Huwebes sa Ikanapulo'g Upat nga Semana sa Ordinaryong Panahon

ANTIPONA SA PAGSUGOD

Sulod sa imong Templo, O Dios, gihandum namo ang imong mahigugmaong kaluoy. Sumala sa imong ngalan, mao usab ang pagdayeg kanimo nga miabot hangtod sa kinatumyan sa yuta; ang imong tuong kamut puno sa katarungan.

PAGBASA GIKAN SA BASAHON NI PROPETA OSEAS

Hos. 11: 1-4. 8-9

Ang Ginoo miingon, "Gihigugma ko ang Israel sa bata pa siya, gitawag ko ang akong anak nga didto sa Ehipto. Dihang gipunayan ko sila pagsangpit, nag-anam hinoon silag palayo kanako. Nagpadayon sila sa pagsimba kang Baal, ug sa pagsunog ug insenso sa ilang diosdios. Akoy nagtudlo sa Israel sa paglakaw, ug nagkugos kaniya, apan wala sila masayod nga akoy nag-amoma kanila. Gihigtan ko sila sa mga pisi sa kaluoy, ug lig-ong higot sa gugma, ug nahimo ako nga ilang magtatabang sa pagpagaan sa ilang yugo, ug miduko ako aron sa pagpakaon kanila." "Unsaon ko man sa pagbiya kanimo, O Israel? Unsaon ko man sa pagtugyan kanimo ngadto sa laing kamut? Unsaon ko man sa paghimo kanimo nga sama kang Adma? Unsaon ko man sa paghimo kanimo nga sama kang Seboyim? Dili buot ang akong kasingkasing niana, kay misamot ang akong gugmag kaluoy kanimo. Dili ko ipadayon ang pintas kong kasuko; dili ko gub-on pag-usab ang Israel! Kay ako Dios man ug dili tawo, ang Balaan uban kaninyo, ug dili ako moanha kaninyo diha sa kasilag."

SALMO RESPONSORYO

Ps. 80: 2. 3. 15-16

T. Pakitaa kami sa imong nawong, O Ginoo, ug maluwas kami.

O magbalantay sa Israel, pamati, gikan sa imong trono diha sa kerubin, padan-ag, dasiga ang imong gahom.

T. Pakitaa kami sa imong nawong, O Ginoo, ug maluwas kami.

Sa makausa pa, O Ginoo sa kagahuman, dung-awa kami gikan sa langit, ug tan-awa; Atimana pag-ayo kining parasan, ug bantayi ang gitanum sa imong kamut nga tuo (ang anak sa tawo nga imong gihimong makusganon.)

T. Pakitaa kami sa imong nawong, O Ginoo, ug maluwas kami.

BERSO SA DILI PA ANG EBANGHELYO

Aleluya! Tudlo-i ako sa dalan sa imong mga balaod, ug palandungon ko ang tanan mong mga katingalahan. Aleluya!

PAGBASA SA SANTOS NGA EBANGHELYO SUMALA NI SAN MATEO

Mt. 10: 7-15

Si Jesus miingon sa iyang mga tinun-an, "Lakaw kamo ug isangyaw nga hapit na maghari ang Dios. Ayoha ninyo ang mga masakiton, banhawa ang mga minatay, hinloi ang mga sanlahon, ug aboga ang mga yawa. Nakadawat kamo nga walay bayad, busa panghatag kamo sa walay pagpangayog bayad. Ayaw kamo pagdalag kuwarta-kuwartang bulawan, plata, o bronsi; ayaw pagdalag puntil sa inyong pagpanaw, ni ilisan, ni sapatos, ni sungkod. Ang mga mamumuo angay hatagan sa iyang kabuhian." "Inig-abot ninyo sa usa ka lungsod kon balangay, pangita kamog tawo nga moabiabi kaninyo, ug pabilin uban kaniya hangtod nga mobiya kamo niadtong dapita. Inigdayon ninyo sa usa ka balay, ingna ang tagbalay, 'Ang kalinaw mag-uban kaninyo.' Kon modawat kaninyo ang tagbalay, ibilin kanila ang inyong panghinaut sa kalinaw: apan kondili, bakwia ang inyong panghinaut. Ug kon anaay balay o lungsod nga dili modawat kaninyo o dili mamati kaninyo, biyai kanang dapita ug taktaka ang abog sa inyong tiil. Hinumdomi kini: sa Adlaw sa Paghukom mas maluoy pa ang Dios sa mga tawo sa Sodoma ug sa Gomora kay sa mga tawo nianang lungsora!"

ANTIPONA SA PANGALAWAT

Tagamtama ug tan-awa unsa kamaayo ang Ginoo; bulahan ang naga-laum sa Dios.