa may makuha ninyo sa mga diosdios? Dili ba ako may nagtubag sa inyong pag-ampo ug nag-atiman kaninyo kanunay? Sama ako sa sipre nga lunhaw kanunay, ug akoy naghatag kaninyo sa bunga nga inyong gikaon." Ang maalamon angay mosabot sa nahisulat dinhi, ug ang masinabuton angay masayod niini; kay matarong man ang tanang paagi sa Ginoo, ug mosubay niini ang mga buotan, apan mapandol niini ang mga malapason.

SALMO RESPONSORYO

Ps. 51: 3-4. 8-9. 12-13. 14-17

T. Ang akong ba-ba magpahayag sa imong kadayganan.

Kaloy-i ako, O Dios, diha sa imong kaayo; sa kadako sa imong kaluoy papasa ang akong kalapasan. Hugasi akog maayo sa akong kasaypanan ug linisi ako sa akong kasal-anan.

T. Ang akong ba-ba magpahayag sa imong kadayganan.

Ania, mahimuot ka sa katarong sa kasingkasing, ug sa kahiladman nako gitudloan mo ako sa kinaadman. Linisi ako sa sala pinaagi sa isopo, aron ako maputli; hugasi ako, ug mahimo ako nga puti kaayo.

T. Ang akong ba-ba magpahayag sa imong kadayganan.

Usa ka malinis nga kasingkasing gamaa dinhi kanako, O Dios, ug usa ka makanunayong espiritu bag-oha sulod kanako. Ayaw ako isalikway sa imong atubangan, ug ayaw kuhaa gikan kanako ang imong balaang espiritu.

T. Ang akong ba-ba magpahayag sa imong kadayganan.

Ibalik kanako ang kasadya sa imong kaluwasan, ug padayona dinhi kanako ang mauyonong espiritu. O Ginoo, abliha ang akong mga ngabil, ug ang akong ba-ba magsangyaw sa imong kadayganan.

T. Ang akong ba-ba magpahayag sa imong kadayganan.

BERSO SA DILI PA ANG EBANGHELYO

Aleluya! Tudlo-i ako sa kahulugan sa imong balaod, O Ginoo ug ampingan ko kini sa tibuok kong kasingkasing. Aleluya!

PAGBASA SA SANTOS NGA EBANGHELYO SUMALA NI SAN MATEO

Mt. 10: 16-23

Si Jesus miingon sa iyang mga tinun-an, "Pamati kamo! Ako nagpadala kaninyo nga sama sa mga karnero ngadto sa panon sa mga lobo. Busa kinahanglan nga magmaigmat kamo sama sa bitin, ug magmalumo sama sa salampati. Pagbantay kamo kay may mga tawo unya nga modakop ug motaral kaninyo ngadto sa hukmanan, ug latoson kamo nila sulod sa ilang mga sinagoga. Taralon kamo atubangan sa mga punoan ug sa mga hari tungod kanako, ug makasangyaw kamo sa Maayong Balita ngadto kanila ug sa mga dili Judio. Kon taralon na kamo sa hukmanan, ayaw kamo kabalaka unsay inyong isulti o unsaon ninyo pagsulti; kay inig-abot na sa panahon, hatagan kamo sa inyong isulti. Kay ang mga pulong nga inyo unya isulti dili inyo, kondili iya sa Espiritu sa inyong Amahan nga magsulti diha kaninyo." "Itugyan sa mga tawo ang ilang kaugalingong mga igsuon aron patyon, ug mao usab kini ang buhaton sa mga amahan ngadto sa ilang mga anak. Makigbatok usab ang mga anak sa ilang mga ginikanan ug ipapatay sila sa mga anak. Dumtan kamo sa tanan tungod kanako, apan maluwas ang magpadayon hangtod sa katapusan. Kon lutoson kamo nila sa usa ka lungsod, kagiw kamo ngadto sa laing lungsod. Sultihan ko kamo nga sa dili pa ninyo mahuman ang inyong buluhaton sa tanang lungsod sa Israel, moabot na ang Anak sa Tawo."

ANTIPONA SA PANGALAWAT

Tagamtama ug tan-awa unsa kamaayo ang Ginoo; bulahan ang nagalaum sa Dios.