Lunes sa Ikanapulo'g Upat nga Semana sa Ordinaryong Panahon

ANTIPONA SA PAGSUGOD

Sulod sa imong Templo, O Dios, gihandum namo ang imong mahigugmaong kaluoy. Sumala sa imong ngalan, mao usab ang pagdayeg kanimo nga miabot hangtod sa kinatumyan sa yuta; ang imong tuong kamut puno sa katarungan.

PAGBASA GIKAN SA BASAHON NI PROPETA OSEAS

Hos. 2: 16. 17-18. 21-22

Ug niadto unyang adlawa mosangpit siya kanako sa pag-ingon, "Akong bana" ug dili na siya motawag kanako ug "Akong Baal" kay wagtangon ko sa iyang ba-ba ang ngalan sa mga Baal, ug dili na gayod niya kini hisgotan. Ug niadtong adlawa himoan ko silag kasabutan uban sa mga mananap ug sa mga kalanggaman, ug sa mga mananap nga nagkamang sa yuta; ug wagtangon ko ang pana, ang espada, ug ang gubat; ug pahigdaon ko sila nga layo sa kakuyaw. Niadto unyang adlawa, tubagon ko ang pag-ampo sa akong katawhang Israel. Pabunokon ko ang ulan sa yuta, ug ang yuta mohatag ug abot nga kalan-on, mga ubas ug mga olibo.

SALMO RESPONSORYO

Ps. 145: 2-3. 4-5. 6-7. 8-9

T. Ang Ginoo maayo ug maluluy-on.

Himayaon ko ikaw adlaw-adlaw, ug daygon ko ang imong ngalan hangtod sa kahangturan. Dako ang Ginoo ug angay gayod siyang daygon; ang iyang kadako dili matukib.

T. Ang Ginoo maayo ug maluluy-on.

Ang tanang kaliwatan nagadayeg sa imong mga buhat ug nagasangyaw sa imong gahom. Nagasulti sila sa kasanag sa imong mahimayaong kahalangdon ug nagasaysay sa imong katingalahang mga buhat.

T. Ang Ginoo maayo ug maluluy-on.

Nagaasoy sila sa gahom sa imong makalilisang nga mga buhat ug nagabutyag sa imong kadako. Nagasibya sila sa kabantog sa imong naghingapin nga kaayo ug nagaawit nga masadya sa imong katarong.

T. Ang Ginoo maayo ug maluluy-on.

Ang Ginoo maayo ug maluluy-on, dugay nga masuko ug dakog gugma. Ang Ginoo maayo alang sa tanan ug maluluy-on sa tanan niyang mga buhat.

T. Ang Ginoo maayo ug maluluy-on.

BERSO SA DILI PA ANG EBANGHELYO

Aleluya! Kon karon makadungog kamo sa iyang tingog, ayaw patig-aha ang inyong mga kasingkasing. Aleluya!

PAGBASA SA SANTOS NGA EBANGHELYO SUMALA NI SAN MATEO

Mt. 9: 18-26

Samtang nagsulti si Jesus niini, usa ka opisyal nga Judio miduol kaniya, miluhod sa iyang atubangan, ug miingon, "Bag-o pa lang namatay ang akong anak nga babaye; apan adtoa siya ug itapion ang imong kamut kaniya, ug mabuhi siya." Busa mitindog si Jesus ug misunod kaniya, ug mikuyog ang iyang mga tinun-an. Unya usa ka babaye nga gitalinug-an sulod na sa napulog -duha ka tuig miduol sa luyo ni Jesus ug gihikap niya ang sidsid sa iyang bisti, kay miingon man siya sa iyang kaugalingon, "Kon makahikap lamang ako sa iyang bisti, mamaayo gayod ako." Milingi si Jesus ug nakita niya ang babaye ug miingon siya, "Ayaw kahadlok, anak! Ang imong pagsalig maoy nakaayo kanimo. "Ug niadto gayong gutloa naayo ang babaye. Busa miadto si Jesus sa balay sa opisyal. Sa pagkakita niya sa mga musikero alang sa paglubong ug sa mga tawo nga nagkaguliyang, miingon siya, "Gula kamong tanan! Wala mamatay ang bata—natulog lamang siya!" Tungod niini gibugalbugalan nila si Jesus. Sa nakagula na ang mga tawo, misulod si Jesus sa lawak sa bata ug gikuptan niya ang kamut, ug mitindog ang bata. Ug ang balita mahitungod niini mikaylap sa tanang dapit niadtong yutaa.

ANTIPONA SA PANGALAWAT

Tagamtama ug tan-awa unsa kamaayo ang Ginoo; bulahan ang nagalaum sa Dios.