Martes sa Ikanapulo'g Upat nga Semana sa Ordinaryong Panahon

ANTIPONA SA PAGSUGOD

Sulod sa imong Templo, O Dios, gihandum namo ang imong mahigugmaong kaluoy. Sumala sa imong ngalan, mao usab ang pagdayeg kanimo nga miabot hangtod sa kinatumyan sa yuta; ang imong tuong kamut puno sa katarungan.

PAGBASA GIKAN SA BASAHON NI PROPETA OSEAS

Hos. 8: 4-7. 11-13

"Nagbuotbuot silag pili og hari, sa walay pagpananghid kanako, ug nagpili silag mga kadagkoan apan wala gani ako masayod. Ang ilang plata ug bulawan gihimo nilang mga diosdios alang lang sa ilang kaugalingong kalaglagan. Gitamay ko, O Samaria, ang nati mong baka nga imong gisimba. Ang kasuko ko misilaob batok kanila. Kanus-a pa ba magputli ang katawhan sa Israel? Tawo ang nagbuhat niini; dili ang Dios. Kinahanglan dugmokon ang, nating baka sa Samaria. Kay nagpugas siyag hangin, bagyo ang iyang anihon; wala mamunga ang iyang gipugas busa wala siyay makaon; kon mamunga man ugaling, mga langyaw ang mokaon niini." "Naghimo ang Israel ug daghang mga halaran, nga nakaangin sa katawhan sa pagpakasala. Bisan pag magsulat ako ug napulo ka libong balaod alang kaniya, dili gihapon siya magkabana niini. Gusto siyang maghalad ug mga mananap aron makakaon siya niini; apan ang Ginoo wala mahimuot niini. Nahinumdom siya karon sa iyang mga kalapasan ug kini silotan niya; ug mobalik siya sa Ehipto."

SALMO RESPONSORYO

Ps. 115: 3-4. 5-6. 7-8. 9-10

T. Ang balay ni Israel nagasalig sa Ginoo.

Ang atong Dios anaa sa langit; bisan unsa ang iyang gusto iyang gibuhat. Ang ilang dios-dios plata ug bulawan, mga buhat sa kamut sa mga tawo.

T. Ang balay ni Israel nagasalig sa Ginoo.

Duna silay mga ba-ba apan dili makasulti; duna silay mga mata apan dili makakita; Duna silay mga dunggan apan dili makabati, duna silay mga ilong apan dili makapanimaho.

T. Ang balay ni Israel nagasalig sa Ginoo.

Duna silay mga kamut apan dili makahikap; duna silay mga tiil apan dili makalakat. Ang magbubuhat nila mahisama kanila, ang tanan nga nagasalig kanila.

T. Ang balay ni Israel nagasalig sa Ginoo.

BERSO SA DILI PA ANG EBANGHELYO

Aleluya! Ang tanan nimong mga balaod malig-on, O Ginoo, gipabarog hangtod sa kahangturan. Aleluya!

PAGBASA SA SANTOS NGA EBANGHELYO SUMALA NI SAN MATEO

Mt. 9: 32-38

Sa pagpanglakat na sa mga tawo, may mga tawo na usab nga nagdala ngadto kang Jesus og usa ka tawo nga naamang tungod kay giyawaan man siya. Sa nahinginlan na ang yawa, nakasulti ang tawo, ug nahibulong ang tanan. Unya naninggit sila, "Wala pa kita makakitag hitabo nga sama niini dinhi sa Israel!" Apan miingon ang mga Pariseo, "Ang pangulo sa mga yawa maoy naghatag kaniya sa gahom sa pagpagula kanila." Unya giduaw ni Jesus ang tanang kalungsoran ug kabaryohan. Nanudlo siya didto sa ilang mga sinagoga, ug giwali niya ang Maayong Balita bahin sa paghari sa Dios ug giayo niya ang mga tawo sa tanan nilang balatian ug sakit. Sa pagkakita niya sa daghang mga tawo, naluoy siya kanila kay masulob-on ug makaluluoy man sila, daw mga karnero nga walay magbalantay. Busa giingnan niya ang iyang mga tinun-an, "Daghan ang anihon, apan diyotay ra ang mga mangangani. Busa pag-ampo kamo sa tag-iya sa anihon aron magpadala siyag dugang pang mamumuo nga moani niini."

ANTIPONA SA PANGALAWAT

Tagamtama ug tan-awa unsa kamaayo ang Ginoo; bulahan ang nagalaum sa Dios.